Eisteddfod Pontypridd yn ysbrydoli menter newydd yn y dref

Ddydd Sadwrn fe fydd gweithdy cyntaf cwmni theatr newydd i ieuenctid yn Rhondda Cynon Taf.

Y syniad yw dod â phobl ifanc rhwng 14-24 oed at ei gilydd gyda'r bwriad o berfformio yn y Gymraeg, boed hynny'n gyngherddau, sioeau cerdd neu recordiau.

Daeth y syniad am y fenter yn ystod Eisteddfod Genedlaethol Pontypridd yn 2024.

Y nod mawr cyntaf yw creu sioe gerdd newydd sbon, a'i pherfformio rhywbryd yn 2027.

Y tri sy'n gyfrifol am y syniad o greu theatr ieuenctid yn yr ardal yw Jên Angharad (Prif Weithredwr Cymuned Artis yng Nghanolfan YMa, Pontypridd), Osian Rowlands (Prif Weithredwr Menter Iaith Rhondda Cynon Taf) a Huw Meredydd, neu'r cerddor Huw M.

Dywedodd Huw wrth Cymru Fyw bod y syniad wedi cychwyn wedi i gannoedd o bobl ymuno â chôr Eisteddfod Pontypridd yn 2024.

Meddai: "O'n i yn y côr ar gyfer y gymanfa a sioe gerdd Nia Ben Aur, ac fe wnaeth hynny dynnu pobl at ei gilydd o bob ran o sir Rhondda Cynon Taf.

"Roedd yr ysbryd cymunedol yn ofnadwy o gry', ac roedden ni'n meddwl adeiladu ar hynny gyda rhywbeth mwy parhaol."

Daeth arian gan Gyngor Celfyddydau Cymru er mwyn cynorthwyo i sefydlu'r theatr, ac mae'r tri yn ddiolchgar iawn am hynny.

"Mewn sir fel yma mae llai o gyfleoedd i ddefnyddio'r Gymraeg y tu allan i'r ysgol nag mewn ambell sir arall, felly rydan ni'n trio creu gofod i berfformio yn y Gymraeg.

"Dim ond ers rhyw dair wythnos ydan ni wedi cyhoeddi'r fenter, ac fe fydd y cyfarfodydd cyntaf ar 14 a 21 Chwefror. Mae'r ymateb eisoes yn galonogol.

"Mae'n gyfle da i ddod â rhywbeth newydd i'r ardal yma a rhoi ffocws i bobl."

"Ysbrydoliaeth fawr arall oedd Cwmni Theatr Ieuenctid Maldwyn.

"Maen nhw wedi bod wrthi ers 45 mlynedd bellach yn rhoi cyfleoedd i bobl o bob oed i berfformio.

"Maen nhw wedi rhoi rhywbeth gwerthfawr i genedlaethau o bobl eu hardal.

"Nod mawr i ni fydd creu sioe gerdd newydd sbon yn y Gymraeg a'i pherfformio hi yn 2027. Ry'n ni wedi bod yn trafod gyda'r nifer o theatrau ardderchog sydd yma o fewn y sir, ond gobeithio bydd cyfle hefyd i wneud perfformiadau eraill llai.

"Fel arfer mae nifer o wyliau yn yr ardal dros y flwyddyn gron, ac fe fyddwn ni'n chwilio am gyfleoedd i berfformio drwy'r flwyddyn.

"Mae recordio caneuon hefyd yn rhywbeth sy'n apelio er mwyn creu gwaddol."

Mae YMa yn awyddus i glywed gan unrhyw un sydd â diddordeb ymuno gyda'r fenter, neu sydd am gynnig cymorth.

Gallwch wneud hynny drwy fynd i wefan YMa, dolen allanol.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.