 | | | | | | Botuar: E martë, 11 nëntor 2003 - 09:10 CET | | | | Irani ka fshehur të vërtetën | | | Një dokument i besueshëm i Agjencisë Ndërkombëtare për Energjinë Bërthamore, bën me dije se Irani ka dështuar, disa herë rradhazi, të deklarojë përmbajtjen e plotë të programit të tij bërthamor, mirëpo ka filluar të bashkëpunojë aktivisht me Kombet e Bashkuara muajin e kaluar.
Diplomatët thonë se raporti paraqet faktin se Irani ka prodhuar sasi të vogla të uraniumit të pasuruar dhe të plutoniumit, materie këto që mund të përdoren për prodhimin e bombës bërthamore.
Agjencia thotë se nuk ka shenja se Irani po zhvillon armë në mënyrë të fshehtë, por tërheqë vërejtjen se do të kalojë kohë deri sa të arrihet në përfundim se qëllimet bërthamore të Iranit janë paqesore.
Irani thotë se që nga dita e sotme ka pezulluar përkohësisht prodhimin e uraniumit të pasuruar.
Një korrespondent i BBC-së në Washington thotë ndërkaq se njoftimet e fundit, nëse janë të konfirmuara, do të shtojnë drojën në SHBA se qeverisë së Iranit nuk mund t'i besohet dhe se, siç thotë ai, çdo marrëveshje e mëtejme me qëllim të parandalimit të krijimit të armëve bërthamore nga ana e Teheranit, duhet të mbikëqyret ashpër.
Por si në rastësi njoftimet, se Irani ka shkuar më larg në rrugën bërthamore se sa është pranuar më parë, erdhën kur sekretari amerikan i shtetit, Colin Powell, nisi një tjetër sulm mbi regjimin e Teheranit.
Klerikët mendjengushtë atje, tha sekretari i shtetit, e kanë shtyrë Islamin drejt një rruge politike.
Populli i Iranit e do lirinë e tij , tha zoti Powell. | |
| | |
