Dehongli a llwyfannu golygfaPerfformio mewn gofodau llwyfan gwahanol

Pa bynnag siâp fyddi di’n ei ddewis, rhaid i ti ddefnyddio’r gofod yn effeithiol. Gall llonyddwch fod yn bwerus iawn ond os ydy dy waith yn rhy llonydd gallai’r gynulleidfa golli diddordeb.

Pa bynnag siâp fyddi di’n ei ddewis, rhaid i ti ddefnyddio’r gofod yn effeithiol. Gall llonyddwch fod yn bwerus iawn ond os ydy dy waith yn rhy llonydd gallai’r gynulleidfa golli diddordeb.

Os byddi di’n penderfynu llwyfannu gwaith ar ffurf theatr gylch neu dramwy, mae symudiadau’r olygfa’n arbennig o bwysig. Ar unrhyw adeg bydd cefnau rhai actorion at y gynulleidfa ac os ydy’r ddrama’n aros yn llonydd am ormod o amser, bydd y gynulleidfa’n colli mynegiant yr wyneb ac ystumiau a allai fod yn bwysig. Mae angen digon o symud drwy’r gwaith cyfan er mwyn i’r gynulleidfa gael gweld cyfran deg o’r hyn sy’n digwydd ar y llwyfan.

Blocio

Mae penderfyniadau am ble mae actorion yn dod i mewn, yn gadael ac yn sefyll ar y llwyfan yn cael ei alw’n flocio. Mae angen ystyried blocio’n ofalus er mwyn sicrhau bod y gofod yn cael ei ddefnyddio’n dda a bod pawb yn gallu gweld. Er enghraifft os oes gennyt ti ofod mawr ond dy fod yn dewis perfformio yng nghefn y llwyfan neu mewn cornel, fyddet ti ddim yn creu’r darlun gweledol mwyaf diddorol i’r gynulleidfa.

Mae blocio hefyd yn bwysig oherwydd os oes rhaid i actor droi i ffwrdd o’r gynulleidfa i siarad ag actor arall, efallai y bydd y perfformiad yn cael ei golli neu bydd ei bŵer yn llai.

Er mwyn penderfynu lle a phryd mae cymeriadau’n symud, rhaid i ti ddadansoddi’r sgript neu’r olygfa rwyt ti wedi ei dyfeisio yn fanwl.

Chwilia am unrhyw newidiadau clir o ran meddwl neu gymhelliad. Yn aml bydd symudiadau’n cyd-fynd â’r rhain. Er enghraifft gallai sylweddoli rhywbeth yn sydyn wneud i gymeriad godi’n llawn cyffro o’i gadair a cherdded o gwmpas.

Bydd perthynas y cymeriadau hefyd yn dylanwadu ar y symudiadau ar y llwyfan. Os ydy un cymeriad yn cytuno ag un arall gallen nhw symud yn agosach at ei gilydd. Os ydyn nhw’n teimlo’n anghyfforddus gallen nhw symud i ffwrdd.

Y gair am y gofod rhwng perfformwyr, a’r neges mae hynny’n ei chyfleu i’r gynulleidfa, ydy cynefineg. Mae cynefineg, neu ‘defnyddio’r gofod’ yn gallu gwneud gwahaniaeth mawr i unrhyw ystyr a geir mewn rhyngweithio gofodol.

Sylwa ar y ffordd mae’r actorion yn Deffro’r Gwanwyn gan Theatr Genedlaethol Cymru yn sefyll ar y llwyfan. Byddai’n rhaid sicrhau bod y gynulleidfa oll yn medru gweld y merched yng nghefn y rhes.