شمالی کوریا کا بیلسٹک میزائل تجربہ ’ناکام‘
،تصویر کا ذریعہReuters
جنوبی کوریا کے عسکری حکام کا کہنا ہے کہ شمالی کوریا کی جانب سے اس کے مشرقی ساحل پر بیلسٹک میزائل تجربے کی کوشش کی گئی اور بظاہر یہ تجربہ ناکام ہوگیا۔
تاحال یہ واضح نہیں ہے کہ یہ کس قسم کا میزائل تھا تاہم اس سے قبل اپریل میں درمیانے فاصلے تک مار کرنے والے ’مسندن‘ میزائل کے تین تجربے ناکام ہوچکے ہیں۔
خیال رہے کہ شمالی کوریا پر اقوامِ متحدہ نے سنہ 2006 میں جوہری تجربہ کرنے اور بیلسٹک میزائل کے استعمال کی پابندی عائد کی تھی۔
شمالی کوریا کی جانب سے جنوری میں چوتھے جوہری تجربے اور متعدد میزائل تجربات کے بعد خطے میں کشیدگی پائی جاتی ہے۔
جنوبی کوریا کے جوائنٹ چیفس آف سٹاف کا کہنا تھا کہ مقامی وقت کے مطابق پانچ بج کر 20 منٹ پر شمالی کوریا کے مشرقی ساحل پر تجربے کی کوشش کی گئی تاہم اس حوالے سے مزید تفصیلات سے آگاہ نہیں کیا گیا۔
جنوبی کوریا کے خبررساں ادارے یونہاپ کے مطابق چوتھا ناکام ہونے والا تجربہ بھی مسندن میزائل کا تھا۔
یاد رہے کہ شمالی کوریا پر حال ہی میں امریکہ نے مزید نئی پابندیاں عائد کی تھیں۔
یکم اپریل کو امریکی صدر باراک اوباما نے اعلان کیا تھا کہ امریکہ اور چین نے فیصلہ کیا ہے کہ شمالی کوریا کو مستقبل میں میزائل ٹیسٹ کرنے سے روکیں گے۔
End of سب سے زیادہ پڑھی جانے والی
اس کے باوجود شمالی کوریا نے مغربی ممالک کو دھمکیاں دیتے ہوئے ہائیڈروجن بم اور پھر طویل فاصلے تک جانے والے میزائل کے تجربات کیے۔
ماضی میں شمالی کوریا پر سنہ 2006، سنہ 2009 اور پھر سنہ 2013 میں جوہری تجربات کی وجہ سے اقوام متحدہ کی جانب سے عائد کی گئی پابندیوں سے شمالی کوریا کے ایٹمی ارادوں پر کوئی اثر نہیں ہوا۔
پابندیوں پر عمل درآمد کی زیادہ تر ذمہ داری اب چین پر پڑ رہی ہے۔
