Waa'ee cidha 'guddaa waggaa kanaa' maal beekna?

Hundeessaan Amaazon Jeef Bezoos fi kaadhimaan isaa Laawuran Saanchez mormiin isaan quunnamuus cidha guddaa guyyaa sadiif turuun torban kana Xaaliyaanitti gaa'ila raawwachuuf jedhu.

Cidhi dolaara miiliyoona baay'ee itti bahu kuni falmii akkasumas hiriirri mormii isa qunnamuus ittuma fufee gaggeeffamuuf jedha.

Kuni, biiliyeenara beekamaa Jeef Beezofis ta'e Televijinii Fox akkasumas ABC irratti sagantaa qopheessituun kan beekamtu Laawuran Saanchezif gaa'ila lammataati.

Cimdiiwwan lamaan waggoota muraasa darbaniif wal faana turaniiru, waggaa lama duras wal kaadhimmataniiru.

Waa'ee cidha kana odeeffannoon dabalataa hin baane - garuu akka jalqaba gabaafametti taanaan giddugala magaalattii keessatti gaafa sambataa ni xumurama.

Haa ta'u malee, baasiin cidhaaf bahuufi cidha kanaan walqabatee mormiin ka'e qopheessitoota sagantichaa bakka cidhaa akka ergan dhiibbaa irraan geessisuu hin oolle.

''Nuti kanaan boonna. Nuti eenyuyyuu miti, maallaqa, homa hin qabnu,'' jechuun namni Tommaso Cacciari jedhamu BBC'tti dubbate.

''Nuyi lammiilee of ijaaruun namoota addunyaarratti dhageettii guddaa qaban - biliyeenaroota magaalaa keessaa baasuu dandeenyedha,'' jechuun hime.

Aangawoonni magaalattiii namoota beekamoo akkanaa keessummeessuun magaalattiif galii ta'u himuun rogeeyyii danqaa uuman qeeqaniiru.

''Mormitoonni kuni akka waan Veenis dhuunfatanitti sosso'u, garuu akkanaa miti,'' jechuun qondaalli magaalichaa dhimmi dinagdee isaan ilaallatu, Simoon Venturinii BBC'tti himan.

''Eenyu asitti bultiii akka ijaarratu namni murteessu hin jiru,'' jedhan.

Waggaa kana barruun Foorbis Jeef Beezos dureeyyii addunyaarra jiran keessaa sadarkaa 4ffaarra jira jedhee ture.

Qabeenyi isaaniis dolaara biiliyoona 227'tti tilmaamame.

Dureessi kuni hundeessaa gabaa daldala onlaayinii beekamaa, Amaazon, akkasumas dhaabbata Blue Origin namoota hawaatti imalchiisudha.

Cimdiiwwan lamaan bultii isaanii duraaniirraa ijoollee torba godhataniiru.

Beezos gaa'ila Maakenzii Iskoot waliin qaburraa ilma sadiifi dubartii guddifataan fudhatan tokko qaba.

Erga waggoota 25'f waliin turan booda gaa'ila isaanii diiguu bara 2019 beeksisan.

Cimdiiwwan lamaan yeroo adda bahan haati warraa yoo xiqqaate dolaara biiliyoona 35 qooddatteetti.

Seenaa gaa'ila diigame keessatti kuni maallaqa isa olaanaadha.

Haati warraa duraanii qooda Amaazon keessaa qabu 4% ta'eefi $35.6bn tilmaamamus inuma qabdi.

Gama kaaniin, Laawuran Saanchez, ganna 55, paayileetiii helikooftaraa eeyyama qabduufi dhaabbata Black Ops Aviation jedhamu nama hundeessitedha.

Dhaabbati kuni dhaabbata filmii hojjetuufi qabeenyummaan isaa kan dubartii ta'eefi dubartiin sosso'udha, akka dhaabbatichi ibsetti.

Taphataa NFL duraanii abbaa warraashee ta'erraa ilma tokko qabdi. Waggoota 14'f waliin jiraatanii turan.

Eenyutu cidha kana mormaa jira?

Cidha kana gartuuleen hedduu mormaniiru. Kanneen keessaa Veenis keessatti dhimma turizimii irratti kanneen sagalee dhageessisan jiru.

Akkasumas rogeeyyiin jijjiirama qilleensaa Beezos Tiraampiif deeggarsa taasisuu isaa mormaniis jiru.

Kaan immoo cidhi kuni gar tokkoo magaalaa kanaa ni cufa jedhanii mormii dhageessisan.

Sagantaan cidhaa kuni Kamisa Bataskaana seena qabeessa 'Madonna dell'Orto' biratti eegala jedhame.

Bulchiinsi magaalaa Veenis gaafa Roobii ajaja baaseera. Ajaji kunis bakka sana namni biraa akka hin dhufnedha.

Kunis, sochii rogeeyyii mormii dhageessisan biraa hambisuu yaadameeti,

Eenyutu affeerame?

Keessummoonni 200 ta'an affeeramaniiru.

Intalli Pirezidant Donaald Tiraamp, Ivaankaa Tiraamp, akkasumas abbaan warraa ishee Jaared Kushiner buufata xiyyaaraa Veenisitti mul'ataniiru.

Akkasumas taatoofi namooti beekamti olaanoo qaban kanneen akka Kim Kaardaashiyaan, Kiriis Jeener, weellistuu Keeti Peeriifi kaan affeeramaniru.

Hundi isaanii sagantaa cidhaa kanarratti argamu jedhamee amanama.

Akkasumas qopheessituun sagantaa TV beekamtuu, Opraah Winfiree, taatoo beekamaa Liyoonaardoo Dikaapiriyoofi kaanis ni eegamu jedhamee odeeffameera.

Akka miidiyaa Xaaliyaaniitti, hoteelonni gatii qaalii magaalattii keessa jiran hundi qabamaniiru.

Jeettiiwwan dhuunfaa buufata xiyyaaraa Veenis marsuu danda'u, dooniiwwan gatii qaalii dabalatee jechuudha.

Akkasumas miseensonni humna galaanaa duraanii US tajaajila nageenyaa kennuuf qacaramaniiru gabaasi jedhuus jira.

Sagantaan cidha kanaa dolaaraa miiliyoona 55.69 fudhachuu danda'a jedhamee eegama.

Kana kan dubbatan pirezidantii bulchiinsa naannawa Venetoo (Veenis dabalata) Lukaa Zayiyaadha.

Magaalaa Veenisitti cidhi gatiin guddaa itti bahe yeroo qophaa'u kuni kan duraa miti.

Bara 2014, taatoon beekamaa Joorj Kiluunii ogeettii seeraa Amaal Alamuddiin waliin bultii yeroo ijaarratan taatoowwab beekamoo magaalaa kana dhiphisanii turan.

Yeroos garuu akka Beezos kana mormiin irratti dhihaate hin jiru.