George Floyd: Guhamwa n'icyaha kwa Derek Chauvin ni intambwe ikomeye itewe – Biden

Perezida w'Amerika Joe Biden yavuze ko guhamwa n'icyaha kw'uwahoze ari umupolisi cyo kwica George Floyd "bishobora kuba intambwe ikomeye itewe mu rugendo rwerekeza ku butabera muri Amerika".

Ariko yaburiye ati: "Ntabwo dushobora kugarukira hano".

Uwari umupolisi w'umuzungu Derek Chauvin yafashwe amashusho apfukamye ku ijosi rya Bwana Floyd, Umunyamerika ukomoka muri Afurika, mu gihe kirenga iminota icyenda, biteza imyigaragambyo yo kwamagana irondaruhu yitabiriwe n'imbaga y'abantu.

Ku wa kabiri, yahamwe n'icyaha cy'ubwicanyi bwo mu cyiciro cya kabiri, ubwicanyi bwo mu cyiciro cya gatatu no kwica umuntu.

Gukatira Chauvin igihano bishobora kuba mu mezi abiri ari imbere, ndetse birashoboka ko yamara imyaka ibarirwa muri za mirongo ari muri gereza. Byitezwe ko azajurira.

Mu kiganiro cyo kuri telefone ubwo yahamagaraga abo mu muryango wa Bwana Floyd nyuma yuko bitangajwe ko Chauvin ahamwe n'icyaha, Perezida Biden yumvikanye agira ati: "Nibura ubu hari ubutabera bucye".

Mu ijambo ryaciye kuri televiziyo nyuma yaho gato, Bwana Biden yavuze ko icyemezo nk'icyo cy'urukiko ari "imbonekarimwe cyane".

Yagize ati: "Ntabwo dushobora kuva muri iki gihe cyangwa ngo turebe ku ruhande twibwira ko umurimo urangiye. Tugomba kukireba nkuko twabigenje tureba ya minota icyenda n'amasengonda 29".

Visi Perezida Kamala Harris yashishikarije abagize inteko ishingamategeko gutora bemeza umushinga w'itegeko ugamije kuvugurura ibijyanye na polisi muri Amerika.

Madamu Harris yagize ati: "Uyu mushinga w'itegeko ni umwe mu murage wa George Floyd. Uyu ni umurimo umaze igihe kirekire cyane utegerejwe [ngo ukorwe]".

Guhamwa n'icyaha byakiriwe gute kundi?

Abantu bateraniye hanze y'icyumba cy'urukiko no mu masangano y'imihanda mu mujyi wa Minneapolis aho Bwana Floyd yiciwe, bishimira icyo cyemezo cy'urukiko.

Abantu bateye hejuru mu byishimo, abashoferi bavuza amahoni y'imodoka ndetse hari n'abantu bahagaritse urujya n'uruza rw'ibinyabiziga, bavugira hejuru bati: "George Floyd" n'"Ibirego bitatu byose", bakomoza ku birego bitatu Bwana Chauvin yahamwe na byo.

Kenneth Nwachi, w'imyaka 21, yagize ati: "Ni umunsi mwiza muri Minneapolis. Ni umugisha".

Umwe mu bahatuye yabwiye ibiro ntaramakuru Associated Press ko yumva afite ishimwe ku mutima kandi aruhutse, mu gihe undi we yagize ati: "Hari ubutabera runaka burimo kuza".

Imbaga y'abantu yanateraniye no mu yindi mijyi yishimira icyemezo cy'urukiko.

Ariko banavuze ko hakiri byinshi byo gukora.

Ni gacye cyane abapolisi muri Amerika bagiye bahamwa n'icyaha cy'impfu zibereye mu maboko yabo - iyo byabaga binabayeho ko baregwa.

Iki cyemezo cy'urukiko ahanini kiri kubonwa nk'ikigaragaza ukuntu ubucamanza bw'Amerika buzajya bwitwara ku manza nk'izo mu gihe kiri imbere.

Mu kiganiro n'abanyamakuru cyateguwe n'umuryango wa Floyd, umuvandimwe we Philonise Floyd yagize ati: "Uyu munsi, dushoboye kongera guhumeka".

Ben Crump, wunganira mu mategeko umuryango wa Floyd, yavuze ko guhamwa n'icyaha kwa Chauvin kubaye "igihe cy'impinduka ikomeye mu mateka" y'Amerika.

Yanditse kuri Twitter ati: "Ubutabera bugezweho mu buryo bubabaje bwashyize buraboneka".

Itsinda ryunganira Chauvin nta cyo riratangaza ku cyemezo cy'urukiko, ariko byitezwe ko rikijuririra.

Mbere gato y'icyo cyemezo cyo ku wa kabiri, umupolisi muri leta ya Ohio yishe arashe umwirabura w'umukobwa w'imyaka 16 ubwo uwo mupolisi yari atabajwe byihutirwa kuri telefone ku hari habaye kugerageza gutera icyuma.