Wo ìtàn ayé Seyi Makinde, gómìnà kejì tó wọlé fún sáà kejì l‘Oyo

A bi Makinde ni ọjọ kẹẹdọgbọn oṣu kejila ọdun 1967 sinu idile Pa Olatubosun Makinde ati Madam Abigail Makinde ti agboole Aigbofa ni Oja’ba, Ibadan, ipinlẹ Ọyọ.

O lọ si ile ẹkọ alakọbẹrẹ 'Michael’s Primary School,' Yemetu nilu Ibadan ati 'Bishop Phillips Academy,' Iwo Road Ibadan.

Ṣeyi Makinde lọ ile ẹkọ giga Fasiti ipinlẹ Eko ni Akoka Yaba, nibi ti o ti kẹkọọ gboye imọ nipa ẹrọ ina mọnamọna, 'Electrical Engineering' lọdun 1990.

Bakan naa lo kẹkọọ gboye imọ nipa amojuto awọn ileeṣẹ nla, 'Industrial Control Services' ni Houston, Texas lorilẹede Amẹrika lọdun 1998.

O tun lọ sile ẹkọ imọ nipa idagbasoke esi iṣiro, 'Development of Analytical Competence' ni ile ẹkọ fun idokowo nipinlẹ Eko (ti o ti di Fasiti apapọ ilẹ Adulawọ bayii) lọdun 1999.

Ọdun 1997 ni Makinde bẹrẹ iṣẹ aladani tiẹ lẹ́yìn tó kúrò láwọn ileeṣẹ́ elépo rọ̀bì

O kẹkọọ nipa ayẹwo epo rọbi ile ẹkọ 'Jiskoot Auto Control Training Centre', Kent lorilẹede England lọdun 2002.

Bakan naa lo lọ ile ẹkọ imọ nipa bi a ṣe n yanju awọn iṣoro idokowo ni ile ẹkọ giga 'Massachusetts Institute of Technology,' lorilẹede Amẹrika lọdun 2005.

Makinde ṣiṣẹ pẹlu ileeṣẹ epo rọbi 'Shell Petroleum Development Company' fun ọdun meji lati 1990 si 1992 gẹgẹ bii Onimọ ẹrọ.

Lẹyin eyii lo ṣiṣẹ fun ileeṣẹ 'Rebold International Limited' gẹgẹ bii Onimọẹrọ ati igbakeji alamojuto laarin ọdun 1992 si 1997.

Lọdun 1997 ni Makinde bẹrẹ iṣẹ aladani tiẹ gangan ti o pe orukọ rẹ ni, 'Makon Engineering and Technical Services Limited (METS) lẹyin ti o ti ṣiṣẹ pọ pẹlu awọn ọkanojọkan ileeṣẹ epo rọbi fun ọdun marun un gbako.

Seyi Makinde ni gomina ipinlẹ Oyo keji ti yoo wọle fun saa ikeji lẹyin Abiola Ajimola

Lẹyin ọpọlọpọ ọdun ti iṣẹ adani rẹ bẹrẹ ni Makinde darapọ mọ ọrọ oṣelu.

Oriṣiriṣi ẹgbẹ oṣelu lo darapọ mọ, ki o to di pe o di ọmọ oye fun ẹgbẹ oṣelu 'People’s Democratic Party (PDP)' lọjọ kọkandinlọgbọn oṣe kẹsan an ọdun 2018.

Makinde si lo jawe olubori ninu eto idibo si ipo Gomina ti o waye lọjọ kẹtalelogun oṣu keji ọdun 2019, pẹlu onka ibo 515, 621.

Orukọ aya Ṣeyi Makinde ni Tamunominini Makinde. Igbeyawo si ti ṣatiwaye awọn ọmọ mẹta ọtọọtọ ti orukọ wọn n jẹ, Feyi, Tayọ ati Tobi.

Lọwọlọwọ bayii, Makinde lo bori ibo gomina to waye ni ọjọ Satide, ọjọ Kejidinlogun osu kẹta ọdun 2023.

Oun si ni gomina ipinlẹ Oyo keji ti yoo wọle fun saa ikeji lẹyin Abiola Ajimola to se saa keji lori aleefa nipinlẹ Oyo.