Tchad: Idriss Déby yatsindiye manda ya gatandatu mu gihe igisirikare kirwana n'inyeshyamba

Perezida wa Tchad w'igihe kirekire Maréchal Idriss Déby Itno yatsinze amatora n'amajwi hafi 80%, nkuko ibyavuye mu matora by'ibanze bibigaragaza.

Bimushyize mu nzira yo gutangira manda ya gatandatu yikurikiranya, akomereza ku myaka 30 amaze ku butegetsi

Mu murwa mukuru N'Djamena abamushyigikiye bishimiye iyo ntsinzi.

Umwe mu bamushyigikiye, wemeza ko Tchad izarushaho kugira umutekano ku yindi manda ya Bwana Déby, yagize ati:

"Umukandida wacu Idriss Déby Itno yatsinze mu cyiciro cya mbere cy'amatora ya perezida. Ibi turabibona nk'intsinzi ebyiri kuko yanashoboye kwirukana abakora iterabwoba bava ku butaka bwacu".

"Turashaka amahoro, nta kindi [dushaka] kitari amahoro. Abantu bacu bakomeze gutuza, kuko igihe cyose Maréchal wacu [Déby] akiriho, tuzabaho mu mutekano".

Abakuru b'abatavuga rumwe n'ubutegetsi banze kwitabira ayo matora.

Uwari ukuriye ibikorwa byo kwamamaza Bwana Déby yavuze ko Perezida yajyaga kwishimana n'abamushyigikiye, ariko ubu ari kumwe n'ingabo barwanya intagondwa.

Igisirikare cya Tchad cyavuze ko cyasubije inyuma inyeshyamba zari zikataje mu mpera y'icyumeru gishize, cyicamo izirenga 300 - umubare udashobora kugenzurwa mu buryo bwigenga.