Coronavirus: Tanzania yafunguye ikirere cyayo ku ndege z’abagenzi

Ikigo cya Tanzania gishinzwe iby'indege za gisiviri cyavanyeho amabwiriza yabuzaga indege zitwara abagenzi kugwa muri iki gihugu.

Ingendo z'indege zitwara abantu zarahagaritswe henshi ku isi, mu kwirinda ikwirakwira rya coronavirus.

Iki kigo cya Tanzania cyatangaje kuri Twitter ko ibi bitewe no "kugabanuka kw'abandura Covid-19".

Kuwa mbere, minisitiri w'ubuzima wa Tanzania yavuze ko abaje mu gihugu bazajya basuzumwa ibimenyetso bya Covid-19 aho binjiriye mbere yo gukomeza mu gihugu.

Mu minsi ishize, Perezida John Magufuli wa Tanzania yavuze ko igihugu kiri kwitwara neza mu kurwanya iki cyorezo, bivugwa ko ibi byatumye abaminisitiri batangira gusubiza ibintu uko byahoze.

Urwego rw'ubukerarugendo ni rwo rwa kabiri mu byinjiriza Tanzania imari nini nyuma y'ubuhinzi, rukaba rwarazahaye cyane kubera iki cyorezo.

Minisitiri ushinzwe ubukerarugendo yavuze ko igihugu kiri kongera kubufungura nyuma yo kumenya ko hari ibihugu byateguye ingendo zigana muri Tanzania.

Leta ya Tanzania ariko ishinjwa kudatanga amakuru buri munsi y'uko icyorezo cya coronavirus kifashe mu gihugu.

Hari ingamba zimwe zafashwe zibuza amakoraniro y'abantu benshi.

Gusa Bwana Magufuli yatsimbaraye ko nta gufunga ibikorwa byose (lockdown) bigomba kubaho, kandi abajya mu nsengero bagomba gukomeza kujya gusenga.