ဘီဘီစီ ၂၀၂၂ ထူးချွန်ထင်ရှား အမျိုးသမီး ၁၀ဝ

၂၀၂၂ ခုနှစ်အတွက် ဘီဘီစီရဲ့ အမျိုးသမီး ၁၀၀

ကမ္ဘာပေါ်က လူ့ဘောင်အသိုင်းအဝိုင်းမှာ နယ်ပယ် အလိုက် သြဇာအရှိန်အဝါ လွှမ်းမိုးနိုင်တဲ့ အားကျဖွယ်ရာ အမျိုးသမီးတွေထဲက နယ်ပယ်အသီးသီးမှာ ထူးချွန် ထင်ရှားတဲ့ အမျိုးသမီး ၁၀၀ ရဲ့ စာရင်းကို ဘီဘီစီက ဒီကနေ့ ထုတ်ပြန်လိုက်ပါတယ်။

ဒီနှစ်အတွက် ရွေးချယ်တဲ့ အမျိုးသမီး ၁၀၀ ကို နိုင်ငံရေးနဲ့ ပညာရေးနယ်ပယ်၊ ယဉ်ကျေးမှုနဲ့ အားကစားနယ်ပယ်၊ နိုင်ငံရေးလှုပ်ရှားမှုနဲ့ တရားရေးနယ်ပယ်၊ ကျန်းမာရေးနဲ့ အားကစား နယ်ပယ် ဆိုပြီး လေးမျိုးခွဲ သတ်မှတ်ပြီးနောက် နယ်ပယ်တခုစီမှာ ၂၅ ယောက်စီ ရွေးချယ်ပါတယ်။

တနိုင်ငံတည်းကနေ အများဆုံးရွေးချယ်ခံကြရတဲ့ နိုင်ငံတွေထဲမှာ အပြောင်းအလဲအတွက် တောင်းဆိုဆန္ဒပြမှုတွေ ဖြစ်နေတဲ့ အီရန်၊ ကျူးကျော်စစ် ဆင်နွှဲခံနေရတဲ့ ယူကရိန်းနိုင်ငံတို့ ပါဝင်ပါတယ်။

ဒါ့အပြင် မသန်စွမ်းသူများအရေး လှုပ်ရှားသူ၊ လိင်တူစိတ်ဝင်စားသူတွေအရေး လှုပ်ရှားသူတွေနဲ့ အနုပညာရှင်တွေ၊ ကျန်းမာရေး နယ်ပယ်က အမျိုးသမီးတွေ ရွေးချယ်ဖော်ပြခံရတဲ့ အမေရိကန် ပြည်ထောင်စုက လည်း ဒီနှစ်အတွက် အမျိုးသမီး ၁၀၀ စာရင်းမှာ အများဆုံး ပါဝင်တဲ့ နိုင်ငံ တနိုင်ငံဖြစ်ပါတယ်။

 အာရှဒေသ နိုင်ငံတွေထဲမှာ မြန်မာ၊ ထိုင်း၊ တောင်ကိုရီးယား၊ အင်ဒိုနီးရှား၊ သီရိလင်္ကာ၊ အိန္ဒိယ နဲ့ တရုတ် စတဲ့ နိုင်ငံတွေက အမျိုးသမီး အခွင့်အရေး လှုပ်ရှားကြသူတွေ၊ ပညာရပ်ပိုင်းဆိုင်ရာ နယ်ပယ်အလိုက် စွမ်းဆောင်နိုင်ရည် ရှိတဲ့ အမျိုးသမီးတွေ ရွေးချယ် ဖော်ပြခံကြရပါတယ်။

ဒီနှစ် ဖော်ပြတဲ့ အမျိုးသမီးတွေဟာ လူသားတွေရဲ့ အသိုင်းအဝိုင်း၊ ယဉ်ကျေးမှုနဲ့ ကမ္ဘာကြီးကို အပြောင်းအလဲ ဖြစ်စေခဲ့တဲ့နေရာမှာ ပါဝင်ခဲ့သူတွေကို ရွေးချယ်ထားပြီး ဘဝတွေ ပြန်လည်ရှင်သန်နိုင်ဖို့ သူတို့တွေရဲ့ ရဲရင့်မှုနဲ့ လုပ်ဆောင်နိုင်ခဲ့တာတွေ အသိအမှတ်ပြု ဖော်ပြထားပါတယ်။

ဘီဘီစီက ရွေးချယ်ခဲ့တဲ့ ထူးချွန်ထင်ရှား အမျိုးသမီး ၁၀ဝ ထဲကနေ မြန်မာ ပရိသတ်စိတ်ဝင်စားနိုင်မယ့် အနုပညာ နယ်ပယ်၊ သရုပ်ဆောင်မှု နယ်ပယ်၊ နိုင်ငံရေး နယ်ပယ်၊ ကျန်မာရေး နယ်ပယ်နဲ့ တက်ကြွလှုပ်ရှားမှု နယ်ပယ်တွေကနေ တဦးစီကို ဘီဘီစီ မြန်မာပိုင်းက ကောက်နုတ် ဖော်ပြမှာဖြစ်ပါတယ်။

အဲဒီ အမျိုးသမီးတွေကတော့ အမေရိကန်က ကမ္ဘာကျော် တေးရေး တေးဆို ဘီလီ အိုင်းလစ်ရှ်၊ အိန္ဒိယ သရုပ်ဆောင် ပရီယန်ကာ ချော်ပရာ၊ နိုင်ငံရေး နယ်ပယ်က ယူကရိန်းသမ္မတ ကတော် အိုလန်နာ ဇလန်စကာ၊ ကျန်းမာရေး နယ်ပယ်က မြန်မာဆရာဝန် ဒေါက်တာအေးငြိမ်းသူ၊ တက်ကြွလှုပ်ရှားရေး နယ်ပယ်က အီရန်သူ ရိုရာ ပရေအီ တို့ ဖြစ်ပါတယ်။

၁။ အမေရိကန်က ကမ္ဘာကျော် တေးရေး တေးဆို ဘီလီ အိုင်းလစ်ရှ်

တေးဂီတဆိုင်ရာ ဂရမ်မီဆု ရသူ အဆိုတော်ဖြစ်ပြီး နားထောင်သူ လူကြိုက်များမှု စံချိန်တွေ ချိုးထားတဲ့ ဘီလီ အိုင်းလစ်ရှ်ဟာ သူဖန်တီးတဲ့ ဂီတကို အသုံးပြုပြီး ရှေးရိုးစွဲ အစဉ်အလာတွေကို ကျော်ဖြတ်ပြနိုင်သူလည်း ဖြစ်ပါတယ်။

 သူဟာ Your Power ဆိုတဲ့ သီချင်းရဲ့ စာသားတွေကတဆင့် အသက်မပြည့်သေးတဲ့ အမျိုးသမီးငယ်တွေကို ကျူးလွန်သူတွေအပေါ် ရှုတ်ချ ပြောဆိုခဲ့သလို All The Good Girls Go To Hell ဆိုတဲ့ သီချင်းနဲ့လည်း ကမ္ဘာ့ရာသီဥတု ဖောက်ပြန်မှု ဖြစ်နေတဲ့ ကိစ္စကို လူအများ နိုးကြားလာအောင် လှုံ့ဆော်ဖို့ ကြိုးစားခဲ့သူ ဖြစ်ပါတယ်။

 ဘီလီ အိုင်းလစ်ရှ်ဟာ ဒီနှစ်မှာ ယူကေက ကမ္ဘာကျော် ဂလက်စတန်ဘူရီ ဂီတပွဲတော်အတွင်း အသက်အငယ်ဆုံး ဦးဆောင် သီဆိုသူအဖြစ် စံချိန်တင်ခဲ့သူလည်း ဖြစ်ပါတယ်။

 သူဟာ အခုလို ဦးဆောင်သီဆိုသူအဖြစ် လုပ်ခွင့်ရချိန်မှာ ဖျော်ဖြေတဲ့ပုံစံနဲ့ စင်အနေအထားကို အမေရိကန် တရားရုံးချုပ်ကို ဆန္ဒပြဖို့အတွက် ပုံဖော်ခဲ့ပြီး အဓိကအားဖြင့် ဖွဲ့စည်းပုံ အခြေခံဥပဒေအရ ကိုယ်ဝန်ဖျက်ချခွင့် မပေးတော့တဲ့အပေါ် ဆန့်ကျင်ပြခဲ့ပါတယ်။

 သူဟာ လူအများ ကိုယ့်ခန္ဓာကိုယ် အပိန်အဝ သိမ်ငယ်မှု ပြဿနာတွေ၊ သူ စိတ်ကျဝေဒနာ ခံစားနေခဲ့ရတဲ့ အချိန်တွေနဲ့ Tourette’s syndrome လို့ ခေါ်တဲ့ အကြောလိုက်ရောဂါ ခံစားနေရတာတွေကို ပွင့်ပွင့်လင်းလင်း ထုတ်ပြောခဲ့သူလည်း ဖြစ်ပါတယ်။

 “အခုခေတ်ကာလက အမျိုးသမီးတွေ ထိပ်တန်းရောက်လာတဲ့ အချိန်ဖြစ်နေတာကို ကျွန်မ အရမ်းဝမ်းသာရပါတယ်။ ကျွန်မအရွယ် မိန်းကလေးတယောက်က အများနဲ့သက်ဆိုင်တဲ့ ကိစ္စတွေ ပြောဆို လုပ်ကိုင်တာမျိုးကို တရေးတယူ လုပ်ကြတာမျိုး ကျွန်မမှာ အားကျစရာ မရှိခဲ့တော့ ကျွန်မမှာ ဘဝမျှော်လင့်ချက် မရှိတော့သလို ဖြစ်ခဲ့တဲ့ ကာလတခု ရှိခဲ့ဖူးတာလေ”

၂။ အိန္ဒိယ သရုပ်ဆောင် ပရီယန်ကာ ချော်ပရာ

ရုပ်ရှင်ဇာတ်ကားပေါင်း ၆၀ ကျော်မှာ ပါဝင်သရုပ်ဆောင်ခဲ့တဲ့ ပရီယန်ကာ ချော်ပရာ ဂျိုးနက်စ်ဟာ ဘောလီးဝုဒ် ရုပ်ရှင်လောကရဲ့ နာမည်အကြီးဆုံး သရုပ်ဆောင်တွေထဲက တဦး ဖြစ်ပါတယ်။

 ၂၀ဝ၀ ပြည့်နှစ်မှာ ကမ္ဘာ့အလှမယ်ဆုရခဲ့သူလည်း ဖြစ်တဲ့ ချော်ပရာဟာ ၂၀ဝ၂ ခုနှစ်မှာ ဘောလီးဝုဒ် ရုပ်ရှင်လောကကို စတင် ဝင်ရောက်လာခဲ့သူ ဖြစ်ပါတယ်။

သူဟာ ၂၀၁၅ အရောက်မှာတော့ နိုင်ငံတကာ ဟောလီးဝုဒ် ရုပ်ရှင်လောကကိုပါ ထိုးဖောက်နိုင်ခဲ့ပြီး အမေရိကန် ရုပ်သံဇာတ်လမ်းတွဲ Quantico မှာ ခေါင်းဆောင်မင်းသမီး ဖြစ်ခဲ့ပါတယ်။

 အခုလို ခေါင်ဆောင်မင်းသမီးဖြစ်ခြင်းအားဖြင့် ချော်ပရာဟာ အမေရိကန် ရုပ်သံဇာတ်လမ်းတွဲတခုမှာ ပထမဆုံး ခေါင်းဆောင်မင်းသမီးဖြစ်တဲ့ တောင်အာရှသူအဖြစ်လည်း သမိုင်းတွင်ခဲ့ပါတယ်။

 သူဟာ ဟောလီးဝုဒ် ရုပ်ရှင်လောကမှာ ဇာတ်လမ်းတွဲလောကမှာသာမက ရုပ်ရှင်ဇာတ်ကားကြီးတွေမှာလည်း ပါဝင်သရုပ်ဆောင်ခဲ့ပြီး Isn’t It Romantic ဇာတ်ကားနဲ့ The Matrix Resurrections တို့လည်း အပါအဝင် ဖြစ်ပါတယ်။

ချော်ပရာဟာ ကိုယ်ပိုင်ရုပ်ရှင် ထုတ်လုပ်ရေး ကုမ္ပဏီတခုကိုလည်း ထူထောင်ထားပြီး အိန္ဒိယမှာ ရုပ်ရှင်ကားတွေ ထုတ်လုပ် ရိုက်ကူးနေပြီ ဖြစ်ပါတယ်။

 သူဟာ ကုလသမဂ္ဂ ကလေးများ ရန်ပုံငွေအဖွဲ့ရဲ့ စေတနာလှုံ့ဆော်ရေး သံတမန်လည်း ဖြစ်ပြီး ကလေးသူငယ် အခွင့်အရေးနဲ့တကွ အမျိုးသမီးငယ်တွေအတွက် ပညာရေး အခွင့်အရေးရဖို့ တက်ကြွလှုပ်ရှား ဆောင်ရွက်နေပါတယ်။

 “MeToo လှုပ်ရှားမှုလို့ ခေါ်တဲ့ ‘ကျွန်မလည်း ခံရဖူးပါတယ် ဆိုပြီး အမျိုးသမီးဖြစ်လို့ နှိမ်ချ စော်ကားခံရမှုကို ပွင့်ပွင့်လင်းလင်း ထုတ်ပြောကြတဲ့ လှုပ်ရှားမှု’ ကရတဲ့ အမျိုးသမီးတွေ စည်းလုံးမှုက အရမ်းအင်အားကြီးပါတယ်။ အဲဒီ လှုပ်ရှားမှုကနေ အမျိုးသမီးတွေက သူတို့ မတရားခံရမှုတွေကို အုံနဲ့ကျင်းနဲ့ အသံထုတ် ဆန့်ကျင်စကား ပြောလာကြ၊ အချင်းချင်း ကာကွယ်လာကြ၊ ရပ်တည်ပေးလာကြတာ အရမ်း အားရစရာ ကောင်းပါတယ်”

၃။ နိုင်ငံရေး နယ်ပယ်က ယူကရိန်းသမ္မတကတော် အိုလန်နာ ဇလန်စကာ

အောင်မြင်တဲ့ ရုပ်မြင်သံကြား ဇာတ်ညွှန်းရေးသူတဦး ဖြစ်ခဲ့သူ အိုလန်နာ ဇလန်စကာဟာ သူ့အမျိုးသားဖြစ်သူ ဗလိုဒီမီယာ ဇလန်စကီးက ၂၀၁၉ မှာ ယူကရိန်းသမ္မတ ဖြစ်လာချိန်မှာ ကမ္ဘာက သတိထားမိလာတဲ့ အမျိုးသမီး ဖြစ်လာခဲ့ပါတယ်။

 သူဟာ သမ္မတကတော် ဖြစ်လာချိန်မှာ အမျိုးသမီးအခွင့်အရေး တိုးတက်ဖို့နဲ့ ယူကရိန်း ယဉ်ကျေးမှု မြှင့်တင်ရေးအတွက် လှုပ်ရှားဆောင်ရွက်ခဲ့ပါတယ်။

 ယူကရိန်းကို ရုရှားက စတင်ကျူးကျော် တိုက်ခိုက်လာပြီး နောက်ပိုင်းမှာတော့ အိုလန်နာဟာ သူရဲ့ သမ္မတကတော် ဖြစ်မှုကြောင့် လူသိများမှုကို အသုံးချပြီး ယူကရိန်းပြည်သူတွေ ဒုက္ခခံစားရတာတွေကို လူအများသိအောင် လှုံ့ဆော် ပြောပြတာတွေလည်း စလုပ်ခဲ့ပါတယ်။

 သူဟာ အမေရိကန် ကွန်ဂရက်လွှတ်တော်ကို မိန့်ခွန်းပြောတဲ့ ပထမဆုံး နိုင်ငံခြားနိုင်ငံတခုရဲ့ သမ္မတကတော် ဖြစ်တဲ့ သမိုင်းလည်း တွင်ခဲ့ပါတယ်။

 လက်ရှိအချိန်မှာတော့ အိုလန်နာဟာ ရုရှားနဲ့စစ်ပွဲကြောင့် အထိတ်တလန့်နဲ့ သောကဖြစ်ရတဲ့ ကလေးငယ်တွေနဲ့ မိသားစုတွေအတွက် စိတ်ကျန်းမာရေး အထောက်အကူပေးတဲ့ ကဏ္ဍမှာ လှုပ်ရှားဆောင်ရွက်နေပါတယ်။

 “ယူကရိန်းအမျိုးသမီးတွေဟာ စစ်မဖြစ်ခင် ငြိမ်းချမ်းနေသေးတဲ့ အချိန်ကထက်ကို ပိုသာတဲ့ တာဝန်တွေ ယူထားကြရပါတယ်။ ဒီစစ်အတွေ့အကြုံရှိတဲ့ အမျိုးသမီးတွေရဲ့ဟာ သူတို့စိတ်ထဲက ကိုယ်ကိုယ်ကိုယ် ယုံကြည်မှုက တိုးလာမှာပဲ ဆိုတာကို ကျွန်မ ယုံကြည်စိတ်ချထားပြီး ဒီလို အမျိုးသမီးတွေက နောက်တွန့်သွားမယ့် အမျိုးသမီးတွေ မဟုတ်ပါဘူး”

၄။ ကျန်းမာရေးနယ်ပယ်က မြန်မာဆရာဝန် ဒေါက်တာအေးငြိမ်းသူ

ဒေါက်တာ အေးငြိမ်းသူဟာ မြန်မာနိုင်ငံက ပဋိပက္ခဖြစ်နေတဲ့ ဒေသတွေမှာ ရှေ့တန်းထွက် လုပ်အားပေး ကူညီနေသူ ဖြစ်ပါတယ်။

 သူဟာ ချင်းပြည်နယ်က ဝေးလံခေါင်ဖျားတဲ့ ဒေသတွေမှာ အဓိက လှုပ်ရှားဆောင်ရွက်နေရာမှာ ၂၀၂၁ ခုနှစ် နိုဝင်ဘာလမှာဆိုရင် ခွဲစိတ်ခန်းငယ် တခုပါ ပါဝင်ပြီး ရသလောက် ဖန်တီးတည်ဆောက်ထားတဲ့ ဆေးရုံငယ်တခုကိုပါ ထူထောင်နိုင်ခဲ့ပါတယ်။

 ဒီဆေးရုံဟာ ပဋိပက္ခဖြစ်တဲ့ ဒေသက ဒဏ်ရာရလာသူတွေနဲ့ အခြားနာမကျန်းဖြစ်သူတွေကို ဆက်လက် ကုသပေးနေဆဲ ဖြစ်ပါတယ်။

 ဒေါက်တာ အေးငြိမ်းသူဟာ အားလပ်ချိန်မှာ ဆေးကုသမှု ရရှိဖို့ ခက်ခဲတဲ့ အနီးတဝိုက် ဒေသတွေကို သွားရောက် ကူညီ ကုသပေးနေပြီး အဲဒီအထဲမှာ ပြည်တွင်း ပဋိပက္ခတွေကြောင့် နေရပ်စွန့်ခွာ ထွက်ပြေးရသူတွေလည်း အပါအဝင် ဖြစ်ပါတယ်။

 သူအခုလို လုပ်ဆောင်နေတဲ့ ကာလအတွင်းမှာ အကြမ်းဖက် လှုံ့ဆော်သူ အဖြစ် မြန်မာအစိုးရစစ်တပ်က စွဲချက်တင်တာတွေကိုလည်း ခံခဲ့ရပါတယ်။

 ဒေါက်တာ အေးငြိမ်းသူဟာ ပြည်သူ့ ကာကွယ်ရေးတပ်လို့ ခေါ်တဲ့ ဒေသအသီးသီးမှာရှိနေတဲ့ စစ်အစိုးရဆန့်ကျင်တဲ့ လက်နက်ကိုင် တပ်ဖွဲ့အုပ်စုတွေကို ထောက်ပံ့နေတယ်ဆိုပြီး မြန်မာအစိုးရစစ်တပ်က စွပ်စွဲထားတာ ဖြစ်ပါတယ်။

၅။ တက်ကြွလှုပ်ရှားရေး နယ်ပယ်က အီရန်သူ ရိုရာ ပရေအီ

ပြီးခဲ့တဲ့ စက်တင်ဘာလမှာ ရိုရာ ပရေအီရဲ့ ပုံရိပ်ဟာ နိုင်ငံတကာမှာ လူသိများသွားခဲ့ပါတယ်။

 သူ့ရဲ့ မိခင်ဖြစ်သူ အသက် ၆၂ နှစ်အရွယ် မီနူး မဂျစ်ဒီ ဟာ အီရန်က ကာဒ့် ဘာသာစကားပြောသူတွေ အများဆုံးနေထိုင်တဲ့ ခါမန်ရှား မြို့မှာ ဆန္ဒပြရင်း လုံခြုံရေးတပ်ဖွဲ့တွေ ပစ်သတ်ခြင်း ခံခဲ့ရပါတယ်။

 အခုလို ဖြစ်သွားရာမှာ ပရေအီဟာ သူ့ဆံပင်တွေကို ရိတ်ပစ်လိုက်ပြီး သူ့မိခင်ရဲ့ အုတ်ဂူရှေ့မှာ ဆံပင်ကို ကိုင်ပြပြီး ကင်မရာကို မျက်လုံးနဲ့ တည့်တည့်ကြည့်ကာ အာဏာပိုင်တွေကို ဆန့်ကျင်ကြောင်း ပြတဲ့ ပုံရိပ်တွေက နိုင်ငံတကာမှာ လူသိများသွားခဲ့တာ ဖြစ်ပါတယ်။

 သူဟာ နောက်ပိုင်းမှာ အီရန်က အစိုးရဆန့်ကျင်တဲ့ ဆန္ဒပြပွဲတွေကို နိုင်ငံတကာမှာ ထောက်ခံမှု များများရရေးအတွက် ပြင်သစ်သမ္မတ အီမန်နျူရယ် မာခွန်းနဲ့လည်း တွေ့ဆုံ စကားပြောနိုင်ခဲ့ပါတယ်။

 အီရန်နိုင်ငံမှာ ပြီးခဲ့တဲ့ စက်တင်ဘာလလယ်က မာဆာ အမီနီ ဆိုတဲ့ ကာ့ဒ်အမျိုးသမီး ကာ့ဒ်ဒေသအတွင်း သေဆုံးခဲ့ပြီးနောက်ပိုင်း တနိုင်ငံလုံး ဆန္ဒပြပွဲတွေ ဖြစ်ပွားနေခဲ့တာ ဖြစ်ပါတယ်။

 အမျိုးသမီး ၁၀၀ ကို ဘယ်လို ရွေးသလဲ

ဘီဘီစီက နှစ်စဉ် ထုတ်ပြန်တဲ့ အမျိုးသမီး ၁၀၀ အထူးကဏ္ဍမှာ သြဇာအရှိန်အဝါ လွှမ်းမိုးနိုင်တဲ့ အားကျစရာကောင်းတဲ့ အမျိုးသမီး ၁၀၀ ရဲ့ အမည်စာရင်းကို ဖော်ပြပြီး သူတို့ရဲ့အကြောင်းတွေကို ဝေမျှ ပေးနေပါတယ်။

ဘီဘီစီ ရဲ့ အမျိုးသမီး ၁၀၀ အဖွဲ့က ကမ္ဘာတလွှား အသံလွှင့်ဌာန နဲ့ မီဒီယာအက်ရှင် တို့ရဲ့ ကွန်ရက်တွေကနေရတဲ့ အချက်အလက်တွေကို စုဆောင်းပြီး စာရင်းပြုစုပါတယ်။

ပြီးခဲ့တဲ့ တစ်နှစ်အတွင်း သတင်းခေါင်းကြီးမှာ ဖော်ပြခံခဲ့ကြရ သူတွေ၊ အရေးကြီး သတင်းတွေမှာ လွှမ်းမိုးခဲ့ကြသူတွေ၊ စိတ်ဝင်စားစရာ ကောင်းတဲ့ အမျိုးသမီးတွေ၊ နယ်ပယ် တခုခုမှာ ထူးချွန် အောင်မြင်ခဲ့ကြသူတွေ၊ ထိပ်တန်းသတင်းတွေထဲမှာ မပါပေမဲ့ လူ့ဘောင်အသိုင်းအဝိုင်အပေါ် တနည်းနည်းနဲ့ သြဇာသက်ရောက်မှု ရှိသူတွေကို ရှာဖွေ စုဆောင်းခဲ့ကြပါတယ်။

ဒီနှစ်မှာတော့ ထူးထူးခြားခြား အရင်ပြီးခဲ့တဲ့နှစ်တွေတုန်းက အမျိုးသမီး ၁၀၀ စာရင်းမှာ ဖော်ပြခံခဲ့ရတဲ့ အမျိုးသမီးတွေကို သူတို့ စိတ်ထဲမှာ အခုနှစ် စာရင်းထဲ ဖော်ပြသင့်တယ်လို့ ယူဆတဲ့ စွမ်းဆောင်ရည်ရှိသူ အမျိုးသမီးတွေကို အဆိုပြုဖို့ ဘီဘီစီက တောင်းဆိုခဲ့ပါတယ်။

ရလာတဲ့စာရင်းထဲကနေ ဆယ်စုနှစ်အတွင်း နယ်ပယ်အသီးသီးမှာ “တိုးတက်မှု” ဆိုတဲ့ အခုနှစ် အတွက် ဆောင်ပုဒ်နဲ့ အညီ အမျိုးသမီး ၁၀၀ ကို ရွေးချယ်ကြတာဖြစ်ပါတယ်။

 အမျိုးသမီး ၁၀၀ စလုံးရဲ့ စာရင်းနဲ့ သူတို့ အကြောင်းတွေကို ဒီ လင့်မှာ ဖတ်နိုင်ပါတယ်။

BBC 100 Women 2022: Who is on the list this year?

ဖေ့စ်ဘွတ်ခ်၊ အင်စတာဂရမ်နဲ့ တွစ်တာ လူမှုကွန်ရက်ပေါ်မှာ #BBC100Women လို့ ရိုက်ပြီးတော့လည်း ရှာဖွေဖတ်ရှုနိုင်ပါတယ်။

ဆယ်နှစ်ပြည့် ဘီဘီစီရဲ့ အမျိုးသမီး ၁၀၀

ဘီဘီစီက ထူးချွန်ထင်ရှား အမျိုးသမီး ၁၀၀ စာရင်းကို ၂၀၁၂ ခုနှစ်ကနေ စတင်ပြီး နှစ်စဉ် ထုတ်ပြန်လာတာ ဒီနှစ် ဆိုရင် ၁၀ နှစ် ပြည့်ပါပြီ။

 ၂၀၁၂ ခုနှစ်က အိန္ဒိယ နိုင်ငံ ဒေလီမြို့တော်မှာ အုပ်စုဖွဲ့ မုဒိမ်းမှုတွေ ဖြစ်ပေါ်ခဲ့ပြီးနောက် သတင်းမီဒီယာတွေမှာ အမျိုးသမီးတွေအကြောင်း သတင်းတွေ ပိုမို ဖော်ပြစေဖို့ ရည်ရွယ်ပြီး ဘီဘီစီက အမျိုးသမီး ၁၀၀ ကဏ္ဍကို စတင် ထုတ်လွှင့်ခဲ့တာ ဖြစ်ပါတယ်။