ညအချိန် အိပ်ပျော်နိုင်ဖို့နဲ့ နေ့မှာ ပင်ပန်းမှုလျှော့ချနိုင်မယ့် နည်းလမ်း ၅ သွယ်

မနက်ခင်းမှာ ကြည်ကြည်လင်လင် နိုးထနိုင်ဖို့ လျှို့ဝှက်ချက်ဟာ နေ့ခင်းပိုင်း ကတည်းက စတယ်လို့ ဆိုနိုင်ပါတယ်။ အခု ပြောပြမယ့် နည်းတွေက ကောင်းကောင်းအိပ်ပျော်ပြီး ပင်ပန်းတာသက်သာအောင် ဘယ်လိုဘယ်ပုံ လုပ်နိုင်တယ်ဆိုတာတွေပါ။

ပင်ပန်းနေတယ်လို့ ခံစားနေရပါလား။ ဒါဆိုရင်တော့ ကိုယ်တစ်ယောက်တည်းမဟုတ်ပါဘူး။ ဒါကြောင့် ကိုယ့်အိပ်စက်မှုပုံစံကို နည်းနည်း အပြောင်းအလဲလုပ်ကြည့်မလားလို့ တွေးကောင်းတွေးမိမှာပါ။

ညဘက်အိပ်ပျော်ဖို့ ဆောင်ရန်ရှောင်ရန်တွေကို ကြားဖူးကြမှာပါ။ အိပ်ချိန်မှန်ဖို့၊ အိပ်ရာပေါ် ဖုန်းမကြည့်နဲ့ဆိုတဲ့ နည်းမျိုးတွေပါ။

ဒါပေမဲ့ ညဘက်မှာ ကောင်းကောင်းအိပ်စက်နိုင်တာက ကိုယ့်ရဲ့ ညပိုင်း အမူအကျင့်နဲ့ချည်း ဆိုင်တာတော့ မဟုတ်ပြန်ပါဘူး။ ပြီးတော့ လန်းလန်းဆန်းဆန်း ဖြစ်နေဖို့ဆိုတာဟာ ညဘက် ကောင်းကောင်းအိပ်စက်နိုင်မှတော့လည်း မဟုတ်ပါဘူး။ နေ့ခင်းဘက် နိုးနိုးကြားကြား ရှိနေချိန်ကတည်းက လုပ်နိုင်တာတွေ ရှိနေပါတယ်။

အခုပြောမယ့် နည်းလမ်း ငါးသွယ်က အိပ်ရာဝင်ခါနီးလုပ်‌လေ့လုပ်ထရှိတဲ့ အမူအကျင့်တွေကိုတောင် ပြောင်းဖို့မလိုဘဲ ကိုယ်ခံစွမ်းအားတိုးဖို့၊ သက်တောင့်သက်သာဖြစ်ပြီး ကောင်းကောင်း အိပ်ပျော်စေနိုင်မှာ ဖြစ်ပါတယ်။

သွေးတွင်းသံဓာတ်ပမာဏကို စောင့်ကြည့်ပါ

ကမ္ဘာတဝန်းက လူ သုံးဦးမှာ တစ်ဦးလောက်ဟာ သံဓာတ်မလုံလောက်ပါဘူး။

အထူးသဖြင့် မွေးကင်းစနဲ့ လမ်းလျှောက်စ ကလေးတွေ၊ (ဓမ္မတာလာပြီး သွေးတွေဆုံးရှုံးလိုက်ရတဲ့) အမျိုးသမီးငယ်တွေနဲ့ ကိုယ်ဝန်ဆောင်အရွယ်အမျိုးသမီးတွေ၊ အင်အားအများအပြားသုံးရတဲ့အားကစားသမားတွေ၊ သားသတ်လွတ်သမားတွေနဲ့ မကြာခဏ သွေးလှူတတ်သူတွေ ပါဝင်ပါတယ်။

ဒါပေမဲ့ ဘယ်သူမဆို သံဓာတ်ချို့တဲ့တာတို့၊ သံဓာတ်ချို့တဲ့သွေးအားနည်းရောဂါတို့ကို ခံစားရနိုင်ပါတယ်။ လက္ခဏာတွေကတော့ ပင်ပန်းနွမ်းနယ်မှုတွေအပြင်၊ ဂနာမငြိမ်ဖြစ်တာနဲ့ ညဘက်တွေ နိုးလာတာတွေလည်း ဖြစ်တတ်ပါတယ်။

အိပ်စက်ပုံကို ပြောင်းကြည့်တာတောင် ပင်ပန်းနွမ်းနယ်နေတတ်တယ်လို့ ခံစားရရင်၊ သံဓာတ်ကို သိုလှောင်ပေးတဲ့ ဖာရီတင်ပရိုတိန်း တို့၊ ဒါမှမဟုတ်လည်း ခန္ဓာကိုယ်တလျှောက် အောက်စီဂျင်ကို သယ်ဆောင်ပေးတဲ့ ဟီမိုဂလိုဗင်လို့ခေါ်တဲ့ သွေးနီဥထဲက ပရိုတင်းပမာဏကို စစ်ဆေးဖို့ ဆရာဝန်နဲ့ တိုင်ပင်သင့်ပါတယ်။

ကိုယ့်မှာ သံဓာတ်လိုအပ်နေတာမျိုး မဟုတ်ရင်တောင် စားသောက်တဲ့ အစားအသောက်ကို သတိထား စားသုံးကြည့်ပါ။ ခန္ဓာကိုယ်က သံဓာတ်ကို အလွယ်ဆုတ်ယူနိုင်ဆုံး သံဓာတ်တွေဟာ အသား၊ ငါးနဲ့ ဥအမျိုးမျိုးကနေ လာပါတယ်။

နောက်ပြီး ပဲအမျိုးမျိုးနဲ့ အစိမ်းရောင် ဟင်းသီးဟင်းရွက်တွေကလည်း ရနိုင်ပါတယ်။ ဒါတွေစားသောက်နေတုန်း ဗီတာမင်စီကြွယ်ဝတဲ့ အစားအစားအသောက်တွေကိုပါ တွဲစားမယ်ဆိုရင်တော့ အတိုင်းအထက်အလွန်ပါပဲ။

စိမ်းစိမ်းစိုစိုတွေ စားသုံးပါ

အသီးအနှံနဲ့ ဟင်းသီးဟင်းရွက်ကို များများစားတဲ့ အရွယ်ရောက်ပြီးသူတွေဟာ ကောင်းကောင်းအိပ်ပျော်ပြီး အလွယ်စာနဲ့ အချိုရည်သောက်သူတွေဟာ အိပ်စက်နိုင်မှုအပိုင်းမှာ မကောင်းတတ်ဘူးဆိုတာကို အကြီးစား သုတေသန အတော်များများမှာ တွေ့ရပါတယ်။

အထူးသဖြင့် အသီးအရွက်၊ သီးနှံ၊ အစေ့အဆန်၊ ပဲတောင့်ရှည်ကနေရတဲ့ ပဲစေ့တွေနဲ့ အဆီနည်းတဲ့နို့ထွက်ပစ္စည်းတွေပါဝင်တဲ့ အစားအစာကို စားကြတဲ့လူတွေဟာ ဒါတွေကို မစားကြသူတွေထက်စာရင် ပုံမှန်အိပ်နိုင်တာ၊ ကောင်းကောင်း ပိုအိပ်နိုင်တာကို တွေ့ရတယ်လို့လည်း သုတေသနက ဆိုပါတယ်။

ဒီအတောအတွင်းမှာပဲ ညဘက်မှာ အိပ်ချိန် ၅ နာရီတောင် မပြည့်သူတွေ၊ သံဓာတ်၊ ဇင့်ဓာတ်၊ ဆယ်လီနီယံ၊ ဖော့စ်ဖရက်စ်နဲ့ မဂ္ဂနီစီယံအပါအဝင် ဗီတာမင်စီ၊ လူတင်းနဲ့ ဆယ်လနီယံဓာတ်တို့ ကိုယ်ထဲရောက်တာ နည်းသူတွေဟာ အဲဒီဓာတ်တွေ ကိုယ်ထဲများများရှိအောင် စားသူတွေထက် အိပ်ချိန် နည်းတယ်ဆိုတာကို တွေ့ရပါတယ်။

အကျိုးအကြောင်းကို သီးခြားခွဲဖို့တော့ ခက်ပါတယ်။ အထူးသဖြင့် အာဟာရပြည့်ဝခြင်းနဲ့ အိပ်စက်ခြင်းဆိုတဲ့ခေါင်းစဥ်နှစ်ရပ်ကို လေ့လာတဲ့အခါမှာ ဖြစ်ပါတယ်။

ဒါကြောင့်ပဲ လေ့လာချက် တော်တော်များများမှာ ကောင်းကောင်းစားသူတွေက များများပိုအိပ်ပြီး အိပ်ကောင်းတာဟာ ကောင်းကောင်းစားတာနဲ့ ဆက်နွှယ်လား၊ နှစ်ခုစလုံးကြောင့်လားဆိုတာ သေချာ မပြောနိုင်ကြသေးပါဘူး။

ဒါပေမဲ့လည်း ပင်ပန်းလွန်းလို့ ဖြစ်သလိုပဲ စားလိုက်မယ်လို့ဆိုတာမျိုးလည်း ဖြစ်လို့မရ ပြန်ပါဘူး။ ဒီလို အမူအကျင့်မျိုးဟာ အိပ်စက်ပုံကို ပြောင်းလဲနိုင်ပါတယ်။

ဆွီဒင်နိုင်ငံမှာ လူငယ်အမျိုးသား ၁၅ ဦးကို လေ့လာတဲ့ လေ့လာချက်တစ်ခုမှာဆိုရင် အဆီဓာတ်မြင့်မြင့်၊ သကြားဓာတ်မြင့်မြင့်ကို သူတို့စားသုံးတဲ့အခါမှာ သူတို့ ဦးနှောက်လှိုင်းတွေဟာ အိပ်ချိန်မှာ ပြောင်းလဲသွားပြီး အိပ်စက်နိုင်စွမ်းကို ယိုယွင်းမှုဖြစ်စေတာကို တွေ့ခဲ့ရပါတယ်။

သူတို့ဟာ အဆီနည်း၊ သကြားဓာတ်နည်းပြီး ကျန်းမာရေးနဲ့ ပိုကိုက်ညီတာတွေကို ပြန်စားသုံးတဲ့အခါမှာ တော့ သူတို့ နှစ်နှစ်ခြိုက်ခြိုက် အိပ်နိုင်စွမ်းက တိုးလာတယ်ဆိုတာကို တွေ့ရပါတယ်။

လူတစ်ယောက်အိပ်နေချိန်မှာ ဦးနှောက်အလုပ်လုပ်ပုံကို အချက်အလက်စုဆောင်းရတာ သိပ်မလွယ်လှတာမို့ ဒီလိုလေ့လာချက်တွေကို အနည်းငယ်ပဲ လုပ်နိုင်ပါတယ်။ ဘာကြောင့်လဲဆိုရင် သူတို့ကို အိပ်စက်ခြင်းကို စောင့်ကြည်တဲ့ဓာတ်ခွဲခန်းထဲကိုခေါ်၊ သူတို့ အိပ်ချိန် ညလုံးပေါက် စောင့်ကြည့်ရတာမျိုး လုပ်ရတာကြောင့်ပါ။

ကျန်းမာရေးနဲ့ညီညွတ်တာ စားကြရင် အိပ်စက်နိုင်စွမ်းမှာလည်း အကျိုးဖြစ်ထွန်းစေတယ်ဆိုတာကို ထောက်ပြတဲ့ တခြားလေ့လာချက်တွေကတော့ အများကြီး ရှိနေပါတယ်။

ကျပန်း ကန့်သတ်စမ်းသပ်လေ့လာချက်တချို့အရဆိုရင်လည်း တစ်နေ့ကို အသီးအရွက် ၅ မျိုးကနေ ၁၀ မျိုးအထိ စားသုံးတာဟာ အိပ်စက်နိုင်စွမ်းကို မြှင့်တင်ပေးတယ်လို့ ပြနေပါတယ်။

လူငယ် အယောက် ၁,၀၀၀ ကျော်ကို လေ့လာတဲ့လေ့လာချက်တစ်ခုမှာဆိုရင် တစ်နေ့ကို အသီးအရွက် ၃ မျိုးထက်နည်းအောင် စားသုံးချိန်နဲ့ အဲဒီထက် ပိုအောင် စားသုံးပြီးနောက်မှာ တွေ့ရတဲ့ အိပ်စက်မှုကို လေ့လာခဲ့ပါတယ်။

နောက် ၃ လကြာတဲ့အခါမှာ (အမျိုးသားတွေ မဟုတ်ဘဲ) အမျိုးသမီးတွေဟာ အိပ်မပျော်တဲ့ လက္ခဏာတွေ ၂ ဆ လျော့ပါးလာပြီး အိပ်စက်နိုင်စွမ်းလည်း အနည်းငယ် ပိုကောင်းလာတာကို ပြသပါတယ်။

သူတို့ စားသုံးတဲ့ပမာဏကို တစ်နေ့ကို ၆ ကြိမ်တိုးလိုက်သူတွေနဲ့ မတိုးတဲ့သူတွေမှာ - တိုးသူတွေဟာ မတိုးသူတွေထက် အိပ်ပျော်ဖို့ ပိုမြန်တာကို တွေ့ရပါတယ်။

ဒီအတောအတွင်းမှာပဲ စနစ်တကျ စောင့်ကြပ်ပြီး ကျပန်းလေ့လာတဲ့လေ့လာချက်တစ်ခုမှာဆိုရင် အစိမ်းရောင်အသီးအရွက်တွေကို တစ်ပတ်ကို ၅ ကြိမ်အထိ ကလေးတွေကို ကျွေးကြည့်တဲ့အခါမှာ သူတို့ဟာ ပိုပြီး သက်တောင့်သက်သာဖြစ်ပြီး ပိုလည်း အိပ်ကြတယ်ဆိုတာကို တွေ့ခဲ့ရပါတယ်။

သုတေသီတွေကတော့ ဒါဟာ အစိမ်းရောင်ဟင်းသီး ဟင်းရွက်တွေမှာပါဝင်တဲ့ ဗီတာမင်တွေ အထူးသဖြင့် အေနဲ့ စီတို့ကြောင့်ဖြစ်နိုင်တယ်လို့ ရေးသားကြပါတယ်။ ဒီဓာတ်တွေဟာ သံဓာတ်လို အိပ်စက်နိုင်စွမ်းကို အထောက်အကူဖြစ်စေတဲ့ ဓာတ်သတ္တုဓာတ် တွေကို ကိုယ်ခန္ဓာက ပိုပြီး စုပ်ယူနိုင်အောင် အထောက်အကူ ဖြစ်စေပါတယ်။

လေ့ကျင့်ခန်း ခဏ လုပ်ပါ (ညနေခင်းရောက်မှ လုပ်နိုင်တာတောင် လုပ်ကြည့်ပါ)

ကိုယ်လက်လှုပ်ရှား လေ့ကျင့်တာနဲ့ အိပ်စက်မှုကြားမှာ ဆက်နွှယ်မှု တိတိကျကျ ရှိလားဆိုတာကို သုတေသနလုပ်နေတုန်းဖြစ်ပေမဲ့ ယေဘုယျအားဖြင့် ကိုယ်လက်လှုပ်ရှားမှုဟာ ကိုယ်ထင်ထားတာက် ကိုယ့်ကို ကောင်းကောင်းမွန်မွန်နဲ့ ကြာကြာ အိပ်နိုင်အောင် အထောက်အကူဖြစ်စေတယ်ဆိုတာ တွေ့ရမှာဖြစ်ပါတယ်။

၂၀၁၅ ခုနှစ်မှာ လေ့လာချက် ၆၆ ခုကို စုစည်းထားတဲ့ ဆန်းစစ်လေ့လာချက်အရဆိုရင် နမူနာအနေနဲ့ တစ်ပတ်မှာ ရက်အနည်းငယ် လေ့ကျင့်ခန်းလုပ်ရင်တောင် လုပ်တဲ့သူဟာ မြန်မြန်အိပ်ပျော်တာနဲ့ ပိုအိပ်ပျော်တာတွေ တွေ့ရပြီး ပုံမှန်လေ့ကျင့်ကြတဲ့သူတွေဟာ အိပ်စက်နိုင်စွမ်း တိုးလာတယ်ဆိုတာ တွေ့ခဲ့ရပါတယ်။

ဒီလိုသက်ရောက်မှုတွေဟာ နည်းပါးတယ်လို့ ဆိုနိုင်ပေမဲ့ အအိပ်အနေနည်းပါးတယ်လို့ ဆိုကြသူတွေအတွက်ကတော့ သက်ရောက်မှု ပိုကြီးပါတယ်။ တနည်းအားဖြင့်ဆိုရင် အိပ်စက်မှုအပိုင်းမှာ ရုန်းကန်နေကြရတဲ့အရွယ်ရောက်ပြီးသူတွေဟာ ချွေးစိုအောင် လေ့ကျင့်ကြည့်မယ်ဆိုရင်တော့ အကျိုးမယုတ်တန်ကောင်းပါဘူး။

တချို့ လေ့လာချက်တွေမှာတော့ လေ့ကျင့်ခန်းလုပ်တာဟာ ပြင်းထန်စရာမလိုသလို နေ့တိုင်းလုပ်ဖို့တောင် မလိုဘူးလို့ အကြံပြုပါတယ်။

တစ်ပတ်ကို သုံးကြိမ် လေ့ကျင့်ခန်းလုပ်တာဟာ နေ့တိုင်းလုပ်တာထက် အိပ်စက်မှုမှာ ရလဒ်ကောင်း ဖြစ်စေတယ်လို့ ဆိုပါတယ်။

အတော်အသင့် အားစိုက်လုပ်ရတဲ့ လေ့ကျင့်ခန်းတွေဟာ အပြင်းအထန်ဆော့တဲ့ လေ့ကျင့်ခန်းတွေထက် အိပ်စက်နိုင်စွမ်းကို တိုးမြှင့်ပေးနိုင်ပါတယ်။ ဒါကြောင့် တစ်နေ့ကို ၁၀ မိနစ်လောက် လေ့ကျင့်ရင်တောင် အလုပ်ဖြစ်ပါတယ်။ အိပ်ရာမဝင်ခင် ၂ နာရီလောက်အလို ညနေခင်းမှာ လေ့ကျင့်တာဟာ အိပ်စက်ခြင်းကို အနှောင့်အယှက် မဖြစ်စေဘူးဆိုတာကို နောက်ထပ် သုတေသနတစ်ခုမှာ တွေ့ရပါတယ်။

ဒါပေမဲ့ ကိုယ့်ရဲ့အိပ်စက်နိုင်စွမ်းတိုးလာရုံတင်မကဘဲ ကိုယ်အနားရတယ်လို့ ခံစားမိစေဖို့ လေ့ကျင့်ခန်းလုပ်တာတစ်ခုတည်းက အထောက်အကူ ဖြစ်တာ မဟုတ်ပါဘူး။

သုတေသနအရဆိုရင် ရုပ်ပိုင်းဆိုင်ရာလှုပ်ရှားမှုဟာ ကိုယ့်ကို ပိုပြီး လန်းဆန်းတယ်လို့ ခံစားမိစေသလို ကိုယ်ဘယ်လောက်အတိုင်းအတာအထိပဲ နှစ်နှစ်ခြိုက်ခြိုက်အိပ်ခဲ့ အိပ်ခဲ့ အရင်ညကထက် ပိုအိပ်လို့ ကောင်းတယ်လို့တောင် ပြောနိုင်မယ်လို့ ဆိုပါတယ်။

အရက်နဲ့ ဆေးလိပ်ကို လျှော့ပါ၊ ဖြတ်ပါ

လူတော်တော်များများရဲ့ နှစ်သစ်ကူးရောက်တိုင်း ဒီနှစ်တော့ဘာတွေ ဖြစ်အောင်လုပ်မယ်၊ ပြုပြင်ပြောင်းလဲမယ်ဆိုတဲ့ ဆုံးဖြတ်ချက်တွေက စာရင်းတို့မှတ်ထားရုံ သက်သက်သာဖြစ်ပြီး ဆေးလိပ် ဒါမှမဟုတ် အရက်ကို ပုံမှန်သောက်နေတဲ့သူတွေအတွက်တော့ ရုတ်တရက် ဖြတ်လိုက်ဖို့ ခက်ပါတယ်။

အကြောင်းကတော့ အလေ့အကျင့်အသစ်ကို ကျင့်သုံးတာ ဒါမှမဟုတ် အပြုသဘောဆောင်တဲ့ အပြောင်းအလဲတစ်ခုကို စလုပ်တာတို့လို ကိစ္စသစ်တွေက ပုံမှန်လုပ်နေကျကိစ္စတွေကို ရပ်လိုက်ရမယ် ရှောင်လိုက်ရမယ်ဆိုတာတွေထက် ပိုအောင်မြင်နိုင်တာကြောင့် ဖြစ်ပါတယ်။

ဒါပေမဲ့ အခုနှစ်မှာ အနားယူမယ့် နည်းလမ်းတစ်ခုအနေနဲ့ အရက်သောက်တာနဲ့ ဆေးလိပ်သောက်တဲ့ အလေ့အထကို ဖြတ်ကြည့်မယ်ဆိုရင် အဲဒါ အောင်အောင်မြင်မြင်လုပ်ဖြစ်ပါလိမ့်မယ်။

ဆေးလိပ်သောက်ခြင်းကလည်း အိပ်ပျော်ဖို့ ခက်ခဲစေပါတယ်။

အိပ်ရာနိုးတာနဲ့ အစားစားတဲ့ ကလေးတွေဟာ သူတို့ရဲ့ အာရုံစူးစိုက်မှုနဲ့ မှတ်ဉာဏ်စီမံလုပ်ဆောင်မှုဆိုင်ရာ လုပ်ဆောင်ချက်တွေကို အားကောင်းစေပါတယ်။

အရက်သောက်တာကတော့ ဆိုးရွားတဲ့ အိပ်စက်ခြင်းကို ဖြစ်ပေါ်စေပါတယ်။

အိပ်ရာမဝင်ခင် နှစ်ကြိမ် သို့မဟုတ် သုံးကြိမ်လောက်သောက်တာက အိပ်ပျော်စားဝင် ဖြစ်စေပါတယ်။ ဒါပေမဲ့ ဒီပုံစံအတိုင်း သုံးရက် (ဒါမှမဟုတ် ဒီထက်ပိုပြီး) ဆက်သွားနေရင် အိပ်မပျော်နိုင်ခြေ ပိုများလာနိုင်ပြီး တခြားဆက်နွှယ်တာတွေလည်း ဖြစ်နိုင်ပါတယ်။

အိပ်ရာမဝင်ခင် တစ်ခွက်လောက်သောက်ရုံနဲ့ အိပ်စက်ခြင်းဆိုင်ရာ ဇီဝကမ္မဗေဒကို ပြောင်းလဲစေပါတယ်။ အရက်သောက်သူတွေက မြန်မြန် အိပ်ပျော်တယ် ဆိုပေမဲ့ ညပထမပိုင်းမှာ ပိုပြီး နှစ်နှစ်ခြိုက်ခြိုက် အိပ်ပျော်ပါတယ်။ ဒါပေမယ့် ညရဲ့ ဒုတိယပိုင်းမှာ ပိုနိုးလာပြီး အိပ်ချိန်နည်းသွားတတ်ပါတယ်။

အရက်သောက်ခြင်းက ဇီဝနာရီ စည်းချက်ညီမှုကို အနှောင့်အယှက်ပေးနိုင်ပါတယ်။ လူတစ်ယောက်ရဲ့ စုစုပေါင်းအိပ်စက်မှုပမာဏကို လျှော့ချစေပါတယ်။ အိပ်ပျော်ချိန်မှာ အသက်ရှုခြင်းနဲ့ပတ်သက်တဲ့ ပြဿနာတွေလည်း ဖြစ်စေပါတယ်။

မနက်စာ မစားဘဲ မနေပါနဲ့

ဘီဘီစီက အရင်က ဖော်ပြခဲ့တဲ့အတိုင်း မနက်စာစားတာက ကိုယ်အလေးချိန်ကျဖို့ (ဒါမှမဟုတ် ကျန်းမာရေးနဲ့ညီညွတ်တဲ့ ကိုယ်အလေးချိန်ကို ထိန်းထားနိုင်ဖို့ ) ဆိုတဲ့ မေးခွန်းနဲ့ ပတ်သက်ပါတယ်။

တကယ်တမ်းတော့ ကျိုးကြောင်းပြုပြောရမယ့် အထောက်အထားတွေက ရောထွေးနေပါတယ်။ ဥပမာအားဖြင့် ကျပန်း ကန့်သတ်ကောက်ယူထားတဲ့ စစ်တမ်းတခုမှာဆိုရင် မနက်စာလွတ်တာ ဒါမှမဟုတ် မစားဘဲ ကျော်ခဲ့တာက ခန္ဓာကိုယ်အချိုးအစား ပြောင်းလဲမှု ရလဒ်များအပေါ် အကျိုးသက်ရောက်မှု ထင်ထင်ရှားရှား မရှိကြောင်း တွေ့ရှိခဲ့ရပြန်ပါတယ်။

မနက်စာစားတဲ့ အကျိုးကျေးဇူးကြောင့် စိတ်ပိုင်းဆိုင်ရာ နိုးကြားသွက်လက်မှုနဲ့ ထက်မြက်မှုအပေါ် အကျိုးသက်ရောက်မှုလိုမျိုးတော့ တွေ့ရပြန်ပါတယ်။

လေ့လာမှု ၄၃ ခုကို ပြန်လည်သုံးသပ်ချက်အရ နံနက်စာစားခြင်းက လူတစ်ဦးရဲ့ မှတ်ဉာဏ်နဲ့ အာရုံစူးစိုက်မှုကို တိုးတက်စေကြောင်း တွေ့ရှိခဲ့ရပါတယ်။ ယေဘုယျအားဖြင့် အဲဒီအကျိုးသက်ရောက်မှုက မပြောပလောက်ဘူးလို့ ဆိုနိုင်ပေမဲ့ အမြဲတမ်းမပြတ် အကျိုးရှိတာမျိုးလည်း ဖြစ်ပါတယ်။

ဒီစမ်းသပ်မှုက ဘာနဲ့တူသလဲဆိုတော့ ကလေးတွေ အိပ်ရာနိုးလာတဲ့အချိန်မှာ ပုံမှန် အစား ကျွေးပေးတာက သူတို့အတွက် အာဟာရကရတဲ့ အကျိုးကျေးဇူးက သူတို့ရဲ့ အာရုံစူးစိုက်မှု၊ မှတ်ဉာဏ်နဲ့ တခြားဖွံ့ဖြိုးရေးတွေကို တိုးမြင့်လာစေကြောင်း အလားတူတွေ့ရပါတယ်။

တခြားသော သုတေသနပြုချက်တွေအရလည်း မနက်စာစားတာက ပင်ပန်းနွမ်းနယ်မှုကို သက်သာစေနိုင်ပါတယ်။

ဥပမာအားဖြင့် ဆေးကျောင်းသား ၁၂၇ ဦးကို လေ့လာမှုတစ်ခုအရ မနက်စာစားသူတွေဟာ မစားသူတွေထက် ပင်ပန်းနွမ်းနယ်မှု နည်းတယ်လို့ တွေ့ရှိခဲ့ပါတယ်။

အချိန်မှန် စားသုံးတာကလည်း အကျိုးရှိပါတယ်။ ဆေးကျောင်းသားတွေကို လေ့လာမှုအပြင် ထိုင်ဝမ်က ဘွဲ့ရကျောင်းသား ၁,၈၀၀ ကျော်ကို လေ့လာခြင်းအပါအဝင် အဲဒီသုတေသန နှစ်ခုစလုံးအရ အချိန် မမှန် စားသောက်သူတွေဟာ အချိန်မှန်စားသူတွေထက် ပင်ပန်းနွမ်းနယ်မှုဒဏ်ကို ပိုခံစားရတာကို တွေ့ရှိခဲ့ရပါတယ်။

ဒီလေ့လာမှုနှစ်ခုက စူးစမ်းချက်တွေဖြစ်ပါတယ်။ ဒီ‌တော့ဖြစ်နိုင်တာက ပင်ပန်းနွမ်းနယ်နေသူတွေဟာ မနက်စာလွတ်သူတွေ ဖြစ်နိုင်သလို အချိန်မှန် ပုံမှန်မစားသူတွေလို့ ကောက်ချနိုင်ပါတယ်။

ခန္ဓာကိုယ်ဖွံ့ဖြိုးမှုကြီးထွားမှုနဲ့ ပတ်သက်တဲ့ သုတေသနအဖွဲ့ကြီးရဲ့ လေ့လာမှုအရ ကိုယ့်ရဲ့ ဇီဝနာရီ စည်းချက်က အစားအသောက်စားချိန်မှာ သက်ရောက်မှုရှိတာကိုတွေ့ရပါတယ်။ ဒါကြောင့် စားနေတဲ့အချိန်မှာရော စားပြီးတဲ့အချိန်မှာပါ နည်းလမ်း ၂ မျိုးနဲ့ အကျိုးသက်ရောက်ပုံရပါတယ်။

ပင်ပန်းနွမ်းနယ်မှုတွေခံစားနေရရင် အိမ်အပြင်မထွက်ခင် ကြက်ဥနှစ်လုံး ဒါမှမဟုတ် ဆန်ပြုတ်တစ်ပန်းကန်ကို အချိန်ပေးစားကြည့်သောက်ကြည့်တာမျိုး လုပ်နိုင်ပါတယ်။