Umutegetsi ushinzwe abimukira wagize uruhare rukomeye muri gahunda ya Trump yo kubahashya yitezwe kuva i Minneapolis

Umutegetsi wo ku rwego rwo hejuru ushinzwe abinjira mu gihugu yitezwe kuva mu mujyi wa Minneapolis muri leta ya Minnesota, mu gishobora kuba impinduka mu mvugo y'ibiro bya perezida w'Amerika (White House) nyuma y'irasa ryaviriyemo urupfu Umunyamerika wa kabiri wishwe n'abashinzwe umutekano bo ku rwego rw'igihugu ryabaye mu mpera y'icyumweru gishize.

Mu gihe komanda Gregory Bovino ushinzwe irondo ryo ku mipaka hamwe na bamwe mu bashinzwe abinjira mu gihugu bavuye muri uyu mujyi, umutegetsi wo hejuru ushinzwe imipaka, Tom Homan, azatangira kuyobora ibikorwa bibera muri Minneapolis, nyuma yuko iraswa rya Alex Pretti ryo ku wa gatandatu ryongereye ubushyamirane.

Icyemezo cya Perezida Donald Trump gishobora guca amarenga y'ubushake bw'ubutegetsi bwe bwo kureka umuvuno wo guhangana cyane ku ruhande rwa leta, mu gikorwa cyabwo cyo ku rwego rw'igihugu cyo guhashya abinjira mu gihugu.

Nubwo iyo mpinduka yatangajwe, uburyo bwo ku mbuga za interineti bwo gukurikirana ibikorwa byo gusaka abinjira mu gihugu bugaragaza ko ibyo bikorwa by'ubutegetsi n'ubundi byakomeje.

Bovino ni we wari uhagarariye icyo gikorwa (operation) ubwo Pretti - indorerezi yabonywe irimo gufata amashusho abashinzwe umutekano - yajyaga mu bushyamirane bwamuviriyemo kuraswa amasasu menshi ku muhanda w'i Minneapolis.

Uwo komanda w'ibikorwa byo kugenzura imipaka yahuhuye uko ibintu byari bimeze nyuma y'iryo raswa, ubwo yavugaga ko Pretti yari afite umugambi wo "gutsembatsemba" abashinzwe umutekano.

Minisiteri y'umutekano mu gihugu (DHS) yavuze ko abo bashinzwe umutekano barashe mu buryo bwo kwirwanaho nyuma yuko Pretti, bavuga ko yari afite imbunda nto, yari yanze amagerageza yo kumwambura intwaro kuri uwo wa gatandatu.

Ababibonye biba, abategetsi baho hamwe n'umuryango w'uwo wishwe, bahinyuje ibyo, bavuga ko Pretti yari afite telefone mu kiganza, ko itari intwaro.

Hagati aho, ababyeyi be bashinje ubutegetsi gukwirakwiza "ibinyoma biteye iseseme" ku kuntu ibintu byagenze.

Mbere y'iryo raswa, Bovino yari ingenzi cyane mu muvuno w'ubuhezanguni w'ubutegetsi bwa Trump ujyanye n'iyubahirizwa ry'amategeko ajyanye n'abimukira mu mijyi myinshi, akaba yarakoreshaga cyane imbuga nkoranyambaga ndetse yari afite akamenyero ko gufata amashusho abashinzwe umutekano bari mu bikorwa byo gusaka, akayatangaza, mu kwamamaza ibyo bikorwa byabo.

Homan, ubu uzajya uha raporo y'akazi Perezida, ashyigikira umuvuno wo guhangana cyane wa Trump ku bijyanye n'iyubahirizwa ry'amategeko ajyanye n'abimukira.

Ariko anafite ubunararibonye muri ako kazi - Homan yakoze mu bijyanye n'abimukira no kwirukana abantu mu gihugu mu gihe cy'ubutegetsi bwa Perezida w'umudemokarate, Barack Obama.

Ku wa mbere, i Minneapolis, impagarara n'uburakaribyari biri ku kigero cyo hejuru bitewe no kuba hari abategetsi bo ku rwego rw'igihugu, nubwo hari hamenyekanye amakuru yuko Bovino na bamwe mu bashinzwe umutekano bagiye kuhava.

George Cordero, umuturage wo mu mujyi wa St Paul, ubangikanye na Minneapolis, yagize ati: "Abantu benshi ntibashobora gukora ubu, ntibashobora kuva mu nzu zabo, bafite ubwoba."

Pretti yabaye umuturage wa kabiri w'i Minneapolis urashwe akicwa n'abategetsi bo ku rwego rw'igihugu bashinzwe abinjira mu gihugu, kuva abo bategetsi bageze muri iyo leta; Renee Nicole Good yishwe n'ushinzwe umutekano ugenzura abinjira mu gihugu n'imipaka (ICE) ku itariki ya 7 y'uku kwezi kwa Mutarama.

Amakuru amwe yo mu bitangazamakuru yo ku wa mbere yumvikanishije ko Bovino yakuwe (yirukanwe) mu nshingano ze, ariko umuvugizi wa minisiteri y'umutekano mu gihugu, Tricia McLaughlin, yabihakanye, avuga ko uwo mutegetsi mukuru ushinzwe ubugenzuzi bw'imipaka "afatiye runini cyane itsinda rya Perezida ndetse ni Umunyamerika ukomeye cyane".