32 o artistiaid i dderbyn arian o gronfa Gorwelion ar gyfer 2026

Mae Cronfa Lansio Gorwelion wedi cyhoeddi enwau'r 32 o artistiaid cerddorol fydd yn cael cefnogaeth ariannol ar gyfer eu prosiectau yn 2026.

Ymhlith rhai o'r artistiaid fydd yn derbyn arian eleni mae Betsan, Dafydd Owain, Elin a Carys, Lloyd, Martha Elen, Morn, a Sage Todz.

Bydd y gronfa, sy'n bartneriaeth rhwng BBC Cymru a Chyngor y Celfyddydau yn rhannu £60,000 rhwng yr artistiaid a labeli recordio annibynnol.

Mae nifer o fathau gwahanol o sain cerddorol yn cael eu cynrychioli ar y rhestr yn cynnwys roc pync, hip hop, gwerin, indie ac electronig.

Mae'r rhestr hefyd yn cynrychioli artistiaid o bob cwr o Gymru - o Gaernarfon, Abertawe, Wrecsam, Aberystwyth, y Coed Duon, Cwmbrân, Trefynwy a Chaerdydd.

Ers deng mlynedd, mae Gorwelion wedi rhoi cymorth uniongyrchol i dros 450 o artistiaid - gyda'r enwau dros y blynyddoedd yn cynnwys Adwaith, LEMFRECK, Buddug, Ben Ellis, Shale, Panic Shack a Melin Melyn.

Dywedodd uwch-gynhyrchydd y cynllun, Bethan Elfyn, ei bod hi'n fraint i Gorwelion weld ton o dalent newydd yn torri drwodd o bob cwr o Gymru.

"Mae eu straeon fel tapestri cyfoethog o sut beth yw byw yng Nghymru heddiw.

"Mae'n bleser gallu rhoi hwb i'w creadigrwydd gyda chymorth ariannol, sy'n help gwirioneddol yn yr oes sydd ohoni.

"Cerddoriaeth yw trac sain ein hoes ac mae mor bwysig clywed lleisiau newydd ac ifanc ffres fel rhan o'n hymgyrch i adlewyrchu straeon o gymunedau Cymru."

Ychwanegodd Catryn Ramasut, Cyfarwyddwr y Celfyddydau yng Nghyngor Celfyddydau Cymru bod y prosiectau sy'n cael eu cefnogi yn "adlewyrchu cryfder, amrywiaeth ac uchelgais artistiaid ledled Cymru heddiw".

Ymlith y rhai fydd yn derbyn arian eleni mae MORN, band ôl-pync o Sir Fynwy, sy'n dweud bod cael eu cynnwys ar y rhestr yn "anrhydedd".

"Gyda chymaint o rwystrau'n atal pobl ifanc Cymru rhag dilyn eu breuddwydion o weithio yn y celfyddydau, mae cyllid Gorwelion yn gwneud llawer i gefnogi artistiaid, gan fod o fudd i'r sîn gerddoriaeth anhygoel yng Nghymru sy'n cynnwys cymaint o artistiaid gwych heddiw.

"Byddwn yn gwario'r arian i'n helpu i deithio heb fod ar ein colled, gan hyrwyddo'r deunydd newydd sydd ar y gweill ac ehangu'r byd rydym am i bawb fod yn rhan ohono."

Dywedodd Recordiau Grwndi, y label recordiau annibynnol newydd o Gaerdydd sydd hefyd ar y rhestr bod cael y cymorth ariannol gan Gorwelion yn "amhrisiadwy".

"Rydym yn hynod ddiolchgar am y cyfle arbennig hwn i allu defnyddio'r arian ar gyfer gwahanol brosiectau a cherddoriaeth ar y label.

"Mae rhedeg label annibynnol yn llafur cariad go iawn ac mae'n werth y byd i ni gael y gydnabyddiaeth hon."

Al Morrison, Bangor – costau recordio

Baby Schillaci, Abertawe – costau recordio

Betsan, Caerdydd – costau recordio

BWGiBWGAN (gyda'r artistiaid MWSOG ac Osgled), Caerfyrddin – sesiynau byw a fideos cerddoriaeth

Chwaer Fawr, Caernarfon – costau recordio

Courtney Scotto, Caerdydd – costau recordio a deunydd gweledol

Dafydd Owain, y Felinheli – datblygu sioe fyw

Elin a Carys, yr Orsedd – costau recordio

Elliot Bradfield, y Coed Duon – costau recordio

Emyr Sion, Caerdydd – costau ymgyrchu albwm

Farai KD, Trefforest – costau recordio

Recordiau Grwndi (gyda'r artist Tonnau), Caerdydd – costau label ac ymgyrchoedd recordiau sengl

Internet Fatigue, Aberystwyth – costau recordio a fideos cerddoriaeth

Lloyd, Cwmbrân – cyfarpar a chostau recordio

Loki Bambino, Abertawe – costau recordio ac ymgyrchu

Mantis, Caerdydd – costau recordio

Martha Elen, Caerdydd – costau recordio a deunydd gweledol

Martha O'Brien, Caerdydd – costau recordio

Meg Uppington, Caerdydd – ymgyrch prosiect

Molly Roberts, Caerdydd – costau taith

MORN, Sir Fynwy – ymgyrchoedd recordiau sengl a chyfarpar newydd

Ogun, Casnewydd – fideos cerddoriaeth, sesiynau byw ac ymgyrch

Ovajoi, Caerdydd – offerynnau a chyfarpar

Papaya noon, Caerdydd – ymgyrch cysylltiadau cyhoeddus a deunydd gweledol

Sage Todz, Caerdydd – datblygu band byw a chostau recordio

SHINOBii, Caernarfon – costau recordio

Slow Life, Wrecsam – recordio sesiwn fyw

Tai Haf Heb Drigolyn, Aberystwyth – offerynnau a chostau recordio

The Family Battenberg, Caerdydd – costau recordio

Tokomololo, Caernarfon – costau recordio a chyfarpar

Trystan Hughes, Powys – costau recordio

Waterpistol, Sir Fynwy – Ymgyrch Cysylltiadau Cyhoeddus

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.