Қиролича Би-би-сининг янги биносини расмий тарзда очиб берди
Британия қироличаси Елизавета II Би-би-сининг Лондон марказида жойлашган New Broadcasting Houseга ташриф буюриб, тантанали маросимда иштирок этди.
Қиролича Би-би-сининг янги биносини катта хурсандчилик билан очаётганини билдирди.
Тантанали маросим Би-би-си Радиосининг бир нечта канали орқали махсус транслация қилинди.
Би-би-си оффисига Қироличанинг турмуш ўртоғи шаҳзода Филип билан ташриф буюриши кутилган эди. Бироқ Букингем саройидан билдирилишича, шаҳзоданинг тоби қочганлиги туфайли Лондон касалхонасига ётқизилган.
Қироллик қабули
Эрталабдан Би-би-си биноси олдида қироличани кўришни хоҳлаганлар йиғилаётганини кўриш мумкин эди. Улар мовий рангли костюм ва шляпа кийган қироличани қўлларида байроқчалар билан кутиб олишди.
Би-би-си ходимлари ҳам қироличани катта қизиқиш билан қаршилашди.
Елизавета II бинонинг уч қаватида, хусусан Би-би-си Жаҳон хизмати жойлашган қисмида бўлган, унга Би-би-си Бош директори Тони Холл ҳамроҳлик қилди ва жонли эфирда шаҳзода Филипга соғлик тилади.
Қиролича Би-би-сининг етакчи ва ёш журналистлари билан учрашиб, уларга янги бинода муваффақиятлар тилади.
New Broadcasting Houseда Би-би-сининг тўққиз радиостанцияси, уч телеканали жойлашган, бинода олти мингдан ортиқ ходим ишлайди.
