DR Congo: Ibyo wamenya ku Munyamerika wagizwe umukuru mushya wa MONUSCO
Ahavuye isanamu, UN Photo/Manuel Elías
- Umwanditsi, Didier Bikorimana
- Igikorwa, BBC News Gahuzamiryango
- Igihe co gusoma: iminota 3
Umunyamabanga mukuru w'Umuryango w'Abibumbye (ONU/UN) António Guterres yaraye atangaje ko yagize Umunyamerika James Swan intumwa yihariye ye ishinzwe ubutumwa bw'umutekano bwa ONU muri Repubulika ya Demokarasi ya Congo (DRC).
Swan asimbuye Umunya-Guinea-kazi Bintou Keita wari uri kuri uwo mwanya guhera mu 2021, warangije manda ye. Guterres yashimiye Keita ku kazi "k'ingenzi" yakoreye MONUSCO.
Ashyizwe kuri uyu mwanya mu gihe gikomeye, aho ingabo za MONUSCO zikomeje kugabanya ibikorwa byazo mu gihe intambara ikomeje mu burasirazuba bwa DRC hagati y'ingabo za leta n'inyeshyamba za M23 zirwanya ubutegetsi.
Inyandiko ya ONU itangaza Swan kuri uwo mwanya ivuga ko ari umudipolomate w'inararibonye wakoze igihe kirekire mu bihugu byo muri Afurika, agahangana n'ibibazo by'urusobe bya politike n'iby'umutekano.
Uretse Icyongereza avuga nk'ururimi kavukire, Swan avuga n'Igifaransa neza.
Kuva muri Werurwe (3) mu 2025, yari intumwa yihariye y'umunyamabanga mukuru wa ONU muri Somalia akaba n'umukuru w'ubutumwa bwa ONU muri Somalia (UNTMIS), umwanya yari yarigeze kubaho mbere mu buryo bw'agateganyo guhera muri Gicurasi (5) mu 2024.
Mbere yaho, nkuko inyandiko ya ONU ikomeza ibivuga, uyu mugabo yari yarayoboye ubutumwa bwa ONU muri Somalia (icyo gihe bwitwaga UNSOM) kuva mu 2019 kugeza mu 2022.
Yanakoze muri leta y'Amerika mu gihe cy'imyaka 32, mu bikorwa byinshi birimo no gukorera muri DRC, nk'ambasaderi w'Amerika muri DRC (2013-2016), uwungirije ambasaderi (2001-2004) hamwe n'ushinzwe DRC muri leta y'Amerika (1996-1998).
Swan afite impamyabumenyi y'icyiciro cya mbere cya kaminuza mu bubanyi n'amahanga, yakuye muri Kaminuza ya Georgetown, n'impamyabumenyi ya 'Master of Arts' mu masomo akataje y'ububanyi n'amahanga yakuye kuri Kaminuza ya Johns Hopkins, na 'Master of Arts' mu masomo y'umutekano yakuye mu ishuri rikuru ry'intambara (National War College), hose muri Amerika.
James Swan abaye intumwa yihariye ya 10 y'umunyamabanga mukuru wa ONU iyoboye ubu butumwa bwa ONU muri DRC kuva bwoherejwe bwa mbere muri icyo gihugu mu 1999.
Icyo gihe bwitwaga MONUC, buza guhindurirwa izina mu 2010 bwitwa MONUSCO.
