Ukraine: Maj. Gen Vladimir Frolov wa Russia wiciwe ku rugamba yiswe 'intwari'
Ahavuye isanamu, EPA
Ingabo z'Uburusiya zirimo kurasa ibice bitandukanye muri Ukraine zikoresheje indege n'imbunda zirasa imizinga. Mu gihe abasirikare ba Ukraine bagikomeje kurwana ku gace gasigaye k'umujyi wa Mariupol.
Mu buryo butunguranye umujyi wa Lviv uri mu burengerazuba bwa Ukraine, kugeza ubu wari ahantu hatarashweho bikomeye n'ingabo z'Uburusiya, none kuwa mbere warashweho ibisasu.
Undi mu jenerali w'Uburusiya yishwe
Maj. Gen Vladimir Frolov wari umugaba wungirije w'umutwe wa 8 w'ingabo z'Uburusiya yashyinguwe kuwa gatandatu nyuma yo kugwa ku rugamba muri Ukraine.
Mu kumushyingura i St Petersburg, Vladimir Frolov yongeye kwitwa intwari nyuma y'uko aguye mu mirwano mu gace ka Donbas mu burasirazuba bwa Ukraine.
Uyu ni undi musirikare mu bakomeye mu ngabo z'Uburusiya uguye mu bitero muri Ukraine, ibitero Perezida Vladimir Putin aheruka kuvuga ko birimo kugenda uko byateganyijwe.
Mu itangazo ryatanzwe na Alexander Beglov guverineri wa St Petersbourg, yavuze ko Gen Vladimir Frolov "yatanze ubuzima bwe kugira ngo abana, abagore, n'abashaje i Donbas batazongera kumva za bombe ziturika".
Uburusiya buvuga ko muri ako gace Ukraine ihakora ibikorwa byo kwibasira abavuga ururimi rw'ikirusiya, ibyo Ukraine ihakana.
Mu mpera z'ukwezi kwa gatatu, abategetsi b'iburengerazuba bavuze ko kugeza icyo gihe Uburusiya bwari bumaze gutakaza abasirikare barindwi bo ku rwego rwa jenerali. Uburusiya ntibwigeze bwemeza uwo mubare
Ahavuye isanamu, Reuters
Abatuye Luhansk basabwe guhunga bigishoboka
Nyuma yo gutsindwa hafi y'umurwa mukuru Kyiv, Uburusiya bwashyize imbaraga mu gufata uduce twa Luhansk na Donetsk tugize akarere ka Donabas mu burasirazuba.
Nubwo imirwano yeruye isa n'itaratangira, ibisasu by'Uburusiya birasirwa kure bikomeje kwitura ku bice bitandukanye by'aka gace.
Ingabo z'impande zombi ubu ziritegura urugamba rushobora gusobanura ibintu muri iyi ntambara.
Abatuye mu mujyi wa Sievierodonetsk - ugenzurwa na leta ya Kyiv muri Donbas -bari kwiga kuba mu byashenywe n'intambara.
Hagati aho abatuye mu gace ka Luhansk, naho mu burasirazuba, basabwe guhunga vuba bigishoboka, nk'uko ibiro ntaramakuru UNIAN bya Ukraine bibivuga.
Umukuru wa Luhansk Sergei Gaidai yasubiwemo avuga ati: "Mu cyumweru gitaha bishobora kugorana. Iyi ishobora kuba inshuro ya nyuma tubashije kubakiza."
Mbere y'iyi ntambara, Perezida Putin yatangaje ko Luhansk na Donetsk ari leta zigenga zemewe n'Uburusiya.
Ingabo za Ukraine muri aka gace zimaze igihe zitegura intambara ikomeye yo kurwanya ibitero by'Uburusiya.
Bwa mbere, abahunguka baruse abahunga Ukraine
Ku nshuro ya mbere kuva iyi ntambara itangiye, abahunguka batashye muri Ukraine ari benshi bava muri Pologne kurusha abahunga.
Umubare w'abahunguka - baba abaje gusura ababo cyangwa abatahutse mu ngo zabo - ukomeje kugenda wiyongera.
Abashinzwe imipaka ya Pologne berekanye ko kuwa gatandatu gusa abagera ku 22,000 basubiye muri Ukraine mu gihe abagera ku 19,200 bayihunze.
Bamwe bagaruka kureba imiryango yabo, wenda by'iminsi micyeya, kandi bakaguma hafi y'umupaka mbere yo gusubira mu buhungiro.
Abandi barimo gutahuka bagasubira iwabo, nubwo baburiwe n'abategetsi nk'umukuru wa Kyiv Vitali Klitschko ko kugaruka muri uyu mujyi bigiteye impungenge.
Amakamyo y'Uburusiya yirukanywe Iburayi
Umurongo muremure w'amakamyo uri hafi y'umupaka wa Pologne na Belarus mu gihe abashoferi b'imodoka nini zo mu Burusiya na Beralus bagerageza kuva mu bihugu bigize Ubumwe bw'Uburayi (EU) mbere y'itariki ntarengwa kubera ibihano.
Itariki ntarengwa yo kuwa gatandatu yageze hari imirongo igera kuri 80km y'imodoka zihagaze harimo izimaze amasaha 33 zitagenda.
Ahavuye isanamu, Reuters
EU yaciye amakamyo yo mu Burusiya na Belarus ku butaka bwayo - uretse atwaye imiti, cyangwa petrol - kuhinjira cyangwa no kuhaguma.
Iki ni kimwe mu bihano byafatiwe Uburusiya kubera ibitero kuri Ukraine.
Amashusho ya Drones yatangajwe n'ibiro ntaramakuru Reuters yerekanye iyo mirongo miremire mbere y'uko igihe ntarengwa kigera.
EU hamwe n'ibindi bihugu by'iburengerazuba byafatiye ibihano Uburusiya n'inshuti yabwo Belarus. Ibi bihugu nabyo byarasubije bifata ibihano nk'ibyo.
Andi makuru:
- Ingabo z'Uburusiya zarashe inyubako mu mujyi hagati wa Kharkiv, hapfa abantu batanu abagera kuri 13 barakomereka, nk'uko abashinzwe ubuzima babivuga. Uyu mujyi uri hafi y'umupaka w'Uburusiya washenywe bikomeye n'ibitero byabwo
- Umunyamakuru Joe Inwood wa BBC uri i Dnipro mu burasirazuba bwa Ukraine avuga ko intabaza ziburira ibisasu by'abarusiya ziri kumvikana henshi muri ako gace, mu gihe biteguye imirwano ikomeye muri Donbas
- Umujyi wa Mykolaiv uri mu majyepfo n'uduce tuwegereye byarashweho bikomeye muri weekend nk'uko umukuru wawo Vitaliy Kim yabibwiye BBC. Avuga ko ingabo za Ukraine zaho zananije iz'Uburusiya gusatira umujyi wo ku cyambu wa Odesa
- Minisitiri w'intebe wa Ukraine Denys Shymhal yavuze ko umujyi wa Mariupol "utarafatwa" kandi ingabo za Ukraine zihari "zizarwana kugeza ku iherezo". Uburusiya bwari bwahaye izo ngabo nyirantarengwa yo kumanika intwaro ntizicwe yo ku cyumweru nijoro, ariko zarabyanze
- Abakozi bagera kuri 40 b'ubwato biravugwa ko bapfuye, abandi babarirwa muri za mirongo bagakomereka cyangwa bakabura, nyuma y'uko ubwato rutura bw'intambara Moskva burohamywe bumaze kuraswa, nk'uko Ukraine ibivuga. Uburusiya buvuga ko ubwo bwato bwarohamye kubera impanuka kandi ntibuvuga umubare w'abahasize ubuzima, gusa bwerekanye amashusho y'abarokotse
