Merch sydd ag alergedd at yr oerfel yn gobeithio am 'fywyd normal'

Mae corff Amber Woodward yn ymateb os yw'r tymheredd yn gostwng yn is na 12 graddPA Media

Mae corff Amber Woodward yn ymateb os yw'r tymheredd yn gostwng yn is na 12 gradd

Mae merch 16 oed o'r gogledd sydd ag alergedd at yr oerfel, ac sy'n cael brech pan mae'r tymheredd yn is na 12 gradd, yn gobeithio y bydd ymchwil newydd yn ei helpu i fyw "bywyd normal".

Yn 2022 fe ddechreuodd Amber Woodward, sy'n byw yn Abergele, Sir Conwy, gael brech goch oedd yn cosi pryd bynnag roedd hi mewn tymheredd oer.

I ddechrau roedd ei meddyg teulu'n awgrymu mai ymateb i lygredd aer oedd hi, ond ar ôl i Amber ymchwilio i'w symptomau daeth o hyd i alergedd prin o'r enw cold urticaria.

Aeth yn ôl at y meddyg ychydig wythnosau'n ddiweddarach a chafodd ei chyfeirio at ddermatolegydd a gadarnhaodd bod ganddi'r cyflwr prin yma yn 2023.

Er iddi gael gwrth-histaminau (antihistamines) dyw ei chyflwr ddim wedi gwella.

Mae ei chroen yn ymateb hyd yn oed pan mae gwynt oer yn yr haf neu wrth iddi ddod allan o ddŵr - sy'n arwain ati'n gwrthod gwneud rhai pethau gyda'i ffrindiau.

Mae'n aml yn teimlo'n annifyr yn ei gwaith, fel gweinyddes rhan-amser, ac yn yr ysgol pan mae ei chroen yn ymateb wrth iddi gerdded yn yr awyr agored.

Mae nawr yn bwriadu cael chwistrelliadau o wrth-histaminau bob pedair wythnos ac mae'n gobeithio y bydd ymchwil yn y dyfodol yn rhoi'r cyfle iddi wneud "pethau normal".

'Does dim gwella'

"Does dim gwella, a dwi bob amser yn ofnus achos mae llawer o bobl wedi dweud eu bod wedi cael sioc anaffylactig ar hap," meddai Amber.

"Mae angen i mi wisgo leggings o dan fy nillad drwy'r amser really, heblaw am yn yr haf.

"Dwi just isio gallu gwneud pethau normal," meddai, "a chael bywyd normal heb orfod poeni am y peth."

brech ar wyneb AmberPA Media

Mae'r cyflwr wedi effeithio yn fawr ar sawl agwedd o fywyd Amber

Dechreuodd Amber ymateb yn wahanol i'r oerfel yn 2022 a byddai brech yn ymddangos ar rannau o'i chorff a byddai'n cosi'n ddifrifol.

Er i'w meddyg teulu amau bod ganddi'r cyflwr prin fe gafodd ei chyfeirio at ddermatolegydd, ond wrth iddi aros am apwyntiad roedd y frech yn dal i ymddangos bron yn ddyddiol.

Dechreuodd ei mam, Dawn Woodward, "boeni'n fawr".

Dywedodd Amber ei bod wedi cael "sioc" gan ei fod yn alergedd prin ond ei bod yn falch i wybod beth oedd yn ei achosi.

Mae'n falch hefyd o gael "meddyginiaeth gwrth-histamin ar ei gyfer" ond ei bod yn enwedig o "hapus bod rhywun yn credu fi".

'Fy ffrindiau bob amser yn trio cynhesu fi'

Yn anffodus dyw ei symptomau heb wella ers iddi gymryd gwrth-histeminau.

Ond mae'n gobeithio cael chwistrelliadau bob pedair wythnos nawr mewn ymgais i helpu ei symptomau.

"Mae fy ffrindiau allan o hyd, ac maen nhw bob amser yn gwahodd fi ond dydw i ddim really'n gallu mynd allan... felly dwi'n teimlo 'mod i'n cael fy ngadael allan.

"Ond mae fy ffrindiau bob amser yn trio cynhesu fi, neu mynd i nôl siocled poeth," meddai.

Wrth edrych tua'r dyfodol mae Amber yn gobeithio y bydd llawer mwy o ymchwil i'r mater ac mae'n gobeithio y bydd mwy o feddyginiaethau ar gael.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [email protected] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig