Ўзбекистон фуқаролари ўз тарихидаги энг миллатчи ҳукумат томонидан бошқарилаётган Нидерландияга ишга юборилиши мумкин
Сурат манбаси, Dunyo
Ўзбекистон Ташқи ишлар вазирлиги тарқатган хабарга кўра, Ўзбекистоннинг Бенилюкс (Белгия, Нидерландия ва Люксембург)даги элчиси Ғайрат Фозилов
ўзбекистонликлар Нидерландияга бориб ишлашлари имкониятларини "EuroTalents" агентлиги билан муҳокама қилди.
Вазирликка тегишли Дунё хабар агентлиги ёзишича, жаноб элчи Нидерландиянинг "EuroTalents" агентлиги директори Томми Кок ва агентлик ҳаммуассиси Тичо Саул билан учрашган.
"Музокаралар чоғида Ўзбекистондан Нидерландияга ишчи кучини жалб қилиш, шунингдек, Ўзбекистон Вазирлар Маҳкамаси ҳузуридаги Миграция агентлиги ва "EuroTalents" рекрутинг агентлиги ўртасида ҳамкорлик алоқаларини ўрнатиш масалалари муҳокама қилинди", - дейилади расмий хабарда.
Ўзбекистон Президенти 2024-йил 17октябрда "Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида"ги қарорни имзолаган.
Россия ва собиқ совет республикаларидан ташқари, Ўзбекистон охирги йилларда Германия, Буюк Британия, Япония, Корея Республикаси, Исроил, Канада, Полша, Туркия, Саудия Арабистони, Хитой каби хорижий шериклар билан ишчи кучни етказиб бериш бўйича ҳамкорликни йўлга қўйган.
Расмий хабарда айтилишича, элчи ва нидерланд шериклар Ўзбекистон билан логистика ва транспорт, қурилиш ва инфратузилмани ривожлантириш, технология, меҳмонхона бизнеси ва тиббиёт каби соҳаларда меҳнат ресурсларини жалб қилиш соҳасида ҳамкорликни йўлга қўйишдан манфаатдор эканликларини муҳокама қилишган.
Шунингдек, вазирлик хабарига кўра, "EuroTalents" рекрутинг агентлиги Бенилюкс мамлакатларидаги компаниялар хорижий ишчи кучини фақат қонуний асосда ёллашини қайд этган. Таъкидланишича, агентлик хорижий фуқароларни ёллаш жараёнининг барча босқичлари, жумладан, шартномалар тузиш, иш ҳақи, уй-жой билан таъминлаш ва қонунчиликка риоя қилиш, кадрларга бўлган эҳтиёжни ҳал этишга яқиндан кўмаклашади.
Сурат манбаси, EPA
Элчи билан учрашувда "EuroTalents" агентлиги Ўзбекистоннинг Миграция агентлиги билан онлайн музокаралар ўтказиши келишиб олинган.
Европанинг шимоли-ғарбида жойлашган ва Голландия номи билан ҳам аталадиган Нидерландияда охирги йилларда малакали ишчилар етишмаяпти. Хусусан, тиббиёт, қурувчилик, технология соҳаларида ишчи танқислиги юзага келган. Бу вазият яқин келажакда ёмонлашиб бориши кутилади.
Ижтимоий тармоқлардаги саҳифаларимиз:
Айни дамда, Нидерландия сиёсатида анти-иммиграцион кайфият кучайиб, иммиграцияни чеклашга чақирувчи партиялар ҳукуматни эгаллаган. Ҳозирда мамлакатни Нидерландия тарихидаги энг ўнг-қанот партиялар коалицияси бошқаради.
Давлат ўтган сентябрда иммиграцияни чекловчи қонунларни қабул қилди. Жумладан, Нидерландия фуқаролигини олиш муддати 5 йилдан 10 йилга ўзгартирилди. Шунингдек, ҳукумат паст маошли ишларга келувчилар сонини кескин камайтириб, юқори малакали ишчиларни жалб қилишга аҳд қилди.
