Iherezo ry'igisirikare ku wabaye umugaba mukuru w'ingabo z'u Rwanda n'umukuru wa FERWAFA

Perezida w'u Rwanda Paul Kagame yashyize mu kiruhuko cy'izabukuru Jenerali Jean Bosco Kazura wahoze ari umugaba mukuru w'ingabo, n'abandi basirikare bane bo mu rwego rwa Jenerali.

Abo bandi ni Brigadiye Jenerali John Bagabo, Brigadiye Jenerali John Bosco Rutikanga, Brigadiye Jenerali Johnson Hodari na Brigadiye Jenerali Firmin Bayingana.

Itangazo rya minisiteri y'ingabo ry'ejo ku wa gatanu rivuga ko Perezida Kagame yanemeje isezererwa mu ngabo ry'abandi basirikare 170 bo ku rwego rwo hejuru n'abasirikare 992 b'"ayandi mapeti".

Ibi bibaye nyuma y'amasaha Kagame yirukanye abasirikare babiri bo ku rwego rwo hejuru, anasesa amasezerano y'akazi y'abandi basirikare hafi 200.

Kazura uri mu basezerewe ni muntu ki?

Jean Bosco Kazura yari umwe mu basirikare bakuru bazwi cyane mu Rwanda no mu karere.

Perezida Kagame yari yazamuye Kazura ku ipeti rya Jenerali w'inyenyeri enye mu Gushyingo (11) mu 2019 avuye ku rya Jenerali Majoro – asimbutse irya Liyetona Jenerali – amugira umugaba mukuru w'ingabo z'u Rwanda (RDF), umwanya yakuweho muri Kamena (6) mu 2023.

Mbere yo kugirwa umugaba mukuru wa RDF, Kazura yari umukuru w'ishuri ry'abasirikare bakuru ry'i Musanze mu majyaruguru y'igihugu.

Kuva yakurwa ku mwanya w'umugaba mukuru wa RDF, nta mwanya wihariye uzwi yari yarashyizweho.

Kazura, w'imyaka 61, yavukiye i Burundi ku babyeyi b'impunzi z'Abanyarwanda, aniga amashuri amwe muri icyo gihugu.

Yari uwo mu cyiciro cy'abasirikare bakuru muri RDF barwanye intambara izari inyeshyamba za RPF-Inkotanyi zashoje ku Rwanda mu Kwakira (10) mu 1990 ziharanira gutahuka iwabo, yagejeje RPF ku butegetsi muri Nyakanga (7) mu 1994 nyuma ya jenoside yabaye mu Rwanda.

Ibitabo bimwe bivuga ko muri icyo gihe cy'intambara Kazura hari ubwo yajyaga asemurira Kagame ibyavuzwe mu bitangazamakuru bitangaza mu rurimi rw'Igifaransa.

Kazura anagarukwaho mu birego by'ubwicanyi ku bo mu bwoko bw'Abahutu bishinjwa izari inyeshyamba za RPF-Inkotanyi biri mu gitabo 'In Praise of Blood' cy'Umunyakanadakazi Judi Rever. Leta y'u Rwanda yamaganiye kure ibivugwa muri icyo gitabo.

Ubutegetsi bw'u Rwanda bwakomeje guhakana buvuga ko nta gahunda igambiriwe yigeze ibaho ya RPF yo kwica Abahutu kandi ko bamwe mu basirikare bayo bihoreye bahanwe.

Inyandiko y'Umuryango w'Abibumbye (ONU) yo mu 2013 ivuga ko Kazura afite impamyabumenyi y'icyiciro cya mbere cya kaminuza (licence) mu Cyongereza na siyanse mbonezamubano, na dipolome mu mategeko.

Yanabaye umukuru w'ishuri rya gisirikare rya Gako n'irya Gabiro, aba umukuru wa batayo y'ingabo zirwanira ku butaka n'umukuru w'umutwe urwanisha ibifaru, aba n'umukuru w'umutwe w'abasirikare barinda perezida n'abandi bategetsi bo hejuru, nkuko bigaragara ku rubuga rwa internet rwa minisiteri y'ingabo z'u Rwanda.

Kazura kandi yabaye umujyanama mukuru wa Perezida Kagame mu bya gisirikare n'umutekano, umujyanama wihariye wa minisitiri w'ingabo, n'umuvugizi w'ingabo.

Ku rwego mpuzamahanga, Kazura yabaye umukuru wungirije w'ubutumwa bw'ingabo z'umuryango w'Ubumwe bw'Afurika muri Darfur muri Sudan (AMIS), aba n'umukuru w'ubutumwa bw'ingabo za ONU muri Mali (MINUSMA).

Kazura yize igisirikare mu ishuri ry'intambara rya Nigeria, yiga no kuyobora ingabo mu ishuri ry'abasirikare bakuru ryo muri Zambia. Yanabonye seritifika (certificat) mu buyobozi bwo hejuru yakuye i Ottawa muri Canada, n'indi seritifika nk'iyo yakuye mu mujyi wa La Rochelle mu Bufaransa.

Yahawe imidali n'ibihembo bitandukanye bijyanye n'akazi ke mu gisirikare.

Uretse igisirikare, Kazura yanayoboye ishyirahamwe ry'umupira w'amaguru mu Rwanda (FERWAFA) kuva muri Gashyantare (2) mu 2006 kugeza ubwo yeguraga "ku mpamvu bwite" muri Nzeri (9) mu 2011.

Yafungiwe 'ubwigomeke'

Ubwo yari umukuru wa FERWAFA, Kazura yatawe muri yombi mu 2010 nyuma yo kujya muri Afurika y'Epfo mu mikino y'umupira w'amaguru y'igikombe cy'isi – yari ibereye muri Afurika bwa mbere – nta ruhushya yahawe n'igisirikare rwo kuva mu gihugu.

Yahamagajwe n'igisirikare ava muri Afurika y'Epfo ahita atabwa muri yombi kubera "ubwigomeke", nkuko Jill Rutaremara wari umuvugizi w'ingabo z'u Rwanda yabibwiye BBC icyo gihe.

Uwo wari umuvugizi yahakanye avuga ko gutabwa muri yombi kwa Kazura nta ho kwari guhuriye n'amakuru yavugaga ko yavuganye n'abahoze ari abasirikare bakuru Kayumba Nyamwasa na Patrick Karegeya, bari baherutse guhungira muri Afurika y'Epfo.

Rutaremara yavuze ko nubwo Kazura yari umukuru wa FERWAFA, yari n'umusirikare ugomba kubaha amategeko ya gisirikare. Amakuru avuga ko Kazura yamaze ukwezi kurenga afunze, aza kurekurwa amaze gusaba imbabazi.

Mu mpinduka zari zakozwe mu buyobozi bukuru bw'ingabo muri Mata (4) mu 2010, Kazura yagizwe ukuriye ibikorwa n'amahugurwa mu ngabo z'u Rwanda.

Kazura ni umugabo wubatse ufite abana bane.