Israel yagabye ibitero byo mu kirere muri Gaza ishinja Hamas 'ihonyora rishize amanga ry'agahenge'

Israel yagabye ibitero byo mu kirere mu majyepfo ya Gaza, ishinja Hamas kugaba ibitero, mu cyo yise "ihonyora rishize amanga ry'agahenge".

Umutegetsi wo mu gisirikare cya Israel yavuze ko Hamas yagabye "ibitero byinshi ku ngabo za Israel irenze umurongo w'umuhondo" - avuga ko ako ari agace ingabo za Israel zasubiye inyuma zikajyamo bijyanye n'icyiciro cya mbere cy'amasezerano yagizwemo uruhare n'Amerika.

Hamas yavuze ko yiyemeje kubahiriza agahenge ndetse ishinja Israel kukarengaho inshuro nyinshi no "guhimba inzitwazo zo guha ishingiro [gusobanura] ibyaha byayo".

Ayo masezerano - ari muri gahunda ya Perezida w'Amerika Donald Trump yo kurangiza intambara imaze imyaka ibiri muri Gaza - yatangiye ku itariki ya 10 y'uku kwezi kw'Ukwakira (10).

Mu cyiciro cya mbere cy'agahenge, abashimuswe bose bakiri bazima bararekuwe hamwe na 12 muri 28 mu bapfuye.

Ku ruhande rwayo, Israel yarekuye imfungwa 250 z'Abanye-Palestine zari zifungiye mu magereza yayo ndetse irekura imfungwa 1,718 muri Gaza, hamwe no gusubiza imirambo 15 y'Abanye-Palestine nk'ingurane kuri buri bisigazwa by'Umunya-Israel washimuswe wapfuye.

Igisirikare cya Israel cyatangiye igikorwa cya gisirikare muri Gaza mu gusubiza ku gitero cyo ku itariki ya 7 Ukwakira (10) mu mwaka wa 2023, ubwo abagabo bitwaje imbunda bayobowe na Hamas bicaga abantu hafi 1,200 mu majyepfo ya Israel ndetse bagashimuta abandi 251.

Kuva icyo gihe, minisiteri y'ubuzima iyoborwa na Hamas ivuga ko abantu nibura 68,000 bamaze kwicirwa mu bitero bya Israel muri Gaza. Iyo mibare y'iyo minisiteri ibonwa n'Umuryango w'Abibumbye (ONU) nk'iyo kwizerwa.

Ibyo bitero Israel yagabye i Rafah byabaye hashize amasaha Amerika ivuze ko ifite "amakuru yizewe" ko Hamas irimo gutegura igitero "cyegereje" ku basivile muri Gaza, ivuga ko cyaba ari ihonyora "ritaziguye kandi rikomeye cyane" ry'amasezerano y'agahenge.

Minisiteri y'ububanyi n'amahanga y'Amerika yavuze ko icyo gitero giteganyijwe ku Banye-Palestine "cyabangamira intambwe ikomeye yatewe binyuze mu bikorwa by'ubuhuza".

Amerika nta yandi makuru yatanze muri iryo tangazo - cyangwa ngo ivuge ukuntu ibi byaba ari ihonyorwa ry'agahenge Amerika yagizemo uruhare kemeranyijwe hagati ya Hamas na Israel.

Hamas yahakanye cyane ko nta gitero cyegereje iteganya kugaba, ndetse na yo yashinje Israel gufasha imitwe yitwaje intwaro y'abacyeba (irwanya) ba Hamas muri Gaza.

Ariko Hamas ikomeje gusubizaho ubugenzuzi bwayo kuri Gaza, nyuma y'icyuho cy'ubutegetsi cyasizwe no kuba Israel yarakuye igice cy'ingabo zayo muri Gaza.