Penbleth i'r Gymdeithas
Mae'n ymddangos fod John Toshack am gasglu barn y chwaraewyr ynglŷn â lleoliad y gêm yn erbyn Lloegr yn rowndiau rhagbrofol Pencampwriaeth Ewrop.
Y dewis mae'n debyg fyddai Stadiwm y Mileniwm, Stadiwm Dinas Caerdydd, neu Stadiwm Liberty yn Abertawe.
Gall Cymdeithas Bêl Droed Cymru fynd am y geiniog yn Stadiwm y Mileniwm, neu am awyrgylch, hwyrach mwy trydanol a mwy cefnogol yna'r ddwy stadiwm arall, sydd lai eu maint.
Gallai'r arian a gesglir mewn un gêm yn erbyn Lloegr yn Stadiwm y Mileniwm ddod â chymaint i goffrau'r Gymdeithas Bêl Droed ac a fyddai'r tair gêm arall efo'i gilydd.
Mae cynsail i'r penbleth.
Yn ôl ym 1978, aeth Cymru, o'i dewis ei hun, i chwarae yn erbyn yr Alban ar faes Anfield yn Lerpwl mewn gêm ragbrofol Cwpan y Byd, a mynd ar ôl y geiniog, a chael eu dyrnu allan o'r gystadleuaeth gan law Joe Jordan.
Mae llawer o'r farn petai'r gêm wedi cael ei chynnal yng Nghymru, mi fyddai'r tîm wedi curo ac wedi llwyddo i fynd drwodd i'r rowndiau terfynol yn yr Ariannin.
Mae dewis o flaen aelodau enwebol y Gymdeithas eto - ond nid i fynd i Anfield nac unrhyw faes arall yn Lloegr.
Rhaid penderfynu rhwng mynd i'r Mileniwm , lle ellir gwneud elw sylweddol, neu os ydynt yn credu bod gwell siawns o ennill ar stadiwm lai, yna mynd i Stadiwm Dinas Caerdydd neu i'r Liberty
Wrth gwrs, petai Cymru yn gallu dewis trefn i'r gemau a fyddai yn gweld llwyddiant buan, yna byddai ysbryd y cefnogwyr yn codi, gan arwain at awyrgylch drydanol yn Stadiwm y Mileniwm, a'r dewis yn dod yn haws!
Hwyrach mai dewis trefn y gemau fydd y dewisiadau mwyaf allweddol.
Yng ngwledydd Pwyl a Wcrain fydd y rowndiau terfynol, ond i Gymru, ai diwedd y gan fydd y geiniog, neu gemau yn Gdansk?
Trin a thrafod y byd pêl-droed yn ffordd unigryw criw 
SylwadauAnfon sylw
Rwy'n clywed dipyn yn erbyn y stadiwm y mileniwn ond curom ni yr Eidalwyr ydo. Anfantais y stadiwn yw pan nad yw yn llawn. Yn erbyn Lloegr budd modd ei lenwi a dynna'r dewis cywir - cofiwch gol "deflected" gath J Cole a dywedodd golgeidwad Lloegr mai ei safiad yn erbyn Hartson oedd ei orau erioed.
Ond y gwir ydi nid y gem yn erbyn Lloegr fydd yn penderfynu dyfodol Cymru ond y gemau yn erbyn Bwlgaria a Swisdir - a dylai rheinni fod y stadiwn llai. Ar ol dweud hyn nid oes angen dewis y stadiwm tan 90 diwrnod tan y gem - felly gwell fyddai aros gyda'r gemau yn 2011?