Arestio pump ar ôl i fachgen 17 oed farw yn Abertridwr
Cafodd yr heddlu eu galw i Stryd Francis Isaf yn Abertridwr brynhawn Iau
- Cyhoeddwyd
Mae pump o bobl wedi cael eu harestio ac ymchwiliad llofruddiaeth wedi dechrau yn dilyn marwolaeth bachgen 17 oed yn sir Caerffili.
Cafodd plismyn eu galw i Stryd Francis Isaf yn Abertridwr tua 17:45 ddydd Iau ar ôl adroddiadau fod bachgen yn ei arddegau wedi cael ei anafu'n ddifrifol.
Cafodd y bachgen lleol 17 oed ei ddatgan yn farw yn y fan a'r lle ac mae ei deulu wedi cael gwybod ac yn cael eu cefnogi gan swyddogion arbenigol, meddai'r heddlu.
Mae tri dyn - un 26 oed o Lundain, un 24 oed o Abertridwr ac un 18 oed o Gaerdydd - wedi cael eu harestio ar amheuaeth o lofruddiaeth.
Mae dwy fenyw - un 28 oed o Henffordd ac un 24 oed o Senghennydd - wedi cael eu harestio ar amheuaeth o gynorthwyo troseddwr.
Mae'r pump yn parhau yn y ddalfa, meddai'r llu.
'Pwysig nad yw pobl yn dyfalu'
Dywedodd yr uwch swyddog ymchwilio, y Ditectif Brif Arolygydd Jitka Tomkova-Griffiths "y bydd mwy o swyddogion yn yr ardal wrth i ymholiadau barhau".
"Mae'n bwysig nad yw pobl yn dyfalu pwy yw y rhai dan sylw gan y gallai hyn gyflwyno problemau i'n hymchwiliad," meddai.
"Os oes gan unrhyw un wybodaeth, siaradwch â'n swyddogion neu cysylltwch â ni yn y ffordd arferol."
Dywedodd Darren Williams fod y stryd fel arfer yn un "dawel iawn, iawn"
Mae Darren Williams, 55, yn byw ar Stryd Francis Isaf a dywedodd iddo sylwi ar "oleuadau'n fflachio" gyntaf wrth iddo gerdded i lawr lôn gerllaw.
"Ro'n i'n meddwl bod rhywbeth wedi digwydd i rywun yn y stryd," meddai.
"Wnes i sylwi ar bresenoldeb yr heddlu a dywedodd rhywun fod digwyddiad wedi cymryd lle."
Dywedodd fod y stryd fel arfer yn un "dawel iawn, iawn" heb "dim trafferth o gwbl".
"Mae'n bwysig fod ein cymuned ni'n teimlo'n saff 'ŵan a bod ni'n dod at ein gilydd," meddai'r cynghorydd John Eryl Roberts
Dywedodd y cynghorydd lleol John Eryl Roberts: "Dydi Cwm Aber ddim wedi arfer clywed newyddion fel hyn.
"Mae o'n sioc ac mae o'n dristwch mawr hefyd.
"Mae'n meddyliau ni a calonnau ni'n mynd allan i'r teulu.
"Mae'n bwysig fod ein cymuned ni'n teimlo'n saff 'ŵan a bod ni'n dod at ein gilydd."
"Dylai dim teulu orfod mynd trwy hyn," meddai'r cynghorydd Charlotte Bishop
Ychwanegodd y cynghorydd Charlotte Bishop ei bod hi a'r gymuned "mewn sioc".
"Dydw i ddim yn gallu credu fe - dwi ddim wedi clywed am unrhyw beth fel hyn yn digwydd [yn Abertridwr]," meddai.
