KALLATTIIN, Tiraamp dhimma Ulaa Hormuz'tiin Iraan irratti tarkaanfii hamaa fudhachuuf dhaadannaan gatiin boba'aa gadi bu'e

Haguuggii Tamsaasa Kallattii

1. Sa'aatii 3 duraBiyyoonni Arabaa halkan haleellaan raawwatamaa buluu himan, eessafaatti?

   US fi Israa'el wayita Iraan irratti haleellaa raawwachuu itti fufan, akkasumas wayita Israa'el cimsitee Libaanos haleelaa jirtutti, Iraan haaloo ba'uuf biyyoota Galoo Galaanaa keessatti haleellaa raawwachuurraa duubatti hin jenne.

   Sa'uudii Arabiyaan misaa'ela baalistikii fi dirooniiwwan shan qolachuu ibsite.

   Humni waraanaa Kuweet dirooniiwwan ja'a qilleensarratti qolachuu fi barbadeessuu ibseera.

   Magaalaa Bahreen, Manama keessatti dubartiin umrii waggaa 29 tokko ajjeefamuu booda mootummaan biyyattii sagalee akeekkachiisaa dabarsaa ture, jiraattonni akka iddoo dahannaa dhokatanis akeekkachiiseera.

   Ministeerri ittisaa Yunaayitid Arab Emireetis (UAE) halkan irraa eegalee hanga yoonaa ''misaa'elootaa fi dirooniiwwan Iraan'' qolachuutti akka jiru ibseera.

   Kanaafis sirna ittisaa haleellaa qilleensaa fi jettiiwwan waraanaa bobbaasuu ibse.

   UAEn qontsilaa ishee kaaba Iraaq, Erbil jiru irratti haleellaan Iraan raawwatamuu fi mancaatiin mudachuu ibsiteetti.

2. Sa'aatii 3 duraTiraamp waa'ee taphattoota garee biyyaalessaa Iraan maal jedhe?

   Tiraamp duraan baqattoota Iraan kanneen Ameerikaatti koolu-galtummaa gaafatan hari'ee ture.

   Amma ammoo dhimma taphattoota garee biyyaalessaa Iraan keessa galuun akka tumsuu barbaadu ibseera.

   Gareen dubartootaa Waancaa Eeshiyaa keessaa erga kufanii booda Awustiraaliyaan taphattoota shaniif viizaa kenniteetti.

   Wiixata kaleessaa Tiraamp akka Awustiraaliyaan garee kubbaa miillaa dubartootaa Iraaniif ''koolu-galtummaa kennitu'' gaafatee ture.

   ''Yoo diddan US taphattoota kunneen ni fudhatti,'' jedhe.

   Tiraamp erga kana jedhee sa'atii tokko booda Ministira Muummee Awustiraaliyaa waliin dubbachuu fi ''taphattoonni shan viizaa argachuu'' akkasumas kaaniifis tajaajilli walfakkaataa qophaa'aa jiraachuu ibse.

   Tiraamp dhimma taphattoota kunneenii akkasiin maxxansuun kan isaan yaaddesse taphattoonni shamarranii kunneen, maatiisaanii biyya jiraniif waan sodaataniif ''biyyatti deebi'uu akka qaban'' yaada dhiheessanii turan.

   Bulchiinsi Tiraamp ji'oota dura lammiilee Iraan kanneen Ameerikaatti koolugaltummaa gaafatan hari'ee kan ture yoo ta'u, amma haala kanaan dhimma taphattoota keessa galuun shakkii uumeera.

3. Sa'aatii 4 duraHaleellaa Israa'eliin Libaanos keessaa namoonni kuma 700 ta'an buqqa'uu qondaalonni biyyattii himan

   Mootummaan Libaanos akka jedhutti, waraanni kallattii kibba biyyattiirraa ka'uun babal'ataa jiru lammiilee biyyattii kumaatamaan lakkaa'aman qe'eerraa buqqiseera.

   Hanga ammaatti namoonni kuma 700 ta'an marsariitii deeggarsa namoomaa irratti akka baqattootaatti galmaa'aniiru.

   Mootummaan biyyattii dawoo baqattootaa 560 ijaaruu ministirri dhimma hawaasummaa Haneen Sayed ibseera.

   Jaarmiyaan Nyaataa Addunyaa UN Libaanos jiru erga waraanni kun eegalee namoota kuma 200 ta'aniif deeggarsa nyaataa fi maallaqaa taasisuu ibseera.

   Dhiheenya kana Israa'el handaara magaalaa Beeruut irratti xiyyeeffachuun haleellaa gaggeessaa jirti.

   Kunis erga Hezbollaan ajjeefamuu hoogganaa olaanaa duraanii Iraan, Alii Kaameenii haaloo ba'uuf Israa'el irratti haleellaa raawwatteeti.

   Hezbollaan ammas haleellaa ofirraa ittisuu malee furmaata biraa akka hin qabne himeera.

   Aanga'aan Hezbollaa Mohammad Raad haleellaa Israa'el ofirraa deebisuuf gatii barbaachisu hunda ni kaffalla jechuun AFPtti hime.

   Qondaalli kun erga Pirezidantiin Libaanos Joseef Aawon haleellaan lafoo, qilleensaa fi galaanarraan Israa'el raawwachaa jirtu guutummaatti akka dhaabbatu waamicha dhiheesseetu ibsa kana kenne.

   Odeefannoo kanaan walqabatan biroof:

   'Ani hidhannoo hiikkannaan Libaanos ni diigamti'- Hezbollaa

   Libaanos eenyutu bulcha, Hezboollaan hoo aangoo akkamii qaba?

   Marsaa ja'an Israa'el Libaanosiin weerartetti wantoota raawwataman

4. Sa'aatii 5 duraYeroo kanatti Raashiyaan Iraan waliin hariiroo cimsachuun Tiraamp fi Putiin gidduutti maal uuma?

   Raashiyaan waraana US-Israa'el fi Iraan gidduutti gaggeeffamaa jiru keessatti Iraan gargaaraa jirti gabaasi jedhu erga ba'ee booda Tiraamp fi Puutin bilbilaan dubbataniiru.

   Dhuma torbee darbee kana [Sambataa fi Dilbata] miidiyaaleen US- Washington Post, New York Times, fi Associated Press qondaalota osoo maqaasaanii hin eerin wabeeffachuun Raashiyaan tajaajila adda addaa Iraaniif kennaa jiraachuu gabaasan.

   Akka gabaasa miidiyaalee kunneeniitti Moskoon tajaajila tikaa fi odeeffannoo wiirtuuwwan humna waraanaa fi loltoota US Baha Giddugaleessaa keessa jiran haleeluuf gargaaruun Iraan tumsaa turteetti.

   Raashiyaan garuu Iraan tumsaa jiraachuu ifatti hin dubbanne.

   Haata'u malee haleellaan Iraan irratti raawwatamu ''itti gaafatamummaa kan hin qabnee fi gocha badaadha,'' jechuun balaaleffatteetti.

   Iraan akka buufataalee waraanaa US haleeltu tumsuun hariiroo Moskoo fi bulchiinsa Tiraamp gidduu jiru kan xureessuudha.

   Raashiyaa fi US bara kana dhimma waraana Yukireen xumuruu irratti yeroo hedduu waliin mari'ataniiru.

   Waayit Haawus ifatti Raashiyaan haala adda addaan Iraan tumsaa jiraachuu hin ibsine, garuu tumsi akkasii yoo jiraate garaagarummaa bal'isa jedhe.

   Tiraamp waa'ee odeeffannoo argachuun Iraan ilaalchisee ''waan torbee darbe Iraan irratti raawwatame yoo fudhatte, odeeffannoo argataa turan yoo ta'e odeeffannichi isaan gargaaraa hin jiru jechuudha,'' jedhe.

   Ergamaan addaa Tiraamp, Istiiv Witkof [kan Tiraamp bakka bu'ee Raashiyaa waliin mari'atu] Raashiyaan odeeffannoo tikaa fi basaasaa Iraaniif qooduu ilaalchisee homaa dubbachuurraa of qusateera.

5. Sa'aatii 6 duraTiraamp dhimma Ulaa Hormuz irratti Iraan cimsee akka adabu erga dhaadatee booda gatiin boba'aa hir'ate

   Pirezidant Tiraamp daandiin boba'aan addunyaa hedduun irra geejjibsiifamu, Ulaan Hormuz, haleellaa Iraaniin danqamuu ilaalchisee akeekkachiisa kenneera.

   ''Iraan boba'aan akka Ulaa Hormuz keessa hin dabarre yoo goote kan ammaa yeroo digdama caalaa Ameerikaadhaan haleelamti,'' jedhe.

   Boba'aa addunyaa keessaa dhibbeentaa 20 kan ta'u karaa kanaan darba. Ulaan kun danqamuun addunyaarratti hanqinni boba'aa akka mudatuu fi gatiin garmalee akka dabalu taasiseera.

   Tiraamp dhaadannoosaa wayita itti fufu ''qiyyaafannoowwan salphaatti rukutamuu danda'an rukunnee mancaasna. Akka lamuu hin deebinetti barbadeessina. Duuti fi haleellaa hamaan isaan eeggata,'' jedhe.

   ''Garuu akka kun hin taane nan abdadha, nan kadhadhas.''

   Kana malees Tiraamp waraanni kun ''yeroo gabaabaa keessatti ni xumurama,'' jedheera. Garuu ammoo US ''ammallee guutummaa hin injifanne,'' jedhe.

   Ibsa Tiraamp kenne kana hordofee gatiin boba'aa addunyaarratti baarmeeliin tokko hanga doolaara 120 ga'ee ture hir'ateera. Daballiin gatii boba'aa kun erga bara 2022 as isa guddaadha.

   Gabaa Eeshiyaarratti ganama kana gatiin boba'aa baarmeelii tokkoo dhibbeentaa 8.5 ta'uun hir'ateera. Kana jechuun gara doolaara 92.5 ta'eera jechuudha.

   Ameerikaatti ammoo dhibbeentaa 9n hir'achuun, gatiin boba'aa baarmeelii tokkoo doolaara 88.6tti hir'ateera.

   Haata'u malee ammas taanaan gatiin boba'aa kan waraana dura ture harka 30n caalee jira.

6. Sa'aatii 6 duraYooyyaa!

   Akkam bultan hordoftoota keenya?

   Tamsaasa kallattii eegalleerra. Waraana US-Israa'el fi Iraan akkasumas dhimmoota biyya keessaa fi alaa irratti odooffannoo jiran karaa kana isin biraan geenya.

   Odeessaalee tamsaasa kallattiin dhiheessaa turre:

   Misaa'elaafi diroonii Iraan itti dhukaafte Turkii, Kataar fi UAE'n qolatan

   Mojtaabaa Kameenii bakka abbaasaa bu'uun hogganaa olaanaa Iraan ta'e

   Iraan ollootasheee haleelte dhiifama gaafattus haleellaan itti fufe

   Odeessaalee kaanis ni argattu, nu hordofaa!