 | | | | | | Botuar: E enjte, 26 shkurt 2004 - 05:36 CET | | | | Thellohet kriza në Haiti | | | Këshilli i Sigurimit pritet të zhvillojë të enjten një takim urgjent për të gjetur një zgjidhje për krizën që po thellohet në Haiti.
Në qytet janë ngritur barrikada |
Takimi mbahet një ditë pasi Franca propozoi një plan, që përfshin dislokimin e një force civile ndërkombëtare dhe ndihmë ndërkombëtare për të përgatitur terrenin për zgjedhjet presidenciale në vend.
Ministri i jashtëm francez, Dominique de Villepin, tha se ishte koha për një kapitull të ri në historinë haitiane.
Kjo deklaratë shihet nga shumë si thirrje për dorëheqjn e presidentit të vendit, Jean-Bertrand Aristide.
Diplomatët në Kombet e Bashkuara kanë deklaruar se po i studiojnë propozimet franceze.
Sekretari amerikan i shtetit, Colin Powell tha se ka qenë në kontakt me z. Villepin dhe se bisedimet do të vazhdojnë.
"Mendoj se biem dakord që, për të ecur përpara duhet të gjendet një proces politik. Çdo gjë që të bëhet, duhet bërë në mënyrë kushtetuese. Dhe duhet të shqyrthen të gjitha alternativat politike," tha z. Powell.
Barrikada
Ndërkohë, në kryeqytetin e vendit, Port Au Prince janë ngritur barrikada.
Duket se persona të armatosur, besnikë të presidentit të vendit, Jean-Bertrand Aristide po përgatiten për një sulm të forcave rebele.
Aeroporti ndërkombëtar mbetet i hapur, edhe pse shkuarja atje është bërë e rrezikshme.
Shumë qeveri kanë ndërmarë procedura urgjente që shtetasit e tyre të largohen nga vendi sa kanë mundësinë ta bëjnë këtë.
Kanadaja ka dërguar një numër të vogël ushtarësh për të mbrojtur shtetasit e saj ndërsa largohen. Spanja po dërgon një aeroplan çarter.
Marinësat amerikanë, që ndodhen këtu për të ruajtur ambasadën amerikane, shoqëruan një grup punonjësish të OKB-së teksa largoheshin,
Opozita haitiane ka refuzuar një plan të ndërmjetësuesve ndërkombëtarë për formimin e një qeverie koalicioni.
Ata thonë se mënyra e vetme për të shmangur katastrofën që kanoset, është dorëheqja e z. Arstide.
| |
| | |
