آن سان سوچی کے گھر کا دروازہ نیلام ہو گا
،تصویر کا ذریعہSOE NYUNT
برما کی نوبل انعام یافتہ رہنما آن سان سوچی کے گھر کا گیٹ نیلام کیا جائے گا۔
یہ گیٹ سنہ 2007 میں ان کی جماعت کے رنگوں سرخ اور پیلے رنگ میں پینٹ کیا گیا تھا۔ یہ گیٹ برما میں ان کی طویل نظر بندی کے باعث فوجی حکومت کے خلاف جدوجہد کی علامت بن گیا تھا۔
آن سان سوچی کے دوست اور حمایتی سوئی ننٹ کا کہنا ہے کہ نیلامی کا آغاز دو لاکھ ڈالر کی رقم سے کیا جائے گا۔ نیلامی سے حاصل ہونے والی رقم آن سان سوچی کی جماعت نیشنل لیگ فار ڈیموکریسی کے صدر دفتر کو ملے گی۔
آن سان سوچی نے سنہ 1990 اور سنہ 2000 کی دہائیوں کا زیادہ تر عرصہ گھر میں نظر بندی کے دوران گزارا۔
،تصویر کا ذریعہAFP
انھیں حاصل ہونے والی نسبتاً آزادی کے دنوں میں انھوں نے اسی گیٹ کے پیچھے سے باہر جمع ہونے والے اپنے حامیوں سے خطاب کیا تھا۔
یاگان میں بی بی سی کے نامہ نگار جونا فشر کا کہنا ہے کہ گھر میں نظر بندی کے دنوں میں یہی گیٹ ان کی جانب سے نافرمانی کے بعض دلیرانہ اقدامات کے لیے سٹیج بنتا رہا۔ سنہ 2010 میں اسی گیٹ کے پیچھے سے انھوں نے اپنی نظر بندی کے خاتمے کا جشن مناتے ہوئے اپنے حامیوں کے لیے ہاتھ لہرایا تھا۔
اس کے بعد یہ گیٹ سرمئی رنگ کے دروازوں سے تبدیل کر دیا گیا۔
سوئی ننٹ نے فیس بک پر ایک پوسٹ میں کہا: ’اگر یہ عظیم دروازہ بول سکتا تو برما کی جمہوریت کے لیے 25 سالہ تاریخ بیان کرتا۔‘
End of سب سے زیادہ پڑھی جانے والی
اس گیٹ کے ساتھ ساتھ آن سان سوچ کے گھر کا نمر ’54 ‘ بھی نیلام کیا جائے گا۔
سوئی ننٹ نے تاحال اس نیلامی کے لیے حتمی تاریخ کے بارے میں نہیں بتایا۔
،تصویر کا ذریعہSOE NYUNT
