Arbrawf yn y gogledd sy'n defnyddio dronau i gludo gwaed

Bydd dronau'n cael eu defnyddio yn y gogledd orllewin i gludo rhoddion gwaed fel rhan o arbrawf newydd.

Ar hyn o bryd mae rhoddion gwaed yn cael eu prosesu yn ne Cymru ac yna'n gorfod cael eu cludo ar y ffyrdd sydd weithiau'n golygu taith oriau o hyd.

Gobaith prosiect Dragon's Heart yn y pen draw yw hedfan rhoddion gwaed yn syth at fannau damweiniau neu wrthdrawiadau - gan geisio achub bywydau.

Mae'r cynllun peilot i fod i ddechrau yn gynnar yn 2026 ac mae Gwasanaeth Gwaed Cymru wedi ei ddisgrifio fel cynllun "sylweddol" a "chyffrous".

Mi fydd y dronau'n pwyso tua 55 pwys (25kg) ac maen nhw oddeutu 5.5 troedfedd (1.7m) o ran lled.

Bydd blwch bach ar ben y drôn yn golygu bydd y gwaed yn cael ei osod yng nghorff y teclyn - bydd hyn yn helpu i reoli'r tymheredd.

Dywedodd Gwasanaeth Gwaed Cymru y byddai'n profi gwaed sy'n cael ei gludo fel rhan o'r arbawf, gyda'r dronau ond yn mynd mor uchel â thua 2,000 o droedfeddi (610m).

Mae dirprwy gyfarwyddwr a phennaeth ansawdd, diogelwch a chydymffurfiaeth reoleiddiol y gwasanaeth, Peter Richardson, yn dweud y gall pobl "fod yn dawel eu meddwl".

"Byddwn yn sicrhau bod y gwaed yn ddiogel pan mae'n cyrraedd ond hefyd fyddan nhw ddim yn gwastraffu unrhyw roddion gwerthfawr iawn y mae pobl wedi eu darparu."

Yn ôl Alex Brown, Prif Weithredwr Skyports Drone Services - cwmni dronau byd-eang mae'r cynlluniau yma yng Nghymru am arwain y ffordd yn rhyngwladol.

"Mae'n eithaf unigryw gan fod ganddyn nhw'r propelarau yma, felly maen nhw'n gallu mynd i fyny fel hofrennydd ac yna newid i'r hyn ni'n ei alw'n ddull adenydd sefydlog a hedfan fel awyren," meddai Mr Brown.

Ychwanegodd y gallai'r dronau lanio mewn ardaloedd bach, cwmpasu pellter o tua 62 milltir (100km), a gwrthsefyll gwyntoedd o tua 30 not.

Mae dal angen i'r cwmni a'r partneriaid berswadio'r Awdurdod Hedfan Sifil bod yr hediadau'n ddiogel.

Dywedodd Mr Brown: "Os allwn ni wneud hynny'n iawn mae'n golygu y gallwn ni gysylltu meddygfeydd â lleoliadau ar draws cefn gwlad Cymru a wir dod â manteision dronau i bobl Cymru."

Canolfan Awyrofod Eryri, sydd wedi'i lleoli ym maes awyr Llanbedr, Gwynedd, sy'n arwain y bartneriaeth.

Dywedodd y Cyfarwyddwr Technegol, Jeremy Howitt, mai mantais treialu'r gwasanaeth yno oedd bod cymaint o ofod awyr o amgylch y maes awyr - gofod nad yw awyrennau sydd heb eu cymeradwyo yn cael ei ddefnyddio.

"Mae'n golygu ei fod yn glir o awyrennau eraill, felly gallwn fod yn hyderus ein bod yn hedfan mewn amgylchedd diogel," meddai.

"Ac rydym yn gallu hedfan dros y môr, felly does dim unrhyw risg arall ar y ddaear chwaith.

"Felly gallwn brototeipio'r holl systemau gyda'i gilydd ar unwaith a dangos ei fod yn ddiogel ac yna edrych i symud i lefydd eraill."

Y cam nesaf fyddai hedfan gwaed o bencadlys Gwasanaeth Gwaed Cymru yn Nhonysguboriau, Rhondda Cynon Taf, i'r storfa waed yn Wrecsam.

Y gred ydy y gallai hyn leihau amser teithio oddeutu teirawr.

Ar ôl hynny, gallai'r prosiect symud ymlaen i gysylltu'r storfeydd gwaed ag ysbytai.

"Yr hyn yr ydym yn ceisio'i wneud yw rhoi coridorau, traffyrdd, ffyrdd mawr ar gyfer dronau trwy Gymru ac unwaith y bydd y rheini wedi'u rhoi ar waith, yna gallwn ni edrych ar gefnogi ymatebion brys o fewn yr un rhanbarthau hynny hefyd," meddai Mr Howitt.

"Y tu hwnt i'r gwasanaeth gwaed, rydym hefyd mewn trafodaethau â'r gwasanaeth ambiwlans ynghylch sut y gallai hyn gefnogi eu hymateb 999."

Dywedodd Mr Richardson: "Rydym yn ymwybodol iawn ein bod yn wasanaeth Cymru gyfan, ond rydym wedi'n lleoli yn ne Cymru ac ar hyn o bryd mae ein teithiau i orllewin Cymru ac yn enwedig i ogledd Cymru unwaith y dydd, oni bai bod argyfwng.

"Syniad drôn yw, yn lle anfon un cerbyd mawr bob dydd, y gallwn anfon fwy o lwythi llai, gan wella'r amlder, lleihau'r amser aros, a chaniatáu i ni ymateb yn llawer cyflymach i anghenion cleifion ledled Cymru."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.