ایران پر تاریخی پیش رفت سفارت کاری سے ہوئی: اوباما
،تصویر کا ذریعہReuters
امریکی صدر اوباما نے ایک بیان میں ایران کے ساتھ نئے تعلقات کو سراہا ہے۔
صدر اوباما کی جانب سے یہ بیان جوہری معاہدے کے تحت ایران پر سے اقتصادی پابندیاں اٹھائے جانے کے ایک دن بعد سامنے آیا ہے۔
صدر اوباما کے بقول جوہری معاہدے کا مطلب ہے کہ ایران جوہری ہتھیار نہیں بنا سکے گا۔
امریکی صدر کا مزید کہنا ہے کہ مشرقِ وسطیٰ میں جنگ کی بجائے سفارت کاری کے ذریعے تاریخی پیش رفت ہوئی ہے۔
صدر اوباما نے ایران کے ساتھ ہونے والے قیدیوں کے تبادلے کے تحت پانچ ایرانی نژاد امریکی شہریوں کی رہائی کو بھی خوش آئند قرار دیا ہے۔
اس سے قبل ایرانی صدر حسن روحانی نے عالمی پابندیاں ہٹائے جانے کو ’دنیا کے ساتھ تعلقات کے ایک نئے باب کا آغاز‘ قرار دیا تھا۔
End of سب سے زیادہ پڑھی جانے والی
امریکی اور ایرانی لیڈران کے علاوہ دنیا بھر سے عالمی رہنماؤں نے امریکہ اور یورپی یونین کی جانب سے ایران پر عائد پابندیاں ختم کرنے کے فیصلہ کا خیر مقدم کیا ہے۔
اقوامِ متحدہ کے سیکریٹری جنرل بان کی مون نے اسے ایک سنگِ میل قرار دیتے ہوئے کہا کہ فریقین نے اس حوالے سے اپنے اپنے وعدوں کو پورا کیا۔
برطانوی وزیرِ خارجہ فلپ ہومونڈ نے اسے مسلسل ڈپلومیسی کی فتح قرار دیا۔
فرانسیسی وزیرِ خارجہ فرانک والٹر کا کہنا تھا کہ وہ خطے کے دیگر مسائل کے حل کے لیے ایران سے ایسے ہی ’تعاون کے جذبے‘ کی اُمید کرتے ہیں۔
انھوں نے کہا کہ یہ امن اور استحکام کے لیے ایک اہم قدم ہے۔‘
