'Heriau digynsail' y diwydiant olew gwresogi wrth i brisiau ddyblu

Mae pobl yng ngorllewin Cymru sy'n dibynnu ar olew er mwyn gwresogi eu tai yn dweud eu bod yn cael trafferth archebu tanwydd wrth i brisiau a chyflenwadau gael eu heffeithio gan y rhyfel yn y Dwyrain Canol.

Mae rhai wedi gweld archebion yn cael eu canslo'n ddisymwth wrth i brisiau gynyddu ers dechrau'r rhyfel gan America ac Israel yn erbyn Iran.

Roedd y cwsmeriaid wedi archebu'r olew trwy'r brocer Boilerjuice, ac mae prif weithredwr y cwmni, Tim Buckman, yn dweud bod y diwydiant yn wynebu "heriau digynsail" ar hyn o bryd.

Mae pris olew gwresogi wedi cynyddu o 60 ceiniog y litr i dros £1.30 y litr ers dechrau'r rhyfel.

Dywedodd Barrie Smith o Langwm yn Sir Benfro wrth Newyddion S4C: "Ar y dydd Gwener, cyn y rhyfel, fe wnes i archeb drwy wefan Boilerjuice am 500 litr o olew.

"Fe ges i gadarnhad ac fe wnes i daliad am yr olew.

"Fe ges i e-bost o gadarnhad ar y dydd Llun, oedd yn dweud y byddai'r olew yn dod ddydd Iau diwethaf.

"Ar y dydd Iau, fe dderbyniais i e-bost yn dweud bod yr archeb wedi ei chanslo."

Nid Mr Smith yw'r unig gwsmer i gysylltu o orllewin Cymru yn rhannu profiad tebyg.

Cwmni DJ Davies o Rydaman oedd i fod i ddosbarthu'r olew ar ran Boilerjuice.

Dywedodd y cwmni bod "problemau gyda chyflenwadau o'r burfa olew".

"Ni'n cael casglu llai a llai o olew o'r burfa, ac mae hyn yn effeithio ar ein gallu i weithredu a chwmnïau eraill.

"Mae hyn wedi golygu ein bod ni wedi gorfod canslo archebion a wnaed drwy wefan Boilerjuice, am ein bod ni yn cael cosb ariannol os nad yw archebion yn cael eu cwblhau o fewn terfyn amser penodol.

"Rydym yn annog cwsmeriaid i beidio â phrynu mewn panig."

Mae Mr Smith yn dweud ei fod yn flin gyda chwmni Boilerjuice am beidio â rhoi gwybod iddo yn gynt am y problemau gyda dosbarthwyr lleol, ac mae wedi gwneud cwyn swyddogol am yr oedi cyn rhoi gwybod iddo nad oedd modd cwblhau'r archeb.

Ychwanegodd ei fod wedi clywed gan nifer fawr o gwsmeriaid sydd wedi cael eu siomi.

Dywedodd: "Mae angen mwy o reolaeth yn y diwydiant. Mae pobl yn ddibynnol ar olew gwresogi.

"Diolch byth bod y gwanwyn a'r haf ar ein gwarthau.

"Rwy'n arswydo wrth feddwl beth fyddai'r sefyllfa yn yr Hydref.

"Rwy'n meddwl taw'r cymorth mwyaf gall bobl roi nawr yw i beidio â phrynu mewn panig."

Dywedodd Tim Buckman, Prif Weithredwr Boilerjuice, bod y wefan yn gweithredu fel "marchnad" ar-lein sydd yn cysylltu cwmnïau lleol gyda chwsmeriaid.

Nid oedd yn fodlon ymateb i gwynion unigol.

"Mae archebion yn cael eu gwneud drwy blatfform Boilerjuice, a'r dosbarthydd lleol sydd yn gyfrifol am osod y pris a chadarnhau amseroedd dosbarthu.

"Mae'r mwyafrif o archebion yn cael eu cwblhau yn ôl yr arfer, ond mae yna beth oedi a phroblemau yn sgil yr amodau presennol ar y farchnad ryngwladol, ac rydym yn gwneud ein gorau i geisio cefnogi cwsmeriaid a chyflenwyr ar yr adeg anodd yma.

"Mae'r rhain yn heriau digynsail ac yn amser heriol iawn i gwsmeriaid a chyflenwyr. Mae prisiau olew yn amrywio 20% bob dydd, ac mae'r galw hefyd yn uchel."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.