 | | | | | | Botuar: E premte, 12 mars 2004 - 18:53 CET | | | | Spanja mban zi për viktimat | | | Autoritetet spanjolle po hetojnë nëse sulmet me bomba në mëngjesin e së enjtes në Madrid u kryen nga separatistë baskë apo nga militantë islamikë me lidhje me al-Kaidan.
Një punëtor i ekipeve të shpëtimit numëron të vdekurit |
Media baske thotë se ETA ka mohuar që të ketë kryer sulmin e të enjtes.
Ky mohim u bë në televizionin bask.
Së paku 190 vetë u vranë kur dhjetë bomba shpërthyen në vagonët e trenave në tre stacione treni.
Rreth 1400 vetë të tjerë janë plagosur, shumë prej tyre rëndë.
Autoritetet spanjolle fillimisht fajësuan grupin separatist bask ETA pasi ekspertët lidhën eksplozivët me ato të përdorura herët tjera nga ETA, por ministri i brendshëm Angel Acebes tha se një kamion i vjedhur ishte gjetur në një qytet Alcala de Henares, pranë Madridit me shtatë shpërthyes dhe një kasetë me vargje të Kuranit.
Ndërkohë edhe një gazetë arabe 'Al Kuds al Arabi' me qendër në Londër ka marrë një e-mail ku një grup me lidhje me al-Kaidan thotë se ka kryer sulmet.
Një korrespondent i BBC-së njofton ndërkaq se Spanja po mban tre ditë zie kombëtare për viktimat e sulmeve të djeshme vdekjeprurëse, ndërsa shkollat si dhe disa institucione të tjera janë mbyllur.
Demonstrata masive në të cilat njerëzit do të shprehin zemërimin për gjakun e derdhur dhe solidaritetin me viktimat dhe familjet e tyre janë paralajmëruar të mbahen në gjithë vendin.
Në gazeta sot flitet për masakrën e Madridit duke e quajtur atë si Nëntë Shtatori i Spanjës. Hetimi zyrtar dhe spekulimet publike se kush ishte pas sulmeve vazhdojnë.
Agjencitë sekrete thonë se ka të gjitha tiparet e al-Kaidas, por gjithashtu edhe të grupit separatist bask ETA që lufton për një atdhe të pavarur në Spanjën veriore.
Dënimi i sulmeve
Ndërkohë sulmet janë dënuar në gjithë botën.
Presdienti amerikan Bush foli për një akt terrorizmi vicioz dhe i telefonoi menjëherë kryeministrit spanjoll Aznar për të shprehur solidaritetin e tij me popullin spanjoll.
Sekretari i përgjithshëm i OKB-së, Kofi Anan, ka shprehur shokun dhe zemërimin e tij, kurse Papa i ka përshkruar sulmet si 'fyerje ndaj Zotit'.
Udhëheqësit e Francës, Britanisë dhe Rusisë thanë se sulmet riforcojnë nevojën për bashkëpunim ndërkombëtar për të parandlauar akte të tilla dhune.
Në Tiranë qeveria shqiptare mori vendim për nderimin e viktimave me një ditë zie kurse kryeministri Fatos Nano në një mesazh dërguar homologut të tij spanjoll, krahas ngushëllimeve për këtë akt tragjik ka shprehur vendosmërinë për të vazhduar në një front të përbashkët luftën kundër terrorizmit.
Vlerësime amerikane
Autoritete amerikane ndërkaq kanë premtuar se do të bëjnë ç'është e mundur për të ndihmuar në identiifkimin dhe kapjen e vrasësve. Ata thonë se nuk përjashtojnë mundësinë se edhe grupe të tjera, përveç ETA-s mund të jenë përgjegjëse për sulmet.
Por, sikurse njofton korrespondenti i BBC-së në Uashington, zyrtarët dyshojnë se autor i sulmeve mund të jetë grupi islamik që më parë pretendonte se ka qenë përgjegjës për ndërprerjen e madhe të dritave në Nju- Jork dhe Kanada, vitin e kaluar, mungesa që treguan se nuk kishin të bënin me terrorizmin. | |
| | |
