Musk yabaye umuntu wa mbere kw'isi ashikanye imiriyaridi amajana atanu z'amadolari y'Abanyamerika

Elon Musk, mwene ikompanyi Tesla, yabaye umuntu wa mbere muri kahise ka kiremwamuntu agize umutungo ashikanye agaciro k'imiriyaridi zirenga 500 z'amadorari y'Abanyamerika, inyuma y'uko agaciro ka kompanyi yiwe ihingura imodokari zikoresha umuyagankuba hamwe n'ayandi matungo vyiyongereye muri uno mwaka.

Uno mutunzi ruhebwa yubakiye amatungo yiwe ku bijanye n'ubuhinga bwa none yashikanye imiriyaridi 500,1 z'amadorari ku muhingamo w'ejo ku wa gatatu mu masaha ya New York, imbere y'uko akoroka gato gushika ku miriyaridi 499 zirenga gato ku mugoroba, nk'uko bivugwa n'ikinyamakuru gikurikirana ubuzima bw'abatunzi ruhebwa Forbes, kivyandika.

Hampande ya Tesla, bivugwa ko agaciro k'ayandi matungo yiwe, harimwo ikompanyi AI y'ubwenge bw'ubukorano, hamwe n'ikompanyi y'ivy'ikirere SpaceX, nako nyene kaduze mu mezi aheze.

Iyi ntambwe itsimbataje gusumba ikibanza ca Musk nk'umuntu atunze kuruta abandi bose kw'isi, gusumba kure cane abakeba biwe mu bijanye n'ubuhinga bwa none kw'isi yose.

Ku rutonde rwa Forbes rwerekana abatunzi ruhebwa kw'isi, uwashinze ikompanyi Oracle, Larry Ellison, ni we aza ku mwanya wa kabiri mu bantu batunze cane kw'isi yose, akaba afise amatungo afise agaciro k'amadorari y'Abanyamerika yababa imiliyaridi 350,7.

Mu kwezi guheze, Ellison yarasumbije gato Musk imyuma y'uko imitahe ya Oracle iduze igashika hejuru ya 40%, biturutse ku migambi ikomeye ya kazoza kayo mu bijanye n'ubuhinga bwayo bwo gukoresha ububiko bwa nyabwonko (ikizwi nka cloud) hamwe n'ibijanye n'ubuhinga bwa AI.

Umutungo wa Musk ufitaniye isano rya hafi cane n'imitahe yiwe afise muri Tesla irenza 12%, ivyatumye imitaye y'iyi kompanyi iduga cane muri uno mwaka.

Imitahe ya Tesla yararengeje 3.3% ejo ku wa gatatu i New York, uno mwaka ikaba yaraduze kurenga kuri 20%.

Muri ano mezi aheze, imitahe y'ino kompanyi yagiye iduga cane kubera abanyamitahe bashimye cane ingene Musk yitayeho cane amakompanyi yiwe aho kwibanda kuri poritike.

Mu ntango z'uno mwaka, yaraneguwe cane kubera ivyo yakoze mu mugambi w'intwaro ya Trump wo kugabanya amahera reta ikoresha, ikizwi nka DOGE (Department of Government Efficiency), watumye abatari bake batakaza ubuzi bwabo.

Musk, ari na we nyene uburuga hwaniro rwa X, yarerekanye cane aho ahagaze ku bibazo bitandukanye, nk'ivyerekeye imigambi ijanye n'abimukira n'ubutandukanye bw'abantu, ubusumbane hamwe no kudakumira, ikizwi nka DEI (diversity, equity, and inclusion).

Umukuru w'inama nyobozi ya Tesla, Robyn Denholm, yavuze ko muri Nyakanga (9) Musk ari we yari imbere kandi afise n'ikibanza nyamukuru muri iyi kompanyi ihingura imodokari.

Iyi nama nyobozi yavuze kandi ko Musk ashobora kuzohabwa agahembo kashobora kurenga imiriyaridi 1000 z'amadolari aramutse ashitse ku migambi y'ihangiro rikomeye yashizwe imbere mu myaka icumi iri imbere.

Kugira ngo aronke aka kagembo, yotegerezwa kuduza agaciro ka Tesla incuro umunani, akagurisha amarobo ya AI akoreshwa mu bwenge bw'ubukorano, akagurisha izindi miriyoni 12 z'imodoka za Tesla, agashika no ku zindi ntego yihaye.

Mu kwezi guheze kandi, Musk yatangaje ko yari yaguze imitahe ya Tesla yababa umuriyaridi, mu vyo bamwe mu banyamitahe bafata ko ari icizere bamufitiye muri iyi kompanyi.

Muri iyi myaka iheze, Tesla yarahuye n'inzitiri zitari nke, harimwo n'abakeba biwe bakomeye mu guhingura imodoka zikoresha umuyagankuba nka BYD y'Ubushinwa.

Iyi kompanyi kandi iri mu nzira y'impinduka kugira ngo ibikorwa vyayo bishingire kuri AI n'amarobo.