Аҳмаджон Мусаев: 'Мақсадимиз - ҳар бир ўйинда ютуққа эришиш'

Ўзбекистон Ёшлар миллий терма жамоаси Бош мураббийи Аҳмаджон ака Мусаев Туркиянинг Бурса шаҳридан туриб Би-би-си Ўзбек Хизматига берган суҳбатида жаҳон чемпионатидаги навбатдаги рақиблари - Хорватия билан учрашувларига ана шундай баҳо берди:

Дастлабки ўйинларини ғалаба билан бошлаган икковлон 26 июн куни бир-бирларига қарши майдонга тушишади.

20 ёшгача бўлган ўртасидаги жаҳон биринчилиги "F" гуруҳи саралаш босқич беллашувларининг 2-тур учрашуви ҳам Бурсанинг "Отатурк" стадионида бўлиб ўтади.

23 июн куни Янги Зеландияни йирик (3:0) ҳисобда мағлуб этган Ўзбекистон Ёшлар миллий терма жамоаси ҳозир ўз гуруҳида пешқадамлик қилиб турибди.

Агар, жамоа эртанги учрашувида Хорватияни енгса, муддатидан илгари кейинги босқичга чиқади.

Ўзбекистонлик футболчилар гуруҳ босқич беллашувларида Хорватиядан ташқари, яна Уругвай билан ҳам беллашишади.

Хорватия ва Ўзбекистон Ёшлар миллий терма жамоалари ўртасидаги учрашув Тошкент вақти билан кечки соат 23:00 да бошланади.

Ўйинни Виктор Каррильо бошчилигидаги перулик ҳакамлар бригадаси бошқариб боради.

Бош мураббий башорати

Хорватиялик футболчилар ўтган якшанба кунги илк учрашувларида "А" гуруҳи фаворити сифатида кўрилган уругвайлик рақибларини 1:0 ҳисобида мағлуб этишганди.

Аммо, Ўзбекистон Ёшлар миллий терма жамоаси Бош мураббийи Аҳмаджон ака Мусаевнинг айтишича, бу каби натижа ўз режаларига таъсир эта олмаган.

"Нега деганда, баландпарвоз сўз эмасу, 24 та қатнашчи бекорга бу ерга келмайди. Сиз билан илк суҳбатимизда Бразилия ва Аргентинанинг бу йилги жаҳон чемпионатига чиқишолмагани ҳақида гаплашгандик. Ўша Аргентина ва Бразилияни чиқариб юборган жамоалар бор бу ерда. Хорватия ва Уругвай бир-икки калла кучлироқ жамоалар. Лекин бизнинг жамоамиз шундайки, Худо хоҳласа, ўзларингиз кўрасизлар, рақибимиз қанча кучли бўлса, шунга яраша кучли ўйнайди", дейди Аҳмаджон ака.

Бош мураббий Янги Зеландияга қарши ўйинда айрим футболчилар тан жароҳати олишганига қарамай, ҳозир ҳамманинг бўлажак учрашувга шай эканини айтади.

Хорватия устидан ғалаба кейинги босқичга йўлланмани нақд қилишини назарда тутиб, Аҳмаджон ака Мусаев, "жамоанинг фалсафаси - ҳар бир ўйинда ғалаба қозонишга ҳаракат қилиш" эканини таъкидлайди.

"Бизнинг мақсадимиз - ҳар бир ўйинда ютуққа эришиш. Бу дегани, агар, узоқроқни назарда тутиб айтсак, кейинги ўйинларга бафуржа тайёрлана оламиз. Нега деганда, жамоага бироз дам беришимиз мумкин бўлади".

Аҳмаджон ака, "жаҳон чемпионатида ҳар бир жамоа бир-бирини ютиб қўйиши мумкинлиги, Янги Зеландияга қарши ўйинларига қадар матбуотда ўзларини "аутсайдерлар", деб баҳолашгани, аммо тезда фикрлар ўзгариб қолгани"ни айтади.

"Тўғри, биз яна аутсайдер билан ўйнадик деган сўз бўлиши мумкин. Лекин ўйин натижаси, ўйиндаги ҳолатлар бекорга эмаслигини таҳлил қиладиган мутахассислар бор. Мана, энди бизлардан ҳам анчагина қўрқишяпти", дейди Ўзбекистон Ёшлар миллий терма жамоаси Бош мураббийи.

Бўлажак рақиблар

Ўзбекистон, Хорватия ва Янги Зеландия билан таққослаганда, "F" гуруҳи иштирокчилари орасида жаҳон биринчиликларида Уругвай энг яхши натижани қайд этган.

Жамоа 1979 йилда учинчи, 1997 йилда иккинчи, 1977 ва 1999 йилларда 4-ўрингача кўтарилишга муваффақ бўлган.

Аммо сўнгги уч жаҳон чемпионатида ҳаминқадар натижа кўрсатишган.

Уругвайлик ёшлар, ҳатто, 2011 йилда гуруҳ босқичидан нарига ўта олишмаган.

Хорватия Ёшлар миллий терма жамоаси эса, жаҳон чемпионатида уч бор тўп сурган бўлса, бор-йўғи бир маротаба гуруҳдан кейинги босқичга чиққан.

Ўзбекистон ва Янги Зеландия ҳам учинчи бор жаҳон биринчилигининг финал босқич беллашувларида иштирок этаётган бўлишса, шунинг икки галида гуруҳ босқичидан ортга қайтишган.

Аммо ҳозир Ўзбекистон Ёшлар миллий терма жамоасининг ўзагини ташкил этувчи футболчилар ўсмирлар ўртасида бўлиб ўтган сўнгги жаҳон чемпионатининг чорак финалига қадар кўтарилишга муваффақ бўлишган.

Устига устак, жамоа аъзолари аксариятининг бир клубда тўп суриши Ўзбекистон жамоасига жуда қўл келиши ҳам алоҳида таъкидланмоқда.

Айни ўринда шуни ҳам таъкидлаш керакки, Хорватия, Уругвай ва Янги Зеландия ўз таркибида Италия ва Англия клубларида тўп сурувчи ўйинчиларга эга.

Аммо, халқаро футбол мутахассислари футболчилар бир-бирини қанчалик яхши англаши борасида қолган уч рақиби Ўзбекистонга ҳавас қилса арзишини айтишмоқда.

Гуруҳлардаги ҳолат

Ягона кубок учун курашаётган 24 миллий терма жамоа 6 гуруҳга бўлиниб, ўз гуруҳ босқич беллашувларини бошлашган бўлса, жорий пайтда Испания, Португалия, Туркия, Юнонистон, Чили ва Ўзбекистон ўз гуруҳларида пешқадамлик қилиб туришибди.

Жамоалар кеча душанба куни гуруҳ босқич беллашувларининг 2-тур учрашувларини бошлашганди.

Икки ўйин ортидан 6 очко тўплашга муваффақ бўлган собиқ жаҳон чемпиони Испания ҳозирча кейинги босқичга муддатидан илгари йўлланмани қўлга киритган ягона миллий терма жамоа бўлиб турибди.

Бугун:

АВСТРАЛИЯ - АЛ САЛЬВАДОР

МЕКСИКА - ПАРАГВАЙ

ТУРКИЯ - КОЛУМБИЯ

МАЛИ - ЮНОНИСТОН навбатдаги учрашувларини ўтказишади.