Ymarfer dy sgiliau llwyfannu
Gwylia’r fideo hwn gan Gwmni Da a gyfarwyddwyd gan Gwion Hallam o gynhyrchiad Cwmni’r Frân Wen o ddrama Aled Jones Williams, Ar Lan y Môr. Mae’n ddarn sy’n seiliedig ar brofiadau cleifion yn Ysbyty Seiciatrig Dinbych. Ateba’r cwestiynau a chymhara dy atebion â’r atebion enghreifftiol.
Question
Sut mae’r olygfa hon wedi ei llwyfannu?
Mae’r olygfa wedi ei llwyfannu gan ddefnyddio dwy set wahanol. Y gyntaf ydy lleoliad awyr agored anffurfiol ar draeth gyda set sy’n cynnwys cadair freichiau’n unig. Mae’r ail yn ystafell ddi-nod, unwaith eto gyda set syml iawn sef cadair o flaen wal wen. Does dim llwyfannu ffurfiol.
Question
Beth sy’n cael ei awgrymu gan y defnydd o gadair freichiau ar y traeth?
Byddem ni’n disgwyl gweld cadair freichiau mewn lleoliad domestig megis ystafell fyw neu lolfa’r Ysbyty Seiciatrig. Mae’r ffaith ei bod ar y traeth yn chwithig ond eto mae’n effeithiol yn weledol. Mae’n awgrymu bod y cymeriad yn dychmygu ei bod ar y traeth ond mewn gwirionedd mae hi wedi ei chau yn yr ysbyty.
Question
Gan fod yr olygfa’n fonolog, beth ddylid ei ystyried wrth lwyfannu?
Dim ond un cymeriad sy’n perfformio monolog felly mae’n bwysig sicrhau mai’r actor ydy’r ffocws. Yn yr achos hwn, y gadair a’r actor ydy’r canolbwynt gyda’r môr yn gefnlen effeithiol.
Question
Pa ddewisiadau cynhyrchu a wnaed o ran propiau a gwisg?
Caiff y propiau eu defnyddio i ychwanegu at y ddeialog a hefyd i gyd-fynd â’r cefndir glan môr ffantasïol. Er enghraifft pan fydd y cymeriad yn hel atgofion am fod ar y traeth gyda’i thad, mae hyn yn cael ei ddangos ynghyd ag amrywiol drugareddau’r traeth megis bwced a rhaw. Mae hyn hefyd yn gwrthdaro â’r dewis o wisg, sef gŵn nos syml sy’n gwreiddio’r cymeriad yn ei realiti sef yr ysbyty seiciatryddol.
Question
Sut mae’r dewis o gerddoriaeth yn cyfrannu at yr olygfa?
Mae’r gerddoriaeth yn gwneud i chi deimlo bod rhywbeth drwg ar fin digwydd ac mae’n adeiladu’r tyndra. Mae ymdeimlad arallfydol i’r gerddoriaeth hefyd sy’n cyd-fynd yn dda ag awyrgylch yr olygfa sydd fel breuddwyd.
Question
Rho enghraifft o newid amlwg yng nghyflymder ac egni’r olygfa.
Ceir newid amlwg o ran cyflymder ac egni tua diwedd y fideo gyda lleoliad yr olygfa yn newid yn realiti a gwelwn y cymeriad yn eistedd yn yr ysbyty seiciatryddol. Mae’r propiau glan môr yn dal i fod o’i chwmpas ond mae effeithiau sain y tonnau a’r gerddoriaeth yn peidio gan newid egni ac ymdeimlad yr olygfa. Mae hyn yn gwneud i’r gynulleidfa eistedd i fyny fel pe baen nhw’n deffro o freuddwyd.
