Macron avuga ko kugira ngo Ukraine yinjire muri EU bizafata imyaka ibarirwa muri za mirongo

Perezida w'Ubufaransa Emmanuel Macron yavuze ko bizafata igihe cy'imyaka ibarirwa muri za mirongo kugira ngo Ukraine yemerwe nk'umunyamuryango w'Ubumwe bw'Uburayi (EU/UE).

Mu ijambo yagejeje ku nteko ishingamategeko ya EU ku cyicaro cyayo i Strasbourg mu majyaruguru ashyira uburasirazuba bw'Ubufaransa, yumvikanishije ko ahubwo Ukraine ishobora kujya "mu muryango usa nk'uw'Uburayi" mu gihe itegereje icyemezo.

Perezida Macron yavuze ko ibi byatuma ibihugu bitari ibinyamuryango bya EU bishobora kwinjira mu rwego rw'umutekano rw'Uburayi mu bundi buryo.

Avuze ibi mu gihe imirwano ikaze ikomeje mu karere ka Donbas ko mu burasirazuba bwa Ukraine, aho Uburusiya burimo kugerageza gufata.

Umutegetsi wo ku rwego rwo hejuru wo mu gisirikare cy'Amerika yavuze ko intambwe Uburusiya burimo gutera ari "nk'intambwe ya kilometero igizwe n'umubare umwe [iri munsi ya kilometero 10]".

Umutegetsi wo mu karere ka Luhansk muri Ukraine yavuze ko harimo kuba imirwano ikaze.

Mu kwezi kwa kabiri uyu mwaka ni bwo Ukraine yatangiye gusaba kuba umunyamuryango wa EU, hashize iminsi ine Uburusiya buyigabyeho igitero.

Macron yagize ati: "Twese turabizi neza ko igikorwa cyo kwemerera [Ukraine] kwinjira [muri EU] mu by'ukuri cyafata imyaka myinshi, bishoboka ko igera muri za mirongo".

Yongeyeho ati: "Uko ni ukuri, keretse dufashe icyemezo cyo kugabanya ibisabwa mu kwinjira. No kongera gusubiramo ubumwe bw'Uburayi".

Macron yavuze ko "umuryango uteganye [usa] n'uw'Uburayi" ari wo ahubwo ushobora gutekerezwaho, aho guhagarika amategeko akaze ya EU ajyanye no kwemera umunyamuryango mushya, ari ukugira ngo ubusabe bwa Ukraine bwihutishwe.

Yavuze ko bwaba ari "uburyo bwo guha icyerekezo ibihugu biri mu Burayi [hagendewe ku ho biherereye ku ikarita] kandi bihuje indangagaciro natwe".

Yavuze ayo magambo nyuma gato yuko Perezida w'akanama k'Uburayi Ursula von der Leyen atangaje ko mu kwezi kwa gatandatu ubuyobozi bukuru bwa EU buzatangaza igitekerezo cyabwo cy'ibanze ku busabe bwa Ukraine bwo kuba umunyamuryango.

Ku wa mbere, abategetsi ba Ukraine bemeje ko iki gihugu cyahaye EU igice cya kabiri cy'ubusabe bwacyo bwo kwinjira muri EU.

BBC ntibazwa ibivuye ku zindi mbuga.

Ubusanzwe bifata imyaka kugira ngo ibihugu bibe byakwemererwa kuba ibinyamuryango bya EU.

Ibihugu bisaba kwinjira muri EU bigomba kugaragaza ko byujuje ibintu byinshi bisabwa - birimo nko kubahiriza demokarasi no kugira ubutegetsi bugendera ku mategeko, ndetse no kugira ubukungu buhamye.

Perezida wa Ukraine Volodymyr Zelensky yumvikanishije ko EU ishobora gukoresha uburyo bwihariye ikemerera Ukraine guhita iba umunyamuryango wa EU, ariko ibi ntibyabaye.

Nyuma yaho ku wa mbere, Perezida Macron yakoze uruzinduko rwe rwa mbere rwo mu mahanga kuva yatorerwa manda ya kabiri, yerekeza i Berlin mu Budage, mu biganiro na 'Chancellor' Olaf Scholz ku buryo EU irimo kwitwara ku gitero Uburusiya bwagabye kuri Ukraine.

Mu kiganiro n'abanyamakuru mbere yuko agirana ibiganiro na Macron, Scholz yavuze ko intambara y'ubushotoranyi y'Uburusiya yatumye ubufatanye hagati y'Ubufaransa n'Ubudage buba ingirakamaro kurushaho.

Yagize ati: "Iki [iyi ntambara] ni ikintu gituma twumirwa ariko kiduhuriza hamwe kuko tugomba gukorera hamwe.

"Ntibishoboka ko imipaka yo mu Burayi ishobora kurengwaho mu rugomo".

EU irimo kugerageza kumvikana ku cyiciro cya gatandatu cy'ibihano ku Burusiya, kirimo no guhagarika gutumiza ibitoro mu Burusiya, mu gihe hari ugutinda kubyemeza kw'ibihugu bimwe bidakora ku nyanja byo mu Burayi bwo hagati.

Ariko Hongrie (Hungary) yanze gushyigikira ikomanyirizwa ry'ibitoro bivuye mu Burusiya, ivuga ko iryo komanyirizwa ari "igisasu kirimbuzi" ku bukungu bwayo.

Ku wa mbere, Perezida w'akanama k'Uburayi von der Leyen yerekeje mu murwa mukuru Budapest wa Hongrie kugerageza gushakira umuti uko kutumvikana.

Nyuma y'ibiganiro, yavuze ko "twateye intambwe, ariko hari undi murimo ucyeneye gukorwa".