Archifau Mai 2009

Helo bawb!

Bellach mi ydw i, Meilir, Osian, Dylan a Gerallt wedi cyrraedd Sunny Beach ym Mwlgaria ar ein taith 'Baku or Bust' i Azerbaijan gydag Elusen Gôl - ond yn anffodus dani wedi colli aelod pwysicaf y tîm - Val y fan!!

Mi ddechreuodd popeth yn dda i ni. Croesi o Dover nos Wener. Yn anffodus i Neil Dymock - trefnydd y daith - mi dorrodd ei gar lawr cyn cyrraedd Dover felly bu'n rhaid iddo fynd nôl i Gaerdydd a chychwyn eto dydd llun mewn cerbyd arall. Teithio trwy Ffrainc dydd Sadwrn gan gyrraedd dinas Heidelberg yn yr Almaen gyda'r nos. Ond dydd Sul wrth deithio ar yr Autobahn drwy'r Almaen bu'n rhaid i ni dynnu drosodd gan fod yr injan wedi gorboethi. Cafodd Val ei thynnu i garej yn Straubing lle rhoddwyd y newyddion gwaethaf posibl i ni - doedd dim modd ei thrwsio! Felly bu'n rhaid i ni ei 'sgrapio' yn y fan a'r lle. Mae'n rhaid dweud, roeddem i gyd braidd yn siomedig oherwydd roeddem wedi rhoi ein meddyliau ar ddreifio'r fan yr holl ffordd ar draws Ewrop i Azerbaijan gan ei rhoi i achos da yno.

Un peth da ddaeth o stopio yn Straubing - cawsom y cyfle i fynd i Gartref Plant yno gan roi crysau pêl droed, llyfrau, dillad a manion eraill iddynt. Roedd hi'n amlwg eu bod yn gwerthfawrogi hyn yn fawr iawn, ac roedd y pump ohonom wedi mwynhau'r profiad o helpu plant llai ffodus na ni.

Felly dyma ni ym Mwlgaria yn disgwyl i weddill y criw gyrraedd yma. Cawsom awyren o Munich i Fwlgaria bore 'ma. Bydd y ceir eraill ar y daith yn cyrraedd yma nos fory / dydd iau cyn mynd ymlaen am Twrci, Georgia ac Azerbaijan. Bydd y pump ohonom yn gwasgu ein hunain mewn i'r ceir eraill sydd ar y daith er mwyn cyrraedd Baku.

Mae hi wedi bod yn gyfnod anodd i ni dros y diwrnodau diwethaf, ond mae'r pump ohonom yn benderfynol o gyrraedd Baku erbyn Mehefin y 6ed. Rydym yn ddiolchgar dros ben i weddill y ceir am gytuno i'n cludo yno wedi iddynt gyrraedd Bwlgaria.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Yng nghanol cefnogwyr Aston Villa y Sul diwethaf oedd banner yn gwawdio cefnogwyr Newcastle United gyda'r neges:- 'Pwy fydd eich Meseia nesaf. Ant neu Dec'?

Ar sail perfformiad tila Newcastle, mae angen mwy na Meseia arnynt, ac fe fydd rhaid i Ant a Dec wneud gwyrthiau os am gael hyd i dalent a fyddai'n gallu troi hynt a helynt eu hoff dîm o gwmpas.

Dyma'r tîm, a oedd, chwe blynedd yn ôl, yn drydydd yn yr Uwchgynghrair, a'u llygaid ar chwarae yn erbyn Barcelona yn Ewrop, ond heddiw yn paratoi i wynebu Barnsley yn y Bencampwriaeth y tymor nesaf.

Ond dyna ble mae Newcastle yn haeddu bod, yn dilyn cyfres o benderfyniadau syfrdanol, annoeth, a hollol ddisynnwyr a gafodd eu gwneud yn ystod y tymor. Hwyrach fod yna dalent ym Mhrydain, ond doedd dim llawer ohono yn amlwg yn Newcastle, mewn unrhyw ffordd.

Gyda nifer o chwaraewyr yn edrych ddim gwell na'r perfformwyr anobeithiol hynny y gwelir ar 'Britain's Got Talent, fe lithrodd Newcastle yn llipa allan o'r Uwchgynghriar bnawn Sul, heb unrhyw fath o ysbryd cystadleuol, angerdd nac awch yn eu chwarae.

Tybed a yw Alan Shearer yn ystyried ei statws fel 'celeb' ac mai 'get me out of here' fyddai ei ymateb orau, gan ddychwelyd i sofa gyffyrddus 'Match of the Day' y tymor nesa, tra bydd y cefnogwyr yn dioddef anghysuron y 'bushtracker trials' wrth geisio achub eu croen ynghanol jyngl y Bencampwriaeth yn Scunthorpe a Doncaster?

'Sob on the Tyne' efallai, ond mae'r Uwchgynghrair yn llawer gwell heb anhrefn ac annoethineb Newcastle, a heb chwaraewyr sydd ddim digon da, a hefyd heb y chwaraewyr hynny sydd wedi gweld dyddiau gwell.

A fydd yna atgyfodiad yn Newcastle, neu a fyddant yn efelychu taith a chwymp Leeds United, Charlton Athletic, a Southampton i Adran Un ar ddiwedd y tymor nesaf ?

Glyn Griffiths.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Gyda Manchester United yn llwyddiannus unwaith eto yn yr Uwchgynghrair, a ffeinal yng Nghwpan Ewrop yn erbyn Barcelona o'u blaenau, mae sylw nifer o bobol yn troi at ddyfodol y rheolwr Syr Alex Ferguson.

Y cyngor mae nifer yn ei gael ynglŷn ac ymddeol, ydi darparu yn fanwl ar ei gyfer, a dyma rhywbeth y gall Syr Alex ei wneud yn hawdd, gan sicrhau fod dyfodol y clwb yn aros o fewn y teulu, a'r linach barhaol yma yn cael ei warantu yn ariannol gan ysbrydoliaeth y teulu Glazers.

Mae brawd Syr Alex, sef Martin Ferguson, eisoes yn bugeilio'r praidd newydd wrth weithio iddo fel sgowt Ewropeaidd, ond draw yn y dwyrain mae seren newydd yn codi.

Gall Syr Alex, yn ei ddoethineb, wneud dim gwaeth na dilyn y seren a'i harwain i aros uwchben stabl y plasdy penagored mawr yn Old Trafford.

Mae bugeiliaid Salford a doethion eraill o'r dwyrain pell eisoes yn pentyrru i'r ganolfan addoli yma yn gyson, a byddant yn siw^r o groesawu seren newydd sydd eisoes wedi ennill dwy bencampwriaeth yn olynnol, ac yn ymddangos fel y dilyniant perffaith i'w dad - ac fe elwir y mab bychan yma yn Darren.

Ie, un sydd eisoes wedi gorwedd ym mhreseb teuluol Syr Alex, sef rheolwr Peterborough United, a mab Syr Alex, Darren Ferguson - rheolwr sydd newydd ennill dyrchafiad i faesydd moethus y Bencampwarieth, flwyddyn ar ôl arwain ei dim o anialwch Adran Dau i borfeydd gwelltog yr Adran Gyntaf.

Be well felly na chael y mab yn cael ei arwain gan ei dad, fel is-reolwr, gan ddarparu'r ffordd a fuasai'n gweld y Darren dirion dalentog yn sicrhau fod swydd y rheolwr yn aros yn y teulu pan ddaw awr ymadawiad Syr Alex?

Ai dyma'r ffordd tua'r dyfodol ar Old Trafford gan sicrhau fod Manchester United yn parhau yn llwyddiannus yn enw y Tad, y Mab a'r Glazers?

Oes gennych chi gynnig gwell?

Cysylltwch....

Glyn Griffiths

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Wn i ddim os mai llongyfarch y Bala, yntau cydymdeimlo â nhw y dylwn wneud.

Ar ôl yr holl drafferth o ennill dyrchafiad i Uwchgynghrair Cymru, mae'r Bala, fel pob tîm arall, wedi dod i ddeall yr wythnos yma mai dim ond y deg tîm uchaf fydd yn cael aros yn yr Uwchgynghrair ar ôl y tymor nesaf, pan ddaw Uwchgynghrair y deg etholedig (neu'r 'Super Ten') i fodolaeth.

Bydd y timau na chaiff eu hystyried fel y detholedig rai yn disgyn yn ôl i'r cynghreiriau is - sef Cynghrair Huws Gray Fitlock Cymru yn y Gogledd, a Chynghrair McWhirter Cymru yn y De, ac yn gorfod brwydro eto am yr hawl i fod ymysg detholion pêl-droed y genedl.

Bydd meini prawf hefyd yn cael eu gosod yn unol â gofynion trwyddedu timau mewn cynghreiriau cenedlaethol, a bydd safle tîm yn y gynghrair yn cael ei ystyried os fydd yna fwy na deg clwb yn ymateb i'r gofynion yma, sydd yn deillio o ganllawiau UEFA.

Dim ond saith clwb sydd wedi llwyddo i gael trwydded eleni (wrth fodloni gofynion sydd yn debyg i'r rheini ar gyfer chwarae yn Ewrop) gan Gymdeithas Bêl-droed Cymru, sef Aberystwyth, Bangor, Caerfyrddin, Llanelli, Port Talbot, Y Rhyl a'r Seintiau Newydd ac mae'n eithaf tebyg mai dyma'r saith tîm fydd yn ffurfio craidd yr Uwchgynghrair newydd.

Os felly, mae tipyn o frwydr o flaen y Bala a'r gweddill os am hawlio un o'r tri safle sydd yn weddill ar gyfer tymor 2010/11, a bydd rhaid ffarwelio â'r Bala dirion deg a nifer o dimau eraill yn fwyaf sydyn, os na ddaw llwyddiant yn fuan.

Pwy a wŷr be all ddigwydd pe bae Casnewydd, Merthyr a Bae Colwyn yn penderfynu ymuno, heb sôn am dimau yn cynrychioli Wrecsam, Abertawe a Chaerdydd.

Ai dyma wir sefyllfa'r gêm yng Nghymru, neu a ddylid ystyried Uwchgynghrair a fyddai, er waethaf barn llawer, yn cynnwys timau sydd ar hyn o bryd yn chwarae o fewn cynghreiriau Lloegr os am gael gwir ystyr i Gynghrair y 'Super Ten' yn hytrach na gweld cynghrair na fydd yn deilwng i fawr neb ond 'Super Ted'?

Wedi'r cwbl, tydi Merthyr druan ddim yn ei chael yn hawdd teithio dros Glawdd Offa'r dyddiau yma.

A oes perygl i eraill wynebu'r un trafferthion, ac onid gwell fyddai edrych tuag adref?

Beth yw eich barn chi? Cysylltwch a gadewch i mi wybod.

Glyn Griffiths

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Helo bawb fy enw yw Owain Llyr - dwi'n gweithio ar raglen C2 ar Radio Cymru ond wythnos nesaf yn cychwyn ar antur anferth ar draws Ewrop fydd yn gweld criw ohonom yn dreifio dros 3000 o filltiroedd trwy 10 o wledydd er mwyn mynd i weld gêm bêl droed.

Na, tyda ni heb golli arni! Mae yna reswm da pam ein bod yn gwneud hyn. Rydym yn cymryd rhan mewn taith o'r enw "Baku or Bust" - taith sydd wedi cael ei threfnu gan Elusen Gôl. Elusen ydi hi â ffurfiwyd ym mis Tachwedd 2002 gan grŵp o gefnogwyr pêl droed Cymru oedd am wneud gwahaniaeth i'r gymuned leol yn Baku, Azerbaijan wrth iddynt ddilyn y tîm cenedlaethol. Yn dilyn ymweliadau gyda nifer o gartrefi plant yn Baku gan roi crysau pêl droed, peli teganau a rhoddion ariannol iddynt, daeth ymweliadau o'r fath yn rhan annatod o'r teithiau tramor hyn.

Felly gan fod gan Gymru gêm yn Rowndiau Rhagbrofol Cwpan y Byd 2010 yn Baku ar y 6ed o Fehefin 'leni, penderfynodd yr Elusen godi arian tuag at Elusennau Azerbaijan a Dwyrain Ewrop trwy gal criwiau o gefnogwyr Cymru i brynu ceir a dreifio'r holl ffordd i Baku cyn rhoi'r cerbyd fel rhodd i Elusen yno cyn hedfan adref ar ôl buddugoliaeth (gobeithio) i Gymru yn erbyn Azerbaijan ar y 6ed o Fehefin

Mae 10 car yn cymryd rhan yn y daith hon - mae 4 arall yn teithio gyda fi sef Osian Edwards, Gerallt Williams, Dylan Owen a Meilir Williams. Llwyddom i brynu cludwr pobl am fargen o £300 yn Rhydaman ddechrau'r flwyddyn ac ers hynny wedi bod yn codi arian trwy gynnal gwahanol weithgareddau.

Tydi cynllunio'r daith ddim wedi bod yn hawdd chwaith. Un o'r problemau mwyaf yw'r ffaith bod Llywodraeth Azerbaijan yn gyndyn o adael cerbydau yr ydych yn eu dreifio ar yr ochr dde i mewn i'r wlad! Problem sydd fwy neu lai wedi ei datrys bellach diolch byth! Dwi'n siŵr y bydd hi ddim yn hawdd bob amser cael ei gadael i mewn i rai gwledydd - yn enwedig gan fod dim un ohonom yn gallu siarad unrhyw iaith yn Nwyrain Ewrop! Ac wrth gwrs, ni allwn fod yn hollol siŵr y gwneith y car gyrraedd pen y daith! Os bydd y cerbyd yn torri i lawr yn Hwngari ella y bydd yn rhaid i ni gerdded i Azerbaijan wedyn!!

Ond mae rhai rhannau o'r daith yn swnio'n ddiddorol dros ben. Mae Kutaisi - 2il ddinas fwyaf Georgia gyda chysylltiad agos a Chasnewydd yma yng Nghymru, ac mae llawer o weithgareddau wedi eu trefnu yno i ni. Rydym yn chwarae yn erbyn tîm pêl droed o'r ddinas pan yno - mewn stadiwm sy'n dal 20,000 o gefnogwyr! Tybed faint ddoith i weld y gêm yna!! Ond mi fydd hi'n grêt cael cynrychioli Cymru mewn gem - a bydd rhaid gwneud yn siŵr ein bod yn ennill!

Rydym yn cychwyn ar ein taith o Gaerdydd ddydd Gwener nesaf yr 22ain o Fai. Mi fyddaf yn recordio digwyddiadau'r daith a bydd ein hanes i'w glywed mewn rhifyn arbennig o Ar Y Marc ar y 13eg o Fehefin. Mi fyddaf yn cadw cofnod o'r daith ar y blog hwn, felly cewch ddarllen fyny am ein hanturiaethau yma!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Diwedd tymor ac amser rhannu'r gwobrau.

Mae Ryan Giggs eisoes wedi ei ddewis yn Chwaraewyr y Flwyddyn, gyda Gareth Owen yn derbyn yr un clod yng Nghymru, ac fe fydd enw Rheolwr y Flwyddyn yn cael ei gyhoeddi cyn hir hefyd.

Yr unig rai na fydd yn cael gwobr ydi'r dyfarnwyr, a heb gyfraniad y dynol rai yma, ni fyddai unrhyw gêm o gwbl yn cael ei chynnal.

Fe allwch ofyn os mai cynnal gêm yntau ei gwneud yn gyffrous mae llawer o ddyfarnwyr,

Fe aeth y cyffro yn hollol Drogbananas nos Fercher wrth i'r dyfarnwr Tom Ovrebo gael ei Lampastio gan chwaraewyr Chelsea ar ôl methu a churo Barcelona yng Ngwpan Ewrop.

Beth ddigwyddodd - anfon Abidal o Barcelona oddi ar y cae am ddim byd? Na. Bai y dyfarnwr oedd y ffaith fod Didier Drogba druan wedi methu'cyfle mwayf euraidd erioed ar ol 53 munud i sicrhau ail gôl. Ond y dyfanwr gafodd y bai, am fethu â rhoi cyfres o benaltis i Chelsea, cyn gweld Barca yn sgorio'r gôl a roddodd Roman termini ar obeithion ymerodraeth gyfandirol Mr Abramovich a'i griw, gan fwrw damnedigaeth uffern ar Stamford Bridge.

Ond yn ôl at y gwobrau - os medr chwaraewr dderbyn esgid aur a'i gosod ar silff ben tân, pam na all dyfarnwr dderbyn chwiban aur yn flynyddol?

Beth am gynnig chwiban yn cynnwys neges berthnasol fel momento o'r gemau gorau efallai, a'r neges hwnnw gan chwaraewyr fel Didier Drogba, gyda chyngor ble i roi y chwiban ddisglair.

Dyma'ch cyfle chi felly i fynegi eich barn am y dyfarnwyr, ond cofiwch wneud hynny mewn dull y gall pawb ei ddeall, a nid mynd yn hollol Dididwlali ynglyŷn â'r peth.

Mae Dafydd ap Gwilym eisoes wedi cael ei ypsetio gan rhywun, yn union fel y cafodd Didier Drogba. Dyma oedd ymateb y bardd o Geredigion:-

" Boed iddo yn ei law lwyth
O faw diawl; ef a'i deulu"

Beth ydi'ch ymateb chi felly? Ewch amdani i ethol 'Dyfarnwr y Flwyddyn' - Ar y Marc'. Pwy fydd eich dewis chi, a pham?

Cysylltwch, a gadewch i ni wybod.

Glyn Griffiths

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Rownd Derfynol arall yng Nghwpan Cymru, a ffwdan arall.

B'nawn Llun nesa bydd Bangor - deiliaid y Cwpan - yn teithio i Barc y Sgarlets yn Llanelli i wynebu Aberystwyth, ond tydi cefnogwyr tim Ffordd Ffarrar ddim yn hapus.

Rhy bell, ar Ŵyl y Banc, a dim tegwch mewn gorfod teithio cyhyd ar adeg mor brysur !

Ydi pob gêm fawr sydd yn ymwneud â Bangor yn gysylltiedig a thrafferthion?

Yn y Drenewydd, y llynedd, anghofiodd rhai o ddilynwyr Bangor sut oedd ymddwyn - ac fe redodd carfan fechan ohonynt ar y cae a chreu anhrefn.

Cafodd clwb Bangor ddirwy o bum mil o bunnau wedi ei gohirio a'u beirniadu gan Gymdeithas Bêldroed Cymru.

Eleni, mae'r Ffeinal mewn stadiwm gyfoes, ddiogel. Ond ers y cyhoeddiad does dim ond cwyno wedi dod o gyfeiriad Bangor, gydag aelod o Lywodraeth y Cynulliad hyd yn oed yn ymuno yn y gŵyn.

Does dim wedi cael ei glywed o'r Cynulliad ynglyn a sefydlu stadiwm newydd yn y Gogledd, ond yn sydyn mae yna drafferthion ynghlwm a theithio i'r De!

Mae rhywun yn amau a oes unrhyw bwrpas i Fangor ennill Cwpan Cymru - gan y byddai yn rhaid teithio i un o wledydd Ewrop wedyn, ac os na fyddant yn teithio i Ddulyn mewn llong o Gaergybi, a fyddem yn clywed mwy o gwyno am deithiau pell ? Wedi'r cyfan mae Lithuania yn llawer pellach na Llanelli.

Da chi, rhowch y gorau i'r cwyno plwyfol, a dowch i ddeall na ellir chwarae pob gêm bwysig yn eich gardd gefn.

Mae plant yr Urdd yn deall,ac yn barod i godi'n fuan a theithio yn bell er mwyn ennill gwobr genedlaethol.

Beth sydd yn rhwystro cefnogwyr Bangor rhag gwneud yr un peth?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?