Pryder bod cynnwys cyrsiau gwyddoniaeth yn 'hen ac amherthnasol'

Mae'n "hynod o siomedig" y bydd rhai plant yng Nghymru yn dilyn cyrsiau gwyddoniaeth sy'n "hen ac amherthnasol", yn ôl y Gymdeithas Gemeg Frenhinol.

O fis Medi 2026 fe all ysgolion gyflwyno cymwysterau gwyddoniaeth newydd fel rhan o'r cwricwlwm i Gymru.

Ond ar ôl i gynllun fyddai'n cael gwared ar bynciau gwyddoniaeth unigol gael ei ohirio, bydd gwersi cemeg, ffiseg a bioleg yn gallu parhau tan o leiaf 2031.

O ganlyniad, mae'r corff arholi, CBAC wedi gwneud ychydig o newidiadau i gwricwlwm y pynciau gwyddoniaeth hynny.

Ond mae'r Gymdeithas Gemeg Frenhinol wedi dweud nad yw'n mynd yn ddigon pell a bod rhannau o'r cwrs yn amherthnasol erbyn hyn.

Dywedodd Delwen McCallum o'r gymdeithas fod angen tynnu rhai pethau o'r cwricwlwm a chyflwyno cynnwys newydd i'r pynciau gwyddoniaeth ar wahân, fel cynaladwyedd a newid hinsawdd

"Mae'r gyrfaoedd yma fod i dyfu 30% yn y wlad yma yn y blynyddoedd nesaf a fydd plant Cymru ddim efo gymaint o wybodaeth a chyfle os 'di nhw ddim yn astudio'r ardaloedd yma," meddai.

Mae'r holl gyrsiau TGAU sy'n cael eu cynnig i ddisgyblion rhwng 14 ac 16 oed yng Nghymru wedi eu hadolygu a'u diweddaru fel rhan o'r cwricwlwm newydd sy'n cael ei gyflwyno.

Mae'r cynllun gwreiddiol i gael gwared â'r pynciau gwyddoniaeth ar wahân wedi cael ei oedi am y tro gan y rheoleiddiwr, Cymwysterau Cymru.

Bydd yna gymwysterau newydd - TGAU dwbl gwyddoniaeth a sengl - yn cael eu cyflwyno o fis Medi'r flwyddyn nesaf.

Ond fe all ysgolion ddewis bod eu disgyblion yn parhau i astudio ffiseg, bioleg a chemeg fel cyrsiau ar wahân.

Dywedodd Aled Mason, sy'n bennaeth gwyddoniaeth yn Ysgol Bryn Tawe ar gyrion Abertawe, fod yna farn gymysg i barhau i gynnig y cwrs triphlyg gwyddoniaeth.

"Rwy'n gwybod beth mae cymwysterau Cymru yn ceisio ei wneud, yn clymu'r gwyddorau gyda'i gilydd i ddangos bod 'na gysylltiadau," meddai.

"Ond mae gwyddoniaeth yn dri phwnc gwahanol yn fy marn i ac mae nifer yn cytuno ac anghytuno gyda hynny… ac i fi ddylen nhw barhau ar wahân."

Dywedodd rhai o ddisgyblion TGAU Ysgol Bryn Tawe eu bod yn mwynhau cynnwys y cwricwlwm presennol.

Dywedodd Gwenan, 16, fod y cwrs yn "agor cyfleoedd i bobl".

Mae Seren, 15, yn teimlo bod 'na fudd i astudio'r pynciau gwyddoniaeth ar wahân.

Mae Ellis, 17, yn dweud bod y cwrs gwyddoniaeth wedi rhoi "sylfaen" iddo ar gyfer astudio'r pwnc ar lefel Safon Uwch.

Dywedodd Cymwysterau Cymru y bydd TGAU gwyddoniaeth ar wahân yn parhau i fod yn gymharol o ran maint i'r cymwysterau presennol.

"Bydd cynnwys y cwrs yn parhau i roi sylfaen gadarn o ddealltwriaeth wyddonol i ddysgwyr, gan eu galluogi i symud ymlaen i gymwysterau gwyddoniaeth Lefel AS a Lefel A, cymwysterau Lefel 3 eraill neu'n uniongyrchol i'r byd gwaith."

Dywedodd CBAC eu bod wedi cynnal arolwg gan ofyn os oedd angen gwneud unrhyw newidiadau i'r TGAU gwyddoniaeth presennol.

"Derbyniwyd nifer da o ymatebion oddi wrth ysgolion a rhanddeiliaid eraill ar draws Cymru, a phenderfynwyd felly y byddem yn gweithredu ar sail yr hyn a dderbyniodd y gyfran fwyaf o gefnogaeth gan ymatebwyr, sef newid yr uned ymarferol yn y cymwysterau yn unig," meddai llefarydd.

"Roedd bron dwy ran o dair o'r ymatebwyr, y rhan fwyaf ohonynt yn athrawon gweithredol, naill ai'n cefnogi'r opsiwn hwn neu'n ei gefnogi'n gryf. Derbyniodd yr opsiynau oedd yn gofyn am newid yr holl unedau fwy o wrthwynebiad na chefnogaeth."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.