Menyw o Wynedd yn cyfaddef twyll triniaethau cosmetig
Bydd Carol Edwards yn cael ei dedfrydu ar 26 Chwefror
- Cyhoeddwyd
Mae menyw o Wynedd wedi cyfaddef dau gyhuddiad o dwyll yn ymwneud â thriniaethau cosmetig.
Plediodd Carol Edwards, 37 oed, o Lanllechid ger Bethesda, yn euog i dwyll trwy gam-gynrychiolaeth yn erbyn dwy fenyw arall yn 2023.
Roedd y cyhuddiadau'n ymwneud â gwerthu triniaethau cosmetig yr oedd ei chleientiaid yn credu oedd yn driniaeth Botox - pan oedd yn gynnyrch rhatach sydd heb ei drwyddedu.
Roedd y cyhuddiadau mewn cysylltiad â busnes triniaeth harddwch a chosmetig ym Mhorthaethwy ar Ynys Môn.
Adran Safonau Masnach Cyngor Ynys Môn oedd wedi erlyn Edwards.
Cafodd gwrandawiad yn Llys y Goron Caernarfon ei ohirio er mwyn cael adroddiad cyn ei dedfrydu.
Cafodd Carol Edwards ei rhyddhau ar fechnïaeth ddiamod.
Bydd yn cael ei dedfrydu ar 26 Chwefror.
