Янгиликлар: Украина қўлида Бахмутнинг фақат чорак қисми қолдими? АҚШ Киевга қачон қирувчи самолёт беришини айтди Dunyo, Rossiya

Американинг Урушни тадқиқ қилиш институти Россия қўшинлари сўнгги ҳафтада Бахмутда жиддий силжиш қилганини ва энди шаҳарнинг 65 фоизини бошқараётганини айтди. Бироқ Британия разведкаси маълумотлари ушбу даъволарни рад қилмоқда. АҚШ Мудофаа вазири Украинага қирувчи самолёт юбориш ҳақидаги саволга жавоб берди.

Американинг Урушни тадқиқ қилиш институти (ISW) сўнгги ҳисоботида айтишича, россияликлар сўнгги ҳафтада Бахмутнинг яна тахминан 5 фоизида назорат ўрнатган ва энди шаҳарнинг қарийб 65 фоиз қисмини бошқармоқда.

ISW нинг Россия манбаларига ва геолокацияси аниқлаштирилган видеоларга таяниб ёзишича, "Вагнер" жангчилари жанубдан шаҳар марказидаги бозор ва маданият уйигача кириб борган. Институтга кўра, шимолий-ғарб томондан эса Вагнер АЗОМ - рангли металларни қайта ишлаш заводини тўлиқ қўлга олган.

Британия разведкаси Вагнер гуруҳи АЗОМ заводини босиб олганини тасдиқламади.

Британия Мудофаа вазирлиги разведка бошқармасининг айтишича, Украина шарқидаги Бахмут учун жанглар давом этмоқда. Бошқарма жанг шиддати ўтган ҳафталар билан солиштирганда бироз сўнганини айтган.

Бугунги ҳисоботда айтилишича, Украина аскарларининг энг муҳим ютуқларидан бири Вагнер гуруҳини 0506 автомобил йўлидан сиқиб чиқаргани бўлган. Қишлоқ аҳамиятидаги ушбу йўл Бахмут ҳимоячилари таъминоти учун муҳим йўналиш бўлиб қолаётганди. Олдинроқ Вагнер жангчилари ушбу йўлдан атига юзлаб метр нарида жойлашганди.

26 март куни Россия ОАВ Вагнер гуруҳи АЗОМ заводи устидан тўлиқ назорат ўрнатганини ёзганди. Бироқ Британия разведкаси маълумотларига кўра, ушбу ҳудудда жанглар ҳамон давом этмоқда.

Разведка бошқармасига кўра, Вагнер гуруҳида жангчилар сонини етишмаслиги ҳужумлар сонига таъсир қилмоқда.

Британия разведкасининг сўнгги ҳисоботи ISW маълумотларига тўғри келмаган. ISW Вагнерчилар заводни тўлиқ босиб олганини ёзганди.

ISW ўз маълумотларини тарқатишда Россия манбалари ва геолокацияси тасдиқланган видеоларга таянган бўлса, Британия разведкаси ҳар доимгидек ўз манбаларини ошкор қилмаган.

Украина қуролли кучлари ҳам Бахмут учун жанглар давом этаётгани ва аскарлари шаҳарни мардановор ушлаб турганини айтган.

Украина президенти Володимир Зеленский агар Бахмут таслим бўлса, "Путин ушбу ғалабасини Ғарб, ўз халқи, Хитой ва Эронга сотишини" айтган.

"Биз бир қадам ҳам чекина олмаймиз, чунки уруш бу пирогга ўхшайди - бўлаклардан иборат бўлади. Кичик ғалабалар, майда қадамлар билан", деган Зеленский.

Сенати қўмитаси йиғилишида чиқиш қилган АҚШ Мудофаа вазири Ллойд Остиннинг айтишича, Киев зўр бериб талаб қилаётган F-16 қирувчи учоқлари урушнинг айни босқичида Украинага ёрдам беролмайди.

Унинг таъкидлашича, Пентагон Украина учун ҳаво ҳужумидан мудофаа тизими, узоққа отувчи қуроллар ва зирҳли техника энг кераклиси деб ҳисоблайди.

"АҚШ ушбу қуролларни Украинага етказишда ва украин ҳарбийларини уларни бошқаришга ўргатишда давом этади. F-16 қирувчиларига келсак, қарор қабул қилиб, улардан фойдаланишни бошлагунга қадар 18 ой керак бўлади. Бироқ урушнинг ҳозирги босқичида улар Украинага ёрдам беролмайди", деган Остин.

Остиннинг айтишича, Пентагон Украина ҳарбий самолётларни "келажак"да олишига ишонади. Ушбу самолётлар F-16 ёки бошқа тўртинчи авлод самолётлари бўлиши мумкин. АҚШ Украина эҳтиёжини таъминлаш учун ҳамкорлар билан биргаликда ишлашда давом этишини билдирди.

Олдинроқ Украина президенти Володимир Зеленский яна бир бор ғарблик ҳамкорлари Украинага ҳамон жанговар самолётларни бериш борасида бир қарорга келмагани ва Россия босиб олган ерларни озод қилиш учун бошқа қуролларни етказиб беришда сусткашликка йўл қўяётганини айтди.

"Замонавий ҳарбий самолётлар масаласига келсак, ҳамон олдингидек ҳеч нарсамиз йўқ", деган у Associated Press нашрига берган интервюсида.

Полша ва Словакия Украинага совет давридан қолган қирувчи учоқларни беришга қарор қилган. Бироқ бирорта Ғарб давлати Украинага замонавий самолётлар беришга ҳануз рози бўлмади.

Уларга кўра, бу қарор урушнинг янада авж олишига олиб келади ва Украинанинг Россия ҳудудларига зарба бериши эҳтимолини орттиради.

Бундан ташқари Ғарбдаги масъулларнинг таъкидлашича, украиналик учувчиларни ўқитиш, ерда авиация учун техник дастакни таъминлаш учун вақт керак, бу эса қирувчи учоқларни қисқа вақтда етказиб беришни бесамарга чиқариши мумкин.

Ҳаво ҳужумидан мудофаа тизими ҳақида гапирган Зеленский Вашингтон томонидан ваъда қилинган Patriot ҳануз Украинага берилмагани ва Киев айрим ҳимоя тизимларини қайтаришга тўғри келганидан шикоят қилган.

"Пэтриотлар борасида буюк қарорни кўрдик, аммо реалликда улар йўқ", деган Зеленский.

Президентнинг айтишича, Украинани Россия ракеталаридан ҳимоя қилиш учун 20 та Patriot батареялари керак, аммо бу ҳам етмай қолиши мумкин. "Чунки дунёдаги бирор давлат бундай сондаги баллистик ракеталар ҳужумига учрамаган".

Зеленскийнинг айтишича, Европа давлатларидан бири Украинага ҳаво ҳужумидан мудофаа тизимин берган, аммо у ишламаган. Уни алмаштириш учун қайтаришган ва бу жараён қайта-қайта давом этган.

Президент гап қайси давлат ҳақида кетаётганини айтмаган.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002