Ni ibiki birimo kuba i Bukavu?

Inyandiko gusa
Ifoto y'abarwanyi ba M23 hagati mu mujyi wa Bukavu yatangajwe n'umuvugizi w'uyu mutwe Col Willy Ngoma kuri iki cyumweru

Ahavuye isanamu, Willy Ngoma/X

Insiguro y'isanamu, Ifoto y'abarwanyi ba M23 hagati mu mujyi wa Bukavu yatangajwe n'umuvugizi w'uyu mutwe Col Willy Ngoma kuri iki cyumweru

Igisirikare cya DR Congo (FARDC) mu gitondo cyo kuri iki cyumweru cyatangaje ko ari cyo kigenzura umujyi wa Bukavu, gusa amashusho n'amakuru atangwa n'abatuye i Bukavu avuga ko abarwanyi ba M23 bakomeje kwinjira muri uyu mujyi ari benshi.

Mu ijoro ryo ku wa gatandatu hari amakuru yatangajwe ko abasirikare ba FARDC bagarutse muri Bukavu kuko abarwanyi ba M23 bawuvuyemo.

Umunyamakuru wa Radio Maendeleo uri i Bukavu yabwiye BBC ko ibi nawe yabyumvise ariko aho ari atabonye abo basirikare ba leta.

Mu kugaragaza ko abarwanyi ba M23 bari i Bukavu, umuvugizi wabo wa gisirikare Col Willy Ngoma yagaragaje video n'ifoto y'abarwanyi ba M23 bari ahazwi nko kuri Place de l'Independence hagati mu mujyi wa Bukavu.

Umuvugizi wa gisirikare wa M23, Col Willy Ngoma, abajijwe ku bivugwa n'ingabo za Leta, yasetse. Avuga ko "amashusho yonyine aravuga" yongeraho ko "igisubizo ari ibirimo kuba" i Bukavu.

Andi mashusho atandukanye yerekanye abarwanyi ba M23 bakoze inama ya mbere n'abaturage mu mujyi wa Bukavu kuri stade nto izwi nka 'Place du 24'.

Muri aya mashusho, Bernard Maheshe Byamungu - umwe mu bakuriye abarwanyi ba M23, yumvikana yizeza abaturage ba Bukavu "umutekano amasaha 24 kuri 24".

Mu gitondo kuri iki cyumweru, hagati no mu nkengero za Bukavu habonetse imirongo miremire y'abarwanyi ba M23, bivugwa ko uyu mutwe urimo kohereza abandi barwanyi benshi muri uyu mujyi.

Kuri iki cyumweru, amashusho atandukanye yafashwe n'abaturage bavuga ko ari imirongo miremire y'abarwanyi ba M23 barimo kwiyongera muri Bukavu

Ahavuye isanamu, UGC

Insiguro y'isanamu, Kuri iki cyumweru, amashusho atandukanye yafashwe n'abaturage bavuga ko ari imirongo miremire y'abarwanyi ba M23 barimo kwiyongera muri Bukavu

Uyu munyamakuru utifuje gutangazwa, yabwiye BBC ati: "Muri iki gitondo nanjye nababonye, imirongo yabo ni miremire, gusa aho nababonye sinakwemeza neza niba barimo binjira mu mujyi cyangwa se barimo bawusohokamo."

Amashusho menshi yashyizwe ku mbuga nkoranyambaga yafashwe n'abaturage bavuga ko ibyo barimo kubona ari imirongo miremire y'abarwanyi ba M23 bagendaga mu mujyi wa Bukavu. BBC ntiyashoboye kugenzura ayo mashusho mu buryo bwigenga.

Ijoro ryacyeye ryumvikanyemo amasasu menshi ahatandukanye muri Bukavu, nk'uko abahatuye babivuga.

Muri uyu mujyi hari ikibazo cy'intwaro nyinshi mu basivile, bivuye ahanini kuri Wazalendo – imitwe y'abasivile yahawe intwaro na leta ngo ifashe ingabo kurwanya M23.

Bukavu kandi yaranzwe n'ibikorwa by'ubusahuzi ku wa gatandatu, byakomeje no mu gitondo cyo ku cyumweru, nk'uko uyu munyamakuru abivuga.

Inama ya Perezida Tshisekedi, abategetsi bakuru, n'abakuru b'ingabo yemeje ko Bukavu igenzurwa n'ingabo za leta

Ahavuye isanamu, Presidence-RDC

Insiguro y'isanamu, Inama ya Perezida Tshisekedi, abategetsi bakuru, n'abakuru b'ingabo yemeje ko Bukavu igenzurwa n'ingabo za leta

Nyuma y'inama yo ku wa gatandatu nijoro yahuje Perezida Félix Tshisekedi, abategetsi bakuru, n'abakuru b'ingabo yiga uko ibintu byifashe mu burasirazuba bwa DR Congo, ibiro bya perezida w'iki gihugu byavuze ko Bukavu "yatewe by'igihe gito" na M23, "iragenzurwa n'ingabo za Congo n'ibihangange bya wazalendo"

Ibi byasubiwemo n'itangazo ry'igisirikare nyuma rivuga ko muri iyi nama "byemejwe ko umujyi wa Bukavu, winjiwe by'igihe gito n'abateye, [ubu] ugenzurwa wose n'ingabo za Congo".

Kugeza ubu haracyari urujijo ku ugenzura byuzuye umujyi wa Bukavu, gusa abategetsi ba gisivile na gisirikare b'uyu mujyi bo barawuhunze.

Uyu mujyi ubu uri kuvugwamo ibikorwa by'ubusahuzi ku maduka, amasoko, n'ibigo byigenga hamwe n'ubugizi bwa nabi butandukanye.

M23 yasabwe 'kuva i Bukavu ako kanya' – Macron

Hagati aho, Perezida Emmanuel Macron w'Ubufaransa mu ijoro ryacyeye yatangaje ko yavuganye na mugenzi we Tshisekedi wa DR Congo, bakumvikana ku ngingo zirimo;

  • Gusaba ko haba agahenge ako kanya kandi kakubahirizwa n'impande zose
  • Ko M23 igomba guhita iva i Bukavu ako kanya
  • Ko habaho kwizezwa umutekano abategetsi ba gisivile na gisirikare bakagaruka i Bukavu
  • Ko M23 irekura ikibuga cy'indege cya Kavumu indege za gisivile zikongera kugenda

Macron yavuze ko asaba u Rwanda gufasha ngo izi ngingo zubahirizwe.

Uruhande rwa M23 cyangwa u Rwanda ntacyo baravuga ku byatangajwe na Perezida Macron.

Ubufaransa, kimwe n'ibindi bihugu nk'Ubwongereza na Leta Zunze Ubumwe za Amerika, na ONU bemeza ko ingabo z'u Rwanda zifasha umutwe wa M23.

Perezida Kagame yabwiye inama y'umutekano y'Ubumwe bwa Afurika ko atazemera ko hari abakerensa ikibazo cya FDLR

Ahavuye isanamu, Village Urugwiro

Insiguro y'isanamu, Perezida Kagame yabwiye inama y'umutekano y'Ubumwe bwa Afurika ko atazemera ko hari abakerensa ikibazo cya FDLR

Abategetsi b'u Rwanda bahakana kohereza ingabo muri Congo, bavuga ko bafashe ingamba zo kurinda umutekano w'igihugu ku mipaka. Banenga ko amahanga yoroshya ikibazo cy'umutwe wa FDLR urwanya ubutegetsi bwa Kigali ukorera mu burasirazuba bwa DR Congo.

Ku wa kane i Addis Ababa mu nama y'akanama k'umutekano k'Ubumwe bwa Afurika yize ku kibazo cya DR Congo, Perezida Paul Kagame yavuze ko u Rwanda "ntirurebwa n'ibibazo bya Congo. Dufite ibyacu byo kwitaho."

Yanenze abakerensa ikibazo cya FDLR, avuga ko ari "ugukerensa amateka yanjye" yongeraho ko ibyo atazabyemera, n'uwabikora "uwo yaba uri we wese".

ONU, ibihugu by'iburengerazuba na Kigali, bashinja ingabo za DR Congo gufatanya n'umutwe wa FDLR, ibyo Kinshasa na yo ihakana.