غزہ کی تعمیرِ نو سست رفتار کیوں؟

اسرائیل اور فلسطین کے درمیان 50 دن تک جاری رہنے والی لڑائی میں غزہ کی ہزاروں عمارتیں تباہ و برباد ہو گئیں اور ان میں سے ایک بھی تباہ شدہ عمارت دوبارہ تعمیر نہیں کی گئی۔

اسرائیل اور مصر نے سرحدی آبادی پر سخت پابندیاں عائد کی ہوئی ہیں جس کی وجہ سے تعمیرِ نو کے لیے کی جانے والی کوششیں متاثر ہوتی ہے۔

دونوں ممالک کا کہنا ہے کہ یہ پابندیاں سکیورٹی کی ضرورت ہیں۔

اگرچہ اقوامِ متحدہ نے غزہ میں عمارتوں کے تعمیراتی ساز و سامان کی درآمد کے لیے ایک معاہدہ کروایا تھا اس کے باوجود وہاں پر ترقی کی رفتار بہت سست ہے۔ غزہ میں ایک لاکھ فلسطینی اب بھی بے گھر ہیں۔

اسلامی تنظیم حماس کے سنہ2007 میں غزہ میں اقتدار میں آنے کے بعد فلسطین اور اسرائیل کے درمیان اب تک تین بڑی جنگیں ہو چکی ہیں تاہم سنہ 2014 میں ہونے والی لڑائی اب تک کی سب سے خونی لڑائی تھی۔

اقوامِ متحدہ کے مطابق اس لڑائی میں 2,200 سے زائد فلسطینی جن میں زیادہ تر عام شہری جبکہ اسرائیل کے 67 سپاہی اور چھ عام شہری مارے گئے۔

اسرائیل کا موقف ہے کہ اس کی جانب سے کی جانے والی کارروائی کا مقصد فلسطینی شدت پسندوں کو اس کی آبادی پر راکٹ برسانے سے روکنا تھا۔ اس کے علاوہ ایک مقصد شدت پسندوں کی جانب سے حملے کرنے کے لیے کھودی جانے والی خندقوں کے نیٹ ورک کو تباہ کرنا تھا۔

ایک اندازے کے مطابق غزہ میں 1,70,000 گھروں اور 360 فیکٹریوں کو نقصان پہنچا۔ 50 دن تک جاری رہنے والی اس لڑائی میں بنیادی ڈھانچے کو نقصان پہنچا جبکہ ہزاروں ایکڑ پر پھیلی اراضی تباہ ہو گئی۔

تعمیرِ نو کے لیے ایک شخص کی کوشش

غزہ کے مشرق میں انگریزی مضمون کے ایک استاد عبدالکریم ابو احمد اپنی بیوی اور 11 بچوں کے ساتھ ایک بڑے گھر میں روز گارڈن شجاعیہ میں رہتے ہیں۔

یہ خاندان اسرائیل اور فلسطین کی لڑائی کے دوران غزہ سے بھاگ گیا تھا جب وہ واپس آئے تو انھیں معلوم ہوا کہ ان کا بڑا گھر تباہ ہو چکا تھا۔

اس خاندان کی زیادہ تر اشیا جن میں ان کا فرنیچر، کپڑے اور کتابیں شامل ہیں، تباہ ہو چکی تھیں۔

یہ خاندان اب ایک چھوٹے اپارٹمنٹ میں رہائش پذیر ہے۔

اقوامِ متحدہ کے ادارے برائے فلسطین مہاجرین (یو این آر ڈبلیو اے) کی جانب سے آنے والی امداد نے اس سرحدی آبادی والے علاقے میں رہائش پذیر لوگوں کے لیے کرایہ ادا کیا۔

غزہ میں بلڈوزروں کی کمی ہے تاہم گذشہ ماہ ابو احمد کا خاندان آخر کار ایک بلڈوزر کی مدد سے اپنی زمین کو صاف کرنے میں کامیاب ہو ہی گیا۔

اس خاندان کے پاس نیا گھر بنانے کے لیے منصوبے ہیں اور قطری حکومت نے اس کے لیے رقم مہیا کرنے کا وعدہ کیا ہے۔

عبدالکریم کہتے ہیں ’جنگ کے بعد سے تعمیرِ نو کے لیے بڑی رکاوٹیں تھیں اور یہ صورتِ حال بہت مایوس کن تھی تاہم مجھے امید تھی اور میں نے صبر کرنے کی کوشش کی۔‘

محاصرہ توڑنے کی اپیل

اسرائیل نے غزہ میں ’دہری استعمال‘ کے میٹریل کے داخلے پر پابندی عائد کر رکھی ہے۔ ان میں وہ عمارتی اشیا بھی شامل ہیں جنھیں استعمال کر کے شدت پسند نئی خندقیں بنا سکتے ہیں۔

اقوامِ متحدہ نے غزہ میں نئی تعمیرات کی اجازت دینے کے لیے اسرائیل اور فلسطینی حکومتوں کے ساتھ غزہ تعمیرِ نو میکنزم پر اتفاق کیا ہے۔

اس کے تحت لوہے کی سلاخیں اور سیمنٹ (جسے عام طور پر اے بی سی میٹریل) بھی کہا جاتا ہے کی کیرم شلوم کی سرحد سے آنے کی اجازت ہے۔

اقوامِ متحدہ کے اہلکاروں نے غزہ میں تباہ شدہ گھروں کا جائزہ لینے میں مدد کی۔ اس کی مکمل تفصیلات ایک کمپیوٹر ڈیٹا بیس میں رکھی گئیں اور اسرائیلی فوج نے اس کی کچھ معلومات کو نظر انداز کیا۔

اقوامِ متحدہ کے مشرقِ وسطیٰ کے خصوصی رابطہ کار نکولائی ملادینوف کا کہنا ہے کہ غزہ کی تعمیرِ نو میں تاخیر کی بڑی وجہ غیر ملکی امداد آنے میں سست روی ہے۔

حماس اور فلسطین اتھارٹی میں پائے جانے والی نئی تفریق نے بھی ان مشکلات میں اضافہ کر دیا ہے۔

تاہم ملادینوف کا کہنا ہے کہ وہ ’کافی پر امید‘ ہیں کہ تعمیرِ نو میکنزم ’آنے والے چند مہینوں‘ میں اپنا اثر ظاہر کرے گا۔

انھوں نے کہا کہ تعمیرِ نو کے لیے اختیار کیا جانے والا نیا عمل نئے گھروں کی تعمیر کے لیے آسانی پیدا کرے گا۔

دوسری جانب اقوامِ متحدہ اور دیگر بین الاقوامی امدادی ادارے اسرائیل سے غزہ کا محاصرہ ختم کرنے کی مسلسل اپیل کر رہے ہیں۔

ان اداروں کا کہنا ہے کہ غزہ میں گھروں اور بنیادی ڈھانچے کی تعمیر کے لیے میٹریل لانے کا صرف یہی ایک راستہ ہے جس سے مقامی معیشت بحال ہو گی۔