Archifau Chwefror 2010

Roedd yna adeg, unwaith, pan yr oedd cefnogwr pêl-droed yn cael ei ystyried fel tipyn o ddihiryn, yn chwilio am unrhyw esgus i gwffio.

Erbyn heddiw, mae'r stiwardiaid sydd yn cael eu defnyddio gan glybiau pêl-droed, yn ymddangos ac yn ymddwyn fel petaent yn brysur drio'u gorau i etifeddu'r ddelwedd yma.

Ganol wythnos, sgoriodd Reading yn hwyr yng Nghwpan FA Lloegr, i ennill oddi cartref yn West Bromwich Albion, ac ar ddiwedd y gêm, peth naturiol oedd i aelodau'r tîm fynd i gyfeiriad eu cefnogwyr i ddathlu.

Ond nid yng ngardd gefn stiwardiaid West Brom mae ymddwyn felly!

O flaen camerâu teledu, roedd yn amlwg fod y stiwardiaid yma am wneud unrhyw beth, a hynny yn gorfforol petai rhaid, i gadw'r chwaraewyr oddi wrth eu cefnogwyr.

Does gen i fawr o amser at y bobl yma sydd yn gwisgo siacedi melyn neu oren, ac yn ymddwyn fel hwliganiaid o dan drwydded wrth i'r grym o geisio cadw trefn ar eraill fynd i'w pennau.

Cefais brofiad mewn gêm Uwchgynghrair Lloegr, (Bolton yn erbyn Everton), pan safodd gŵr i fyny o'i sedd, gan gymeradwyo gôl i Everton (ac na, nid fi oedd y gŵr hwnnw).

Cyn pen chwinciad, roedd y stiwardiaid yno fel gwenyn melyn o gwmpas pot jam, ac yn hebrwng y gŵr druan i ffwrdd am iddo greu aflonyddwch ymysg y dyrfa!

Mae wedi dod i rywbeth os na ellir rhywun gymeradwyo chwarae da gan unrhyw dîm, heb gael y stiwardiaid cythreulig a diegwyddor yn eich erlid.

Tybed a welwn chwaraewr a feiddiai sgorio gôl oddi cartref yn cael ei hebrwng o'r maes gan y stiwardiaid am ypsetio y cefnogwyr cartref.

Mae rhyddid yr unigolyn yn rhan annatod o ddemocratiaeth, ond mae'n ymddangos fel petai'r elfen yma o'n hawliau wedi peidio â bodoli mewn caeau pêl-droed mwyach, diolch i awdurdod unbenaethol a hunan benodol y stiwardiaid mileinig lletchwith.

Gwyn eu byd y stiwardiaid mewn siacedi melyn , canys eiddynt hwy yw'r hawl i erlid ar unrhyw gefnogwr a feiddiai gwerthfawrogi pêl-droed deniadol gan yr ymwelwyr!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Yn ystod yr wythnosau diwethaf, mae yna lawer o sylw wedi cael ei roi i broblemau Caerdydd a phêl-droed yn gyffredinol o ran diffyg arian a dyledion ac yn y blaen.

Oherwydd hynny mae'n hawdd anghofio fod yna straeon am lwyddiant ar lefel y clybiau yn bodoli yn Ne Cymru, sef yng Nghasnewydd ac yn Abertawe.

Mae'r gwaith mae Dean Holdsworth wedi ei wneud gyda Chasnewydd yn wych, ac ar gyfer gêm yng Nghaerwrangon yn ystod yr wythnos ble enillon nhw o 4-1 fe aeth dros 800 o gefnogwyr i ddilyn y clwb.

Yn sicr, mi fydda nhw'n chwarae yn Uwch Gynghrair y Blue Square y tymor nesaf.

Pan chwaraeodd Abertawe yn erbyn Newcastle ychydig yn ôl, fe reolodd tîm Paulo Sousa y gêm yn llwyr ac roedd hi'n anodd credu ar ddiwedd y 90 munud nad oedden nhw wedi ennill y gêm.

Yr un oedd yr hanes yn Home Park ar y nos Fawrth canlynol pan fu'n rhaid bodloni ar gêm gyfartal 1-1 arall yn erbyn Plymouth.

Cyn y gêm yn erbyn Newcastle roedd y sôn am ddatblygiad yr Elyrch. Pan roedd Abertawe yn gorfod curo Hull City ar y Vetch yn 2003 er mwyn aros yng Nghynghrair Lloegr, roedd Newcastle yn gorffen yn drydydd yn yr Uwch Gynghrair o dan Syr Bobby Robson.

Mae'r datblygiad, felly, wedi bod yn aruthrol.

Mae'r cyfarwyddwyr yn haeddu llawer o'r clod am hyn yn sgil eu penodiadau o ran rheolwyr.

Yn gyntaf, yn etifeddu tîm Nick Cusack, fe gymerodd Brian Flynn yr awenau. Fe ddenodd o chwaraewyr o safon Lee Trundle, Leon Brittan, Alan Tate a Roberto Martinez. Ac mae tri yn parhau gyda'r clwb.

Yn olynydd i Flynn, fe ddaeth Kenny Jackett. Cafwyd dyrchafiad, buddugoliaeth yn Nhlws y Johnstone's Paints, colli yn rownd derfynol gemau ail-gyfle ar giciau o'r smotyn yn erbyn Barnsley a rhediad yng Nghwpan Lloegr.

Dychwelodd Roberto Martinez i'r clwb ble cafwyd safon o bêl-droed gwefreiddiol a chyffrous ac unwaith eto daeth llwyddiant cyn i'r rheolwr gael ei ddenu i'r Uwch Gynghrair.

A phwy oedd wedi rhagweld nid yn unig penodiad Paolo Sousa ond y llwyddiant fyddai'n dod yn sgil y penodiad hwnnw?

Yn parhau i fod yn dîm sydd yn pasio'r bêl yn well nag unrhyw un arall yn yr adran, maen nhw'n gryfach ac yn fwy disgybledig o dan Sousa. Mae'r garfan yn gref ac mae'r perfformiadau a'r canlyniadau yn gyson pwy bynnag sydd ar y cae.

Wedi'r gêm yn erbyn Newcastle, ac er gystal y perfformiad, fe wnaeth Sousa bum newid ar gyfer y gêm nesaf yn erbyn Plymouth. Ar wahân i Federico Bessone doedd neb wedi eu brifo.

Mae'r hyn sydd wedi digwydd i'r clwb dros y blynyddoedd diwethaf yn esiampl i lawer a does dim dwywaith fod ganddyn nhw gyfle gwych i gyrraedd yr Uwch Gynghrair y tymor nesaf.

Ac mi fyddai'r Liberty dan ei sang ar gyfer ymweliad Manchester United, Arsenal, Chelsea, Lerpwl, Manchester City, Tottenham a Wigan...

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Sut mae arbed ciciau o'r smotyn mewn gêm bêl-droed?

Petawn i'n arbenigwr ar y pwnc mae'n debyg y byddwn yn gwneud rhywbeth llawer gwahanol nac ysgrifennu blog ar y peth.

Ond mae yna arbenigwyr yn bod, ac yn gallu dangos inni drwy ganlyniadau gwaith ymchwil mewn prifysgolion, mewn cyd-weithrediad a chlybiau mwyaf y byd, y gellir adnabod arwyddion sydd yn rhoi gwybodaeth buan i'r gôl-geidwad wrth geisio penderfynu pa ffordd mae'r cic o'r smotyn am fynd.

Ymysg arbenigwyr mwyaf y byd yn y maes ymchwil yma, mae'r Athro Mark Williams, gynt o Brifysgol John Moores Lerpwl, ond heddiw yn Athro Gwyddoniaeth Chwaraeon ym Mhrifysgol Sydney yn Awstralia.

Mark hefyd oedd is-reolwr Treffynnon yn ein dyddiau yn Uwchgynghrair Cymru.

Mae tri arwydd i'w nodi os am roi cyfle i'ch hunan o arbed y gic o'r smotyn.

Yn gyntaf trwy edrych ar osgo corff y ciciwr - os yw yr ciciwr yn crymanu'n isel, bydd y bêl, yn aros yn isel; os yn sefyll yn fwy syth, aiff y bêl yn uwch.

Yn ail, y mwyaf llem yw ongl rhediad y ciciwr tuag at y bêl, yna y mwyaf tebyg y bydd y bêl yn dilyn cyfeiriai y rhediad - h.y. os yw ciciwr troed dde yn rhedeg, ar ongl lem iawn at y bêl, yna fe aiff y bêl i'r dde,

Ond yr arwydd mwyaf dibynadwy ydi trwy adnabod safle'r glun wrth i'r ciciwr daro'r bêl.

Os yw'r glun yn wynebu yn syth at y gôl (wrth gicio gyda'r droed dde) yna fe fydd yn bêl yn teithio i'r chwith.

Os yw ciciwr troed dde am geisio daro'r bêl i'r dde, yna mae'n rhaid iddo droi ei glun ychydig er mwyn anfon y bêl i'r dde.

Wrth gwrs mae hyn i gyd yn digwydd mewn canran o eiliad - ond mae'r gôlgeidwaid gorau wedi dod i ddarllen y symudiadau a'r arwyddion yma gan ymateb yn llwyddiannus nifer o weithiau.

Wrth gwrs mae'r cicwyr hefyd yn gwybod am hyn , ac yn ceisio cuddio eu bwriad hyd nes yr eiliad olaf, cyn gosod eu corff yn briodol er mwyn ceisio cyflawni'r gic yn llwyddiannus.

Mater cymhleth i'w egluro - ond eithaf haws i'w ddeall - cyn belled ag y gallwch ymateb yn chwim ac ar gyflymder os mai gôlgeidwad ydych.

Os ydych yn amau unrhyw un o'r arwyddion yma - yna ewch allan i arbrofi, gan nodi siâp eich corff wrth geisio cyflawni cic o'r smotyn ar gae ymarfer!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Mae'n ymddangos fod John Toshack am gasglu barn y chwaraewyr ynglŷn â lleoliad y gêm yn erbyn Lloegr yn rowndiau rhagbrofol Pencampwriaeth Ewrop.

Y dewis mae'n debyg fyddai Stadiwm y Mileniwm, Stadiwm Dinas Caerdydd, neu Stadiwm Liberty yn Abertawe.

Gall Cymdeithas Bêl Droed Cymru fynd am y geiniog yn Stadiwm y Mileniwm, neu am awyrgylch, hwyrach mwy trydanol a mwy cefnogol yna'r ddwy stadiwm arall, sydd lai eu maint.

Gallai'r arian a gesglir mewn un gêm yn erbyn Lloegr yn Stadiwm y Mileniwm ddod â chymaint i goffrau'r Gymdeithas Bêl Droed ac a fyddai'r tair gêm arall efo'i gilydd.

Mae cynsail i'r penbleth.

Yn ôl ym 1978, aeth Cymru, o'i dewis ei hun, i chwarae yn erbyn yr Alban ar faes Anfield yn Lerpwl mewn gêm ragbrofol Cwpan y Byd, a mynd ar ôl y geiniog, a chael eu dyrnu allan o'r gystadleuaeth gan law Joe Jordan.

Mae llawer o'r farn petai'r gêm wedi cael ei chynnal yng Nghymru, mi fyddai'r tîm wedi curo ac wedi llwyddo i fynd drwodd i'r rowndiau terfynol yn yr Ariannin.

Mae dewis o flaen aelodau enwebol y Gymdeithas eto - ond nid i fynd i Anfield nac unrhyw faes arall yn Lloegr.

Rhaid penderfynu rhwng mynd i'r Mileniwm , lle ellir gwneud elw sylweddol, neu os ydynt yn credu bod gwell siawns o ennill ar stadiwm lai, yna mynd i Stadiwm Dinas Caerdydd neu i'r Liberty

Wrth gwrs, petai Cymru yn gallu dewis trefn i'r gemau a fyddai yn gweld llwyddiant buan, yna byddai ysbryd y cefnogwyr yn codi, gan arwain at awyrgylch drydanol yn Stadiwm y Mileniwm, a'r dewis yn dod yn haws!

Hwyrach mai dewis trefn y gemau fydd y dewisiadau mwyaf allweddol.

Yng ngwledydd Pwyl a Wcrain fydd y rowndiau terfynol, ond i Gymru, ai diwedd y gan fydd y geiniog, neu gemau yn Gdansk?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Mi allaf gofio rhai blynyddoedd yn ôl pan roedd trefn gemau rhagbrofol Cwpan y Byd 2006 yn cael ei benderfynu ac fe ddaeth Cymru, oedd ar y pryd o dan reolaeth Mark Hughes, allan o'r het gyda Lloegr. Roedd yna gyffro anhygoel.

Bryd hynny roedd Cymru yn mwynhau cyfnod weddol lwyddiannus ac wedi methu o fewn trwch blewyn i gyrraedd rowndiau terfynol pencampwriaethau Ewrop yn 2004.

Dwi ddim yn sicr i ni brofi'r un cyffro yn yr ymateb amser cinio Ddydd Sul pan unwaith eto cafodd Cymru a Lloegr eu cynnwys yn yr un grŵp ar gyfer gemau rhagbrofol Ewro 2012. Ac efallai bod hynny'n adlewyrchu'r ffaith nad yw Cymru wedi mwynhau cymaint â hynny o lwyddiant o dan John Toshack.

Ond mae un peth yn sicr. Mae'r ffaith bod Cymru yn yr un grŵp a'r hen elyn yn mynd i ail danio diddordeb yn y tîm cenedlaethol. Mi fydd pawb am weld y gêm gartref, ble bynnag fyddan nhw yn chwarae ac mi fydd miloedd am deithio i Wembley.

Prin anaml y mae'r tîm pêl-droed cenedlaethol yn cael y cyfle i chwarae yn Wembley. Ac mi allai perfformiad da neu ganlyniad da sbarduno diddordeb yn y gemau eraill.

Mae o hefyd yn newyddion ardderchog i brif weithredwr newydd Cymdeithas Pêl-droed Cymru, Jonathan Ford. Prif nod ei swydd yw marchnata'r gêm a dod ag arian i mewn i'r coffrau. Wel, mae ganddo'r cyfle perffaith i wneud hynny.

Yr hyn sydd wedi fy synnu ers i'r enwau ddod allan o'r het yw'r ffaith bod y prif weithredwr heb ddatgan dim ynglŷn â'r gêm.. Roedd cyfle gwych ganddo ddydd Llun diwethaf i gyfarch y wasg gyda'r rheolwr John Toshack ac esbonio sut fyddai Cymru yn elwa yn ariannol ac wrth farchnata'r cynnyrch.

O ran y gwledydd eraill mae'r grŵp yn hynod o agored. Tra bydd Cymru yn gobeithio ennill gartref yn erbyn Y Swistir, Bwlgaria a Montenegro mi fydd y gwledydd hynny hefyd yn teimlo yn un mor hyderus ar eu tomen eu hunain.

Ac wrth gwrs mewn grŵp o bump does yna ddim Liechtenstein na Azerbaijan ble mae disgwyl i Gymru gipio chwe phwynt.

Mae Cymru a Toshack yn gwybod na fydd hi'n hawdd o bell ffordd yn erbyn Montenegro. Mi gollodd Cymru yno mewn gêm gyfeillgar fis Awst y llynedd ac mae gan y rheolwr barch aruthrol tuag at unrhyw bêl-droediwr sydd yn dod o diriogaeth yr hen Iwgoslafia.

Mi fydd y cyfarfod i drafod pryd y bydd y gemau yn cael eu chwarae yn cael ei gynnal yn y Swistir ar 15 Mawrth. Mi fydd hi'n wahanol eleni gyda gemau yn cael ei chwarae naill ai ar nos Wener neu bnawn Sadwrn ac yna ar y nos Fawrth er mwyn caniatáu i'r chwaraewyr ddychwelyd at eu clybiau diwrnod yn gynharach.

A'r cwestiwn mawr ar wefusau cefnogwyr Cymru? Ble fydd y gêm gartref yn erbyn Lloegr yn cael ei chwarae?

O ran rhesymau ariannol y penderfyniad fyddai Stadiwm y Mileniwm yng Nghaerdydd. Ond o ran hanes a gobaith Cymru i ennill y gêm? Dydw i ddim mor sicr.

Ddwywaith yn y gorffennol pan roedd cyfle go iawn gan Gymru i gyrraedd rowndiau terfynol un o'r prif gystadlaethau fe blymiodd Cymdeithas Bêl-droed Cymru am yr ateb ariannol tymor byr. Anfield yn 1977 a Pharc Ninian yn 1985.

Roedd y rheolwyr a'r chwaraewyr ar y pryd am chwarae ar y Cae Ras yn Wrecsam. Ond diystyrwyd eu barn a chollwyd y ddwy gêm. Y rheswm wrth gwrs oedd nad oedd cymaint yn gallu gwylio ar y Cae Ras a bod modd denu mwy o gefnogaeth ac arian yn y meysydd eraill.

Be ddigwyddodd? Miloedd o Albanwyr yn heidio i'r ddwy gêm. Stadiwm Caerdydd neu'r Liberty amdani felly.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Pa mor hen ydi'ch esgidiau pêl-droed chi? Mae gen i rai, sydd yn parhau i gael eu defnyddio pan fyddaf yn hyfforddi yn achlysurol, a brynais dros ugain mlynedd yn ôl - sef yr 'Adidas Mexico 1986'.

Mae'r esgidiau cystal heddiw ac a fuont erioed, ac yn sgleinio'n llachar diolch i'r dwbin a gafodd ei rwbio arnynt yn feunyddiol dros y blynyddoedd.

Be'di dwbin? Mae'n debyg fyddai ymateb nifer o chwaraewyr ifanc, gan mai esgidiau fel sliperi sydd yn cael eu gwisgo heddiw.

Ond, yn eu dydd, esgidiau fel sliperi oedd disgrifiad y rhai hyn am yr esgidiau a oeddem ni yn eu gwisgo yn y pumdegau. Os am wisgo'r gorau yna, Manfield Hotspur oedd y rhai i'w cael, ond fel unrhyw esgid arall y pryd hynny, roeddynt yn fawr, gyda lledr caled yn cyrraedd dros eich ffêr, a stỳds lledr wedi eu morthwylio o dan wadn yr esgid. Mae unrhyw un a wisgodd yr esgidiau yma yn gwybod beth oedd gwerth tun o ddwbin!

Yna daeth tro ar fyd. Yng nghanol y pumdegau datblygwyd esgidiau a oedd a stỳds rwber neu plastic ac yn cael eu gosod yn lle gyda sgriw . Wedi dioddef anafiadau di-ri wrth i hoelion y stỳds lledr dorri drwy waelod y waden (a hynny yn aml) gan frathu'r a rhwygo'r croen ar waelod eich troed, roedd y stỳds newydd fel manna o'r nefoedd!

Daeth chwaraewyr enwog y pumdegau fel Stanley Matthews a Tom Finney i noddi'r esgidiau newydd, ac os oeddech am edrych yn well na'ch cyfoedion, yna doedd dim gwell i'w gael na'r 'Tom Finney Continental' neu esgidiau Stanley Matthews a oedd yn cael eu gwerthu yn siop y Co-op.

Dilyn ffasiwn tramor oedd y gwneuthurwyr, gyda Matthews a Finney wedi gweld gwelliant aruthrol yng ngallu chwaraewyr Brasil a thimau eraill o wledydd Ewrop, a oedd yn gwisgo esgidiau ysgafnach a mwy hyblyg.

Mae'r esgidiau a wisgodd Stanley Matthews yn ffeinal 1953 yn mynd ar werth yn Bonham's yng Nghaer, tybed beth fydd gwerth yr esgidiau yma o siop y Co-op heddiw?

Os na ellwch eu fforddio, yna mae pâr o esgidai Robbie Savage hefyd ar werth mewn arwerthiant gwahanol - yn derbyn cynigion rhwng £80 a £100.

Ac oes unrhyw un angen pâr o esgidiau Adidas Mecsico 1986, yna rwy'n barod i wrando ar eich cynnig!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?