Cyngor am i safle hen orsaf bŵer niwclear fod yn ganolfan arloesi

TrawsfynyddGetty Images

Mae Cyngor Gwynedd yn cefnogi cynllun i droi safle'r hen orsaf bŵer niwclear yn Nhrawsfynydd yn ganolfan arloesi

Mae Cyngor Gwynedd eisiau troi safle'r hen orsaf bŵer niwclear yn Nhrawsfynydd yn ganolfan arloesi newydd mewn prosiect gwerth tua £20 miliwn.

Cafodd y safle ei ddiystyru i gael gorsaf niwclear newydd yn 2024 er i Lywodraeth y DU ddweud yn 2022 eu bod yn ystyried adeiladu adweithydd niwclear bychan (SMRs) yno.

Bellach mae'r cyngor yn awyddus i gefnogi prosiect sydd am ddatblygu Canolfan Arloesi, Busnes a Sgiliau arfaethedig.

Yn ôl Arweinydd y Cyngor, Nia Jeffreys mae'n "newyddion cadarnhaol a chyffrous i bobl yr ardal gyda photensial am gyfleon gwaith hirdymor o ansawdd uchel".

Nia Jeffreys

Mae Nia Jeffreys yn credu y gallai'r cynllun yma "helpu i fynd i'r afael â heriau cymdeithasol ac economaidd ym Meirionnydd"

Y nod yw cael canolfan fydd yn cynnig swyddi a chyfleoedd mewn sectorau gwahanol.

Mae datganiad y cyngor yn nodi'r sector "dadgomisiynu niwclear, ynni carbon isel, deallusrwydd artiffisial (AI) a thechnoleg ddatblygol".

Os yw'r cynllun, sy'n cael ei noddi gan Gyngor Gwynedd, yn llwyddiannus byddai'n cynnig:

  • 90 o swyddi llawn amser ychwanegol;

  • buddsoddiad £21.8m i economi gogledd Cymru;

  • 3,000+ metr sgwâr o ofod llawr masnachol ac ymchwil a;

  • chefnogaeth i 100 o fentrau gan gynnwys busnesau bach a newydd.

Dywedodd y cynghorydd Nia Jeffreys y bydd y cynlluniau'n "helpu i fynd i'r afael â heriau cymdeithasol ac economaidd ym Meirionnydd".

Mi fydd yn "manteisio i'r eithaf ar werth economaidd hirdymor safle Trawsfynydd", ychwanegodd.

"Mae'n gyfle i ddatblygu sgiliau pobl i'r dyfodol ar safle o arwyddocâd cenedlaethol o fewn Gwynedd a gogledd Cymru."

Yn natganiad y cyngor fe esbonion nhw y bydd y prosiect yn "darparu cyfleusterau a datblygu sgiliau sy'n cyd-fynd â blaenoriaethau Llywodraethau Cymru a'r DU megis pontio sero-net, arloesi ac adfywio rhanbarthol".

Mae'r Cynghorydd Medwyn Hughes, yn credu bod y prosiect yn "sbardun i gefnogi cyflogaeth gynaliadwy yn yr ardal, i gefnogi busnesau ac i groesawu busnesau ac arloesedd newydd i'r gadwyn gyflenwi yn lleol".

Dyma ydy'r cam cyntaf yn y broses, meddai'r cyngor, ac yn dilyn cyfarfod y Cabinet bydd achos busnes amlinellol yn cael ei gyflwyno i Uchelgais Gogledd Cymru am gyfraniad o gyllid Cynllun Twf Gogledd Cymru.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig