Uburusiya bwafunze burundu abasirikare babwo bishe umuryango wose muri Ukraine
Ahavuye isanamu, Getty Images
- Umwanditsi, Hafsa Khalil
- Igikorwa, BBC News
Urukiko rwo mu Burusiya rwakatiye abasirikare babiri babwo gufungwa burundu kubera kwica umuryango w'abantu icyenda mu karere bwigaruriye muri Ukraine, mu rugero rw'imbonekarimwe rw'Uburusiya rwo kuryoza ingabo zabwo ibyaha zishinjwa byo mu ntambara.
Umuryango wose wa Kapkanets wiciwe mu rugo rwawo mu karere ka Donetsk, mu majyepfo ashyira uburasirazuba bwa Ukraine, mu mwaka ushize, wicwa na Anton Sopov, w'imyaka 21, na Stanislav Rau, w'imyaka 28, nkuko abashinjacyaha babivuze. Mu bishwe hari harimo abana babiri.
Icyo gihe uwo muryango wari uri mu birori byo kwizihiza isabukuru y'amavuko, nkuko umuvunyi wa Ukraine Dmytro Lubinets yabivuze umunsi umwe nyuma y'ubwo bwicanyi.
Amakuru amwe y'urwo rubanza ntasobanutse, nko kumenya niba abo basirikare baremeye icyaha, kuko urubanza rwabereye mu muhezo kubera ibanga rya gisirikare, nkuko ibitangazamakuru byo mu Burusiya byabivuze.
Urukiko rwahamije Sopov na Rau kwica Eduard Kapkanets wari ufite imyaka 53, umugore we Tatiana, abahungu babo bakuru n'abagore babo, umwuzukuru wabo w'umukobwa w'imyaka icyenda, umwuzukuru wabo w'umuhungu w'imyaka ine n'undi mwenewabo bafitanye isano ya kure.
Icyo gihe abategetsi bo muri Ukraine bavuze ko bacyeka ko uwo muryango wishwe kubera kwanga guha inzu yawo abo basirikare b'Uburusiya.
Ibiro ntaramakuru TASS bya leta y'Uburusiya byatangaje ko abo bagabo bahamijwe ubwicanyi "butewe n'urwango rushingiye kuri politike, ku ngengabitekerezo, ku bwoko, ku gihugu cyangwa idini".
Umujyi wa Volnovakha wo mu karere ka Donetsk muri Ukraine wigaruriwe n'ingabo z'Uburusiya nyuma y'ibyumweru gusa bugabye igitero gisesuye kuri Ukraine, cyatangiye muri Gashyantare (2) mu mwaka wa 2022. Byinshi mu bice by'uwo mujyi byarashenywe.
Uburusiya buhakana ibirego byose byo gukora ibyaha byo mu ntambara muri Ukraine, nubwo hari ibimenyetso bicukumbuye (simusiga) bibushinja ibyo byaha.
Ibyo birimo nko kurasa ku nyubako yo mu mujyi wa Mariupol yari icumbikiye abantu babarirwa mu magana, kwabaye muri Werurwe (3) mu mwaka wa 2022, n'iyicwa ry'abantu babarirwa mu magana mu mujyi wa Bucha muri ukwo kwezi.
Ingabo z'Uburusiya zinashinjwa kugira ibyumba bikorerwamo iyicarubozo mu bice byo muri Ukraine zigaruriye, aho abasivile n'imfungwa z'intambara bakorerwa iyicarubozo ndetse rimwe na rimwe bakicwa.
Umuryango w'Abibumbye washinje ingabo z'Uburusiya ziri muri Ukraine gufata abagore ku ngufu, iyicarubozo "rikorwa henshi", n'ubwicanyi, ndetse urukiko mpuzamahanga mpanabyaha rwasohoye inyandiko yo guta muri yombi Perezida w'Uburusiya Vladimir Putin.
