Суриядаги жангларда қатнашган АҚШнинг собиқ аскарига олий жазо берилиши мумкин
Америкалик собиқ аскар "Ал-Қоида"га алоқадор жангари гуруҳ сафида Сурия ҳукумат кучларига қарши курашгани учун ватанида маҳкамага тортилган.
Қораловчига кўра, 30 ёшли Харруннинг ҳаракатлари инсон ўлимига олиб келгани исботланса, унга олий жазо берилади.
Хабарларда айтилишича, 2000- 2003 йиллар АҚШ армиясида хизмат қилган Харрун Сурияда "Фронт ал-Нусра" исломий гуруҳи тарафида туриб исёнчиларга кўмаклашган.
Ироқдаги "Ал-Қоида"га алоқадорлиги айтиладиган "Фронт ал-Нусра" Ғарбда террористик гуруҳлардан саналади.
Тергов давомида Эрик Харрун Сурияда 10 кишини отганини, улардан кимдир тирик қолганини билмаслигини айтган.
Виржиния штатидаги маҳкамада уни гаров эвазига озод қилиш сўрови рад этилган.
Айбловга кўра, Харрунга Сурияда исёнчиларнинг матбуот воизи бўлиш таклиф қилинган, лекин у хоҳламаган.
Харруннинг ҳимоячиси уни АҚШ манфаатлари учун курашгани, Америка ҳам Башар ал-Ассад тузуми қулаши тарафдори эканини таъкидламоқда.
Ҳимоячилар фикрича, Америка мақсадлари билан мос тушадиган ишда айбланаётган одамга ҳукм чиқариш осон бўлмайди.
Эрик Харрун 2003 йил соғлиги важидан армия хизматидан озод қилинган.
2013 йил январда Сурияга келиб, исёнчиларга қўшилади.
Харрун икки видеороликда "Фронт ал-Нусра"нинг жангларини гапириб бергани акс этган. Биттасида у Башар Ассадга мурожаат қилиб, унга ўлим тилайди.
Март ойида у Истамбулдаги Америка элчилигига ўз ҳоҳиши билан борган ва сўроқ қилинган.
Сурия
Суриядан олинган охирги хабарларга кўра, Дамашқда жанглар кетмоқда.
Сурия ҳукумати БМТнинг кимёвий қурол ишлатилганлигини аниқлаш комиссиясига мамлакатда текшириш ўтказишга рухсат бермаган.
Олдинроқ Сурия ҳукумати Алеппода исёнчилар кимёвий қурол ишлатганларига ишонишини айтган эди.
Маълумотларга кўра, кимёвий ҳужум қурбонлари 26 киши бўлиши мумкин.
