Un person yn yr ysbyty wedi gwrthdrawiad awyren ym Mhowys
Cafodd yr "awyren ysgafn" ddamwain ddydd Sadwrn, 27 Rhagfyr
- Cyhoeddwyd
Fe wnaeth ambiwlans awyr gludo person i'r ysbyty ddydd Sadwrn, yn dilyn gwrthdrawiad awyren yn Nhalgarth, yn ne Powys.
Cafodd Gwasanaeth Tân ac Achub Canolbarth a Gorllewin Cymru eu galw i'r digwyddiad am tua 11:38, 27 Rhagfyr.
Dywedodd y gwasanaeth tân bod awyren ysgafn wedi glanio mewn cae.
Ychwanegodd bod criwiau o orsafoedd tân Talgarth a Chrucywel wedi bod ar y safle yn defnyddio offer torri hydrolig i dynnu'r peilot allan o'r awyren.
Roedd tynnu'r peilot allan o'r awyren yn "arbennig o heriol", meddai'r gwasanaeth tân
Cafodd y peilot ei dynnu allan o'r awyren yn llwyddiannus, a'i gario i Ambiwlans Awyr, cyn ei gludo i'r ysbyty, meddai'r gwasanaeth tân.
Disgrifion nhw ryddhau'r peilot o'r awyren fel gweithred "arbennig o heriol", gan fod pibellau tanwydd yn rhedeg trwy siasi'r awyren a thanwydd yn cael ei storio yn ei hadenydd.
Roedd Heddlu Dyfed-Powys, y Gwasanaeth Ambiwlans a'r Ambiwlans Awyr hefyd yn bresennol a gadawodd y criwiau'r lleoliad am 13:52.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
