Янгиликлар. Эрон: 17 ёшли хотинининг бошини танасидан жудо этган эркакка ҳукм ўқилди Eron Ayollar Dunyo Yangiliklar

Хотинининг кесилган бошини ушлаб турган Сажжоднинг сурати кўпчиликни шокка солмай қўймаганди.

Алоқадор мавзулар

Суд ҳукми

Хотинининг кесилган бошини ушлаб турган Сажжоднинг сурати кўпчиликни шокка солмай қўймаганди.

Суд уни 8 йиллик қамоқ жазосига ҳукм этган.

Ҳукмнинг нега бунчалар енгил экани кўпчиликни таажжубга солмай қўймаган.

Суд воизи бунинг сабабини жувоннинг оиласи қотил эрни кечиргани ва ундан қасос олишни истамагани билан изоҳлаган.

Қурбоннинг отаси аввалроқ ўзининг бу қотилликка розилик бермаганлигини айтган.

Қотиллик

Қотиллик Эроннинг Аҳваз шаҳрида содир этилган.

Хабарларга кўра, эр хотинини "ор-номус", деб ўлдирган.

Мона 12 ёшида Сажжодга турмушга чиққан, ҳали 14 ёшда экан, ундан ўғил кўрган.

Маҳаллий матбуотнинг ёзишича, аёл эрининг зўравонлигидан азоб чекиб келган.

Зўравон эридан паноҳ истаб, Туркияга ҳам қочган.

Эридан ажрашишни истаган, аммо у ҳеч талоқ бермаган.

Мона ўз оиласининг ишонтиришларига ишониб, ўтган йил февраль ойида яна Эронга қайтган.

Аммо қайтишидан бор-йўғи бир неча кун ўтиб, эри унинг бошини танасидан жудо қилган.

Суд воизининг изоҳлашича, ҳукм Эрон қонунчилигига мувофиқ чиқарилган.

Унга кўра, оиласи кечирмаган тақдирдагина, қасддан одам ўлдирганга ўлим жазоси берилади.

Монанинг қайноғаси ҳам мазкур қотилликдаги иштироки учун жазоланган. Суд унга 45 ойлик қамоқ жазоси тайин этган.

Акс-садолар

Даҳшатли қотиллик Эронда зўравонликнинг олдини олувчи ва жабрдийдаларни ҳимоя қилувчи қонун қабул қилинсин, деган талабларга ҳам сабаб бўлган.

Қизлар ҳали вояга етиб олсин, дея никоҳ ёшини кўтаришга оид чақириқлар ҳам янграган.

Эронда ҳозир қизлар учун никоҳ ёши 13 этиб белгиланган.

Аммо адлия тизими ва ота-онасининг розилиги билан қизлар бундан эрта ҳам эрга берилиши мумкин.

2020 йилда ҳам худди шунга ўхшаш қотиллик юз берган.

14 ёшли Ромина Ашрафий севган йигити билан қочиб кетганлиги боис, отаси унинг бошини олиб ташлаган.

Ота бу ишга қўл уришдан аввал юрист билан маслаҳатлашган, қизини ўлдирса, ўзига қандай жазо берилиши билан қизиққан.

Содир этган даҳшатли жинояти ортидан эса, у энг узоқ қамоқ жазосидан бир йил кам муҳлатга - 9 йилга қамоқ жазосига ҳукм қилинган.

Эрон ҳукумати алал-оқибат аёлларга қарши турли кўринишдаги зўравонликларни жиноят сирасига киритувчи қонун лойиҳасини маъқуллаган.

Аммо у ҳали Эрон парламентининг ҳам тасдиғидан ўтиши лозим.

Бирлашган Миллатлар Ташкилотининг махсус экспертига кўра эса, бу етарли эмас.

BBC.COM/UZBEK билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek