Ukraine ivuga ko yarashe iteme rya Crimea ikoresheje ibiturika byo munsi y'amazi

Urwego rw'ubutasi bw'imbere mu gihugu rwa Ukraine (SBU) rwavuze ko ku wa kabiri rwarashe iteme ryo ku mwigimbakirwa wa Crimea rukoresheje ibiturika byo munsi y'amazi, mu gikorwa (opération) cyateguwe "amezi menshi".

SBU yavuze ko yateze ibiturika ku bifashe iryo teme, ibyo biturika bingana n'ibiro (kg) 1,100 by'ikinyabutabire cya TNT (Trinitrotoluene) "byangije mu buryo bukomeye" igice cyo hasi cy'ibifashe iryo teme.

SBU yongeyeho ko "igikoresho giturika cya mbere" cyaturikijwe "nta musivile upfuye cyangwa ngo akomereke". Ayo makuru yatangajwe na SBU ntiyahise ashobora kugenzurwa mu buryo bwigenga.

Mbere, ibitangazamakuru byo mu Burusiya byavuze ko iryo teme ryafunzwe by'akanya gato ariko ko ryongeye gufungurwa saa yine z'amanywa (10:00) ku isaha yaho, ni ukuvuga saa tatu za mu gitondo (9:00) ku isaha yo mu Rwanda no mu Burundi.

Ariko nyuma yaho kuri uwo munsi wo ku wa kabiri, abategetsi bo muri ako gace baburiye ko iryo teme ryongeye gufungwa by'igihe gito.

Amakuru atemejwe yatangajwe ku mbuga nkoranyambaga yavuze ko ibindi biturika byabereye mu nkengero z'iryo teme.

Shene y'ubutegetsi yo ku rubuga rwa Telegram itangaza amakuru ajyanye n'imikorere kuri iryo teme yagize iti: "Turasaba abari ku iteme no mu gace k'ubugenzuzi kuguma batuje no gukurikiza amabwiriza y'abakozi bashinzwe umutekano wo gutwara abantu n'ibintu."

Uburusiya nta cyo bwatangaje kuri icyo gitero cyo ku wa kabiri mu gitondo ariko abatangaza amakuru y'ibya gisirikare bo mu Burusiya bahwihwishije ko indege nto y'intambara itajyamo umupilote (drone) igendera munsi y'amazi ari yo yarashe uruzitiro (bariyeri) rw'ubwirinzi rw'iryo teme, ko atari igiturika cyakoreshejwe.

SBU yavuze ko umuyobozi wayo, Liyetona Jenerali Vasyl Malyuk, ari we ubwe wagenzuye iyo 'opération' ndetse ko ari we wahuzaga ibikorwa byo kuyitegura.

Mu butumwa yatangaje kuri Telegram, SBU yasubiyemo amagambo ya Malyuk avuga ko Ukraine yari yararashe iteme rya Crimea mu mwaka wa 2022 no mu mwaka wa 2023, ko bityo rero irimo "gukomeza uyu mugenzo wo munsi y'amazi".

Malyuk yagize ati: "Nta bikoresho bitemewe n'amategeko by'Uburusiya bifite umwanya ku butaka bw'igihugu cyacu."

"Ku bw'ibyo rero, iteme rya Crimea ni ahantu hemewe rwose ho kuraswa, cyane cyane ushingiye ku kuba umwanzi arikoresha nk'inzira y'ingenzi yo kunyuzamo ibikoresho byo guha ingabo ze."

Iryo teme – rinazwi nk'iteme rya Kerch – ryubatswe n'Uburusiya nyuma yuko buteye ndetse bukiyomekaho umwigimbakirwa wa Crimea mu mwaka wa 2014. Ryatashywe ku mugaragaro na Perezida w'Uburusiya Vladimir Putin mu mwaka wa 2018, mu birori bikomeye.

Muri Ukraine, iryo teme ni ikimenyetso cyanzwe (cyangwa) kigaragaza kwigarurirwa n'Uburusiya. Uburusiya buririndana ubwitonzi – ibyo bituma igitero icyo ari cyo cyose gishoboye kuba, cyaba icya 'drone' zo munsi y'amazi cyangwa icy'ibiturika, kiba ari ikintu gikomeye cyane kigezweho.

Icyo gitero cyo ku wa kabiri kuri iryo teme cyabaye hashize amasaha 48 gusa Ukraine irashe ahantu hanyuranye mu Burusiya, mu gitero cyiswe 'Spider Web'.

Muri icyo gitero kindi, Ukraine yavuze ko yinjije mu Burusiya mu buryo bwa magendu 'drone' zirenga 100, ishobora kuzigeza hafi y'ibibuga by'indege za gisirikare z'Uburusiya, zitwawe n'abashoferi b'amakamyo batabicyekaga.

Nuko izo 'drone' zigurutswa zisohoka muri ayo makamyo, zigaba ibitero ku ndege z'intambara zihenze cyane zari ziri ahantu hanyuranye mu Burusiya.