Янгиликлар: Хитой Президенти Россияга нега келяпти? Урушда Украинани қўлламаганларни нима кутяпти? Путин, Дунё

Хитой президенти Ши Жинпин келгуси ҳафта Россия президенти Владимир Путин билан музокаралар ўтказиш учун Москвага келади. Украина уни қўлламаганлар билан келажакда ҳисоблашишини айтди.

Кремлнинг айтишича, президентлар "кенг қамровли шериклик ва стратегик ҳамкорлик" масалаларини муҳокама қилади.

Ташриф Россия иттифоқчиси Хитойнинг Украинадаги урушни тугатиш таклифини ўртага ташлаши манзарасида рўй бермоқда. Ғарб ушбу таклифни унча илиқ қаршиламаганди.

Ғарб давлатлари Пекинни Россияга қурол етказиб бериш оқибатларидан огоҳлантириб келмоқда.

Хитой Ташқи ишлар вазирининг айтишича, Ши Жинпин Путиннинг таклифи билан 20-22 март кунлари Россияга ташриф буюради.

Бир нечта "икки томонлама муҳим ҳужжатлар" имзоланиши кутилмоқда.

Вазирлик матбуот котибининг айтишича, учрашувлардан мақсад икки томонлама ишончни янада мустаҳкамлаш.

Феврал ойида Украина президенти Володимир Зеленский Ши Жинпин билан учрашиб Пекин таклифини муҳокама қилиш истагини билдирганди.

"Хитой Россияга қурол етказиб бермаслигига жуда ишонгим келяпти", деган у.

АҚШ давлат котиби Энтони Блинкен олдинроқ Пекин Россияга қурол-яроқ бериш имкониятларини кўриб чиқаётганини айтган. Хитой ушбу даъворларни рад қилган.

Жума куни АҚШ матбуоти Ши Жинпин Россияга ташрифидан сўнг Зеленский билан виртуал мулоқот қилиши ҳақида ёзди, бироқ ушбу хабарлар ҳозирча тасдиқлангани йўқ.

Ташқи ишлар вазири: Украина уни қўлламаганларни унутмайди

Украина Ташқи ишлар вазири Дмитро Кулеба уруш тугаганидан сўнг "Украинага ёмон муносабатда бўлган" давлатлардан ҳисоб сўралишини айтди.

Би-би-сига берган интервюсида у Россия босқини ортидан ҳар бир давлат танлаган йўл келажакда муносабатларни қуришда ҳисобга олинишини таъкидлади.

У, шунингдек, Ғарб қуролларининг кечикиши Украинада одамларнинг ҳаётига тенг эканлигидан огоҳлантирди.

"Агар етказилиши керак бўлган нарса бир кун кечикса, бу уруш жабҳасида кимдир ўлишини англатади", деган у.

Интервю давомида Кулеба уруш тугашига қанчалик ишониши, унда Хитойнинг ўрни ва Рим папаси Францискнинг уруш ичидаги мамлакатга ҳамон ташриф буюрмаганидан ҳафсаласи пир бўлганини айтди.

Россия босқини бошланган буён Украина Ғарб давлатларидан ҳарбий ва иқтисодий кўмак олаётган бўлса-да, Африка, Осиё ва Жанубий Америкадаги кўплаб давлатлар четдан қараб турибди.

Ушбу давлатларнинг айримларида Россияга нисбатан тарихий хайрихоҳлик бўлса, баъзилари урушнинг иқтисодга таъсиридан хавотирга тушган, бошқалар эса Ғарб урушни кераксиз тарзда чўзаётганига ишонади.

Бироқ Кулебанинг айтишича, ҳозир Украинани қўллаб-қувватламаётган давлатлар "уруш давомида ўзларини яхши тутмади ва Украинага нисбатан ёмон муносабатда бўлди". Улар келажакда бунинг бадалини тўлайди, деган у.

Украина яқин ва узоқ келажакда Ғарбнинг ёрдами ва ҳарбий кўмагига катта эҳтиёж сезиши мумкин. Шу сабабдан унинг дипломатик норозилиги айрим давлатларни безовта қилмаслиги мумкин.

Бироқ тинчлик даврида йирик миқдорда дон экспорт қилиш Украинага айниқса, ривожланаётган давлатларга нисбатан сезиларли иқтисодий таъсир ўтказиш имконини беради.

"Кимдир Украинанинг энг оғир кунларида қайсидир давлатнинг муносабати ва ўзини тутиши келакжакдаги муносабатларни ўрнатишда инобатга олинмайди, деса у шунчаки, дипломатия қандай ишлашини тушунмайди", деган у.

"Уруш - сен танлов қиладиган давр. Танловинг тарихга муҳрланади", дея таъкидлаган Украина Ташқи ишлар вазири.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002