Россия-Украина: Путин нега Украинага "чида, гўзалим" деди? Rossiya Ukraina Dunyo Yangiliklar
Сурат манбаси, MIKHAIL METZEL/TASS/GETTY IMAGES
Путиннинг Франция президенти билан музокаралари ортидан айтган битта гапи халқаро миқёсда можарога сабаб бўлди. Украинага "чида, гўзалим", дейиш билан нима демоқчи бўлганига шахсан ўзининг ойдинлик киритишига тўғри келди. "Чида, гўзалим" Оқ уйгача етиб борди.
Таҳлил:
Алоқадор мавзулар:
Путиннинг изоҳи
Қозоғистон президенти билан музокаралари ортидан Кремлда берган матбуот анжумани чоғида Путин "бунинг шахсга тегинувчи бирор бир жойи йўқ"лигини айтди.
Ўзининг "ишни ҳар доим иш, деб билиши, ишда ҳеч қачон шахсиятга ўтмаслиги"ни таъкидлади.
Аммо Россия президентининг танқидчилари бунга тамом тескари қарашда.
Уларнинг айтишларича, бу ибора камида сексистдир.
Айни мақолада X томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз X ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири X пост
Ўзи нима бўлганди?
Сурат манбаси, official
Россия ва Франция президентлари шу ҳафта душанба куни учрашишган.
Икковлон ўртасидаги музокаралар пойтахт Москвада кечган, президентлар олти соатча гаплашишган.
Кун тартибидаги асосий масала эса, Украина инқирози бўлганди.
Музокаралар ортидан президентлар қўшма матбуот анжумани беришган.
Анжуманда ҳар икки давлат раҳбари ҳам Донбассдаги вазиятни барқарорлаштириш учун Минск келишувларини ҳаётга тадбиқ этишнинг муҳимлигини таъкидлашган.
"Менимча, бунинг бошқа муқобили йўқ. Яна бир бор такрорлайман, Киевда бир уларга амал қиламиз дейишади, кейин яна мамлакатимизни вайрон қилади, деган гапга ўтиб олишади. Амалдаги президенти эса, яқинда битимларнинг бирор бир банди ўзига мақбул эмаслигини ҳам баён қилди", - деб айтган Путин.
"Ёқадими, ёқмайдими - чида, гўзалим". Бажариш керак. Чунки бошқа йўл йўқ", - дея қўшимча қилган Россия президенти.
Акс-садолар
Сексуал шаъма борлигига шубҳа қилиб, Путиннинг бу сўзларига кейин фақат журналистлар эмас, Украина президенти ва бошқа сиёсатчилар ҳам эътибор қаратишган.
Матбуот анжуманининг эртаси куни Франс-пресс ахборот агентлигининг мухбири Путин нима демоқчи бўлгани саволи билан унинг матбуот котибига мурожаат қилган.
У, "айримлар буни анчайин номақбул мазмундаги шаъма, деб тушунишгани"ини айтган.
Дмитрий Песков эса, журналистга "президент агар давлат ўз зиммасига мажбурият олган бўлса ва унинг остида раҳбарининг имзоси турса, у бажарилиши кераклигини назарда тутган"ини айтиб, жавоб берган.
Журналист матбуот котибидан Путин "Красная плесень" гуруҳининг ижоди билан таниш ёки йўқ эканига ҳам ойдинлик киритишини сўраган.
Песков Россия президенти бу гуруҳни билмаслигини айтган.
Путиннинг ёдига русча фольклор тушиб қолган бўлиши мумкинлигини тахмин қилган.
"Красная плесень" - пардасиз мазмундаги қўшиқлар, эртаклар, шеърлар ва латифалар айтувчи панк-рок гуруҳи бўлади.
Антрополог Александра Архипова ҳам Песковнинг тахминига қўшилган.
У ҳам Путин катта эҳтимол билан бу иборани халқ оғзаки ижодидан олганини айтган.
Зеленский бунга нима деди?
Сурат манбаси, Reuters
Украина президенти Путиннинг бу сўзларига ўзининг муносабатини узоқ куттирмаган.
Бу ҳақда худди ўша куннинг ўзида, Франция президенти билан Киевда берган матбуот анжумани чоғида тўхталиб ўтган.
Эммануэль Макрон Россиядан кейин Украинага сафар қилган.
Пойтахт Киевда Владимир Зеленкский билан ҳам музокаралар олиб борганди.
"Албатта, Россия президенти билан баҳслашилмайдиган нарсалар бор. Украина ҳақиқатан гўзал", - дея аввалига ҳазил қилган Владимир Зеленский. "Менинг"га келганда эса, Украина президенти "энди буни ошиқча", деб ўйлашини айтган.
Шу гапидан кейин, "айтганча, кечки овқатдан кейин ўтириб, дам олмадингизми?", - дея Франция президентига юзланган.
Оқ уйдаги акс-садо
9 февраль куни Путиннинг бу гапи Вашингтонга ҳам етиб борган.
Журналистлар АҚШ маъмуриятининг бунга муносабатини сўраб, Оқ уй матбуот котибига мурожаат қилишган.
"Америкалик бўладими ёки хорижлик, қай бир амалдорнинг оғзидан чиқмасин, жинсий зўравонликка оид ҳар қандай ҳазил гап, албатта, бу маъмуриятдаги барчанинг ғазабини келтиради", - деб айтган Жен Псаки.
Путин эса, яна бир бор Украина, Минск келишувлари ва "гўзалим" ҳақидаги гаплари фақат мажбуриятлар бажарилиши кераклигини назарда тутганини таъкидлаган.
"Менимча, Украина илова давлатлар ўртасидаги хавфсизлик нуқтаи назаридан энг муҳим муносабатларни тартибга солувчи фундаментал битимлар ҳақида сўз кетганда, давлат раҳбарининг менга буниси ёқади, униси эса, ёқмайди, деб туриши қолипга сиғмайди", - деб айтган Россия президенти.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
