Ateb y Carw: Mari Wyn
- Cyhoeddwyd
Mi wnaeth carw Cymru Fyw cystal job yn holi Llyr Evans, rydyn ni wedi penderfynu ei gadw ar y tîm tan maen amser iddo fynd yn ôl i begwn y gogledd i helpu Siôn Corn. Yr wythnos hon fe fuodd yn holi Mari Wyn, wyneb cyfarwydd i wylwyr S4C fel Siân ar Rownd a Rownd.
Beth yw dy atgof cyntaf o'r Nadolig?
Fy mrawd Geth yn gweiddi dros y tŷ… "Ma Sion Corn 'di bod!' a finna'n egseited iddo fo ac ar yr un pryd swp sâl yn meddwl tybed oes 'na 'wbath i mi.
Mari gyda'i brawd, Gethin, yn dathlu Nadolig
Beth yw dy hoff le i dreulio'r Nadolig yng Nghymru a pham?
Unrhyw le lle bo fy nheulu a rhywun i fod yn chef. Hapus i olchi llestri.
Beth yw'r nos calan orau i ti ei chael erioed?
Pob nos calan yn hwyl ond ella yn fwy arbennig i mi gan fod pen-blwydd Mam.
Dwi'n cofio pan oedd Mam yn 60 mynd i gerdded dros Bont y Borth. Y tro cyntaf erioed i Mam 'neud, a finna' ofn uchder! Chwerthin mawr!
Mari gyda'i mam, Sydna, ar Bont y Borth ar ddiwrnod ei phen-blwydd yn 60
Disgrifia dy Nadolig perffaith mewn tri gair.
Teulu, carioci a chaws.
Pa draddodiad Nadoligaidd wyt ti'n ei fwynhau fwyaf?
Mae clywed y garol gyntaf yn creu'r naws briodol a chael recordio carol Nadolig Rownd a Rownd wastad yn arwydd bod y dolig yn nesau.
Ma gyno ni ryw draddodiad ers sawl blwyddyn yn y pentref lle da ni'n byw – mynd i'r dafarn leol am swper hefo ffrindiau da, a'r plantos yn mynd o gwmpas y pentref i ganu carolau wedyn!
Pa ddigwyddiad Nadoligaidd yn dy fywyd sydd o hyd yn gwneud i ti wenu neu chwerthin wrth feddwl amdano?
Chwerthin: Mam yn deud y stori amdanaf i yn disgwyl cael "dillad nyrs a bag nyrs" gan Sion Corn a gofyn yr un cwestiwn i'm mrawd ynta yn ateb mewn llais dyfn, "dillad nyrs a bag nyrs"!
Gwenu: Cael aelod newydd i'r teulu dau Ddolig yn ôl - Nansi y Cockapoo crêsi!
Aelod diweddaraf y teulu, Nansi y cockapoo
Beth oedd y digwyddiad a gododd y mwyaf o gywilydd arnat ti erioed mewn cyngerdd Nadolig?
Dim cymaint o godi cywilydd ond cofio yn yr ysgol gynradd mwynhau perfformio pantos ein hathrawes Mrs Mair Williams y Wern. Oeddan ni'n lwcus iawn.
Cefais y cyfle i actio mewn sawl un. Yn "Rhwb Rhwb a Sglein" o'n i'n Ofodwr, ac yn "Dondi Dew" o'n i'n Gogydd.
Cofio y wefr o gamu ar y llwyfan a gobeithio am y gora' a meddwl "W! Dwi'n licio hyn!"
Ha! Dechrau fy ngyrfa? Diolch, Ysgol Rhosybol.
Beth wyt ti wedi'i wneud eleni i fod ar y rhestr da neu ddrwg?
Wel, dwi'm isio brolio, ond rhedeg Marathon Ultra ddechrau'r flwyddyn a chodi arian at achos da. Gobeithio bod hynna yn fy rhoi ar y rhestr plant da.
Mari gyda'i gŵr, ei phlant, a'i rhieni ar ôl cwblhau y She Ultra ym mis Ebrill 2025
Beth yw dy hoff ffilm i'w gwylio dros gyfnod y Nadolig?
Nativity – hiwmor a dangos gwir neges y Nadolig. Ffefryn tŷ ni ydi Home Alone. 'Dan ni gwylio pob blwyddyn!
Byw neu farw, gyda phwy fyddet ti'n rhannu mins pei a sheri a pham?
Siôn Corn.
Beth yw'r anrheg Nadolig orau i ti ei chael erioed?
Modrwy dyweddïo yn hollol annisgwyl ar fore 'Dolig. Pob dim wedi'i drefnu heb i mi amau dim!
Taset ti'n cael rhoi unrhyw anrheg i unrhyw un, beth fyddai o?
Mae'n Ddolig, felly anrheg gorau fyddai heddwch i bawb drwy'r byd.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Hefyd o ddiddordeb
- Cyhoeddwyd22 Mawrth 2025
