پیلمائرا میں اجتماعی قبر کی دریافت
،تصویر کا ذریعہBBC Arabic photographer Wissim Abdo
شام کی سرکاری نیوز ایجنسی کے مطابق ملک کی فوج کو حال ہی میں دولتِ اسلامیہ کے قبضے سے آزاد کروائےگئے قدیم شہر پیلمائرا میں ایک اجتماعی قبر ملی ہے۔
اس اجتماعی قبر سے 40 لاشیں ملی ہیں جن میں بچے اور عورتیں بھی شامل ہیں۔
خبر رساں ادارے اے ایف پی سے بات کرتے ہوئے شامی فوج کے ایک افسر نے بتایا ہے کہ جن افراد کی لاشیں ملی ہیں ان کا تعلق حکومت نواز ملیشیا سے تھا۔
قبر میں دفنائے جانے والوں میں سے 24 سرکاری افسران کے رشتہ دار اور عام شہری تھے۔
اطلات کے مطابق تمام لاشوں کو حمص کے ایک فوجی ہسپتال منتقل کر دیا گیا ہے جہاں لاشوں کی شناخت کا عمل جاری ہے۔
خیال رہے کہ حکومتی افواج نے حال ہی میں شدت پسند تنظیم دولت اسلامیہ کو شکست دیکر قدیمی شہر پیلمائرا پر دوبارہ کنٹرول حاصل کیا ہے۔
شام کے صدر بشارالا سد نے پیلمائرا پر حکومتی افواج کے قبضے کو دہشت گردی کے خلاف جنگ میں اہم پیش رفت قرار دیا تھا۔
صدر اسد کے بقول پیلمائرا میں دولتِ اسلامیہ کو شکست شامی افواج اور اس کے اتحادیوں کی دہشت گردی کے خلاف جنگ میں بہترین کارکردگی کا مظہر ہے۔
End of سب سے زیادہ پڑھی جانے والی
خیال رہے کہ دولت اسلامیہ نے اس قدیم شہر پر گذشتہ سال مئی میں قبضہ کر لیا تھا اور وہاں موجود دوہزار سال پرانے آثار قدیمہ کو نقصان پہنچایا تھا جس کی بین الاقوامی سطح پر مذمت کی گئی تھی۔
